ഗൾഫ് രാഷ്ട്രങ്ങളിൽ എല്ലാം തന്നെ കാലാവസ്ഥ വ്യതിയാനം രൂക്ഷമായി തുടരുകയാണ്. ഈ സാഹചര്യത്തിൽ കുവൈത്തിലും മുന്നറിയിപ്പ് എത്തിയിരിക്കുകയാണ്. രാജ്യത്ത് ഇത്തരത്തിൽ അസ്ഥിരമായ കാലാവസ്ഥ തുടരുമെന്നാണ് മുന്നറിയിപ്പ്. ഇന്നും നേരിയ മഴയ്ക്ക് സാധ്യതയുണ്ടെന്നും മണിക്കൂറിൽ 35 കിലോമീറ്റർ വേഗതയിൽ കാറ്റ് വീശിയേക്കാമെന്നും കാലാവസ്ഥ കേന്ദ്രം അറിയിച്ചു.

താപനിലയിൽ ഗണ്യമായ കുറവുണ്ടാകും. പരമാവധി താപനില 18 ഡിഗ്രി സെൽഷ്യസ് വരെയായിരിക്കും. തണുപ്പ് കൂടുന്നതിനാൽ പുറത്തിറങ്ങുന്നവർ തണുപ്പിനെ പ്രതിരോധിക്കുന്ന വസ്ത്രങ്ങൾ ധരിക്കണമെന്നും അധികൃതർ മുന്നറിയിപ്പ് നൽകി. അതുപോലെ സൗദി അറേബ്യയിലെ വിവിധ പ്രദേശങ്ങളിൽ വെള്ളിയാഴ്ച വരെ മഴയ്ക്കും കാറ്റിനും സാധ്യതയുണ്ടെന്ന് മുന്നറിയിപ്പ് നേരത്തെ തന്നെ പുറത്തുവന്നിരുന്നു.

ചില മേഖലകളിൽ മണിക്കൂറിൽ 55 കിലോമീറ്ററിലധികം വേഗതയിൽ കാറ്റടിക്കും. വെള്ളിയാഴ്ച വരെ മിക്ക പ്രദേശങ്ങളിലും കാാലാവസ്ഥയിൽ മാറ്റമുണ്ടാകും. വെള്ളിയാഴ്ച വരെ തബൂക്ക്, ഹായിൽ, അൽ-ഖാസിം, അൽ-ഷർഖിയ, റിയാദ്, മക്ക, മദീന, അൽ-ജൗഫ്, എന്നീ മേഖലകളുടെ വിവിധ ഭാഗങ്ങളിലാണ് മണിക്കൂറിൽ 55 കിലോമീറ്ററിലധികം വേഗതയിൽ കാറ്റടിക്കുക.

ഇത് പൊടിക്കാറ്റായി മാറാൻ സാധ്യതയുണ്ട്. തബൂക്ക്, അൽ-ജൗഫ്, ഹായിൽ, വടക്കൻ അതിർത്തി, മദീന മേഖലയുടെ വടക്ക് എന്നീ മേഖലകളിൽ വെള്ളി വരെ താപനില നാലു മുതൽ ഒമ്പതു ഡിഗ്രി വരെ എത്തുമെന്നും തണുപ്പ് ശക്തമാകുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.

യുഎഇയിൽ കനത്ത തണുപ്പ് തുടരുമെന്നും ഫെബ്രുവരി പകുതിയുടെ മാത്രമേ ചില പ്രദേശങ്ങളിൽ എങ്കിലും താപനിലയിൽ നേരിയ വർദ്ധനവ് ഉണ്ടാകുകയുള്ളൂ എന്നും നാഷണൽ സെന്റർ ഓഫ് മെറ്റീരിയോളജി പുറത്തിറക്കിയ വാർത്താക്കുറിപ്പിൽ വ്യക്തമാക്കി കഴിഞ്ഞു. രാജ്യത്ത് ഈ മാസത്തെ ശരാശരി കൂടിയ താപനില 23°C മുതൽ 28°C വരെയും കുറഞ്ഞ താപനില 12°C നും 16°C നും ഇടയിലായിരിക്കുമെന്ന് എൻസിഎം കാലാവസ്ഥാ റിപ്പോർട്ടിൽ സൂചിപ്പിച്ചിട്ടുണ്ട്.

സൈബീരിയയിലെ അതിശൈത്യത്തെ വഹിച്ചുകൊണ്ട് യുഎഇയുടെ വടക്ക് ഭാഗത്ത് നിന്ന് വരുന്ന കാറ്റ് അറേബ്യയിലെ ഗൾഫ് മേഖലകളെ ഏറ്റവും അധികം ബാധിക്കുന്ന മാസങ്ങളിലൊന്നാണ് ഫെബ്രുവരി. അതിനാൽ തന്നെ താപനിലയിൽ ഇനിയും കുറവ് വന്നേക്കാം. മെഡിറ്ററേനിയൻ കടലിൽ രൂപപ്പെടുന്ന ന്യൂനമർദ്ദം കടന്നുപോകുന്നത് രാജ്യത്തെ ബാധിക്കും. ഇത് അസ്ഥിരമായ കാലാവസ്ഥയിലേക്ക് അന്തരീക്ഷത്തെ നയിക്കുന്നു. കനത്ത പൊടി കാറ്റ് വീശും. ചില സമയത്ത് നേരിയ മഴയും മൂടിയ കാലാവസ്ഥയും ഉണ്ടാകുമെന്ന് NCM റിപ്പോർട്ട് പറയുന്നു. എന്നാൽ ഇപ്പോൾ ഫെബ്രുവരി 15 കഴിഞ്ഞതോടെ താപനിലയിൽ നേരിയ വർദ്ധനവ് ഉണ്ടാകാനാണ് സാധ്യത.