മുമ്പുള്ള വിസ നിയമങ്ങൾ ലഘൂകരിച്ച് പ്രവാസികൾക്ക് ആശ്വാസകരമായ നീക്കങ്ങളാണ് യുഎഇ അടുത്തിടെ നടത്തികൊണ്ടിരുന്നത്. എന്നാൽ ചില നീക്കങ്ങൾ അതുപോലെ തന്നെ പ്രവാസികൾക്ക് തലവേദയാകുന്നുമുണ്ട്. അത്തരത്തിൽ പ്രവാസികൾക്ക് വലിയ തിരിച്ചടിയാകുന്ന തരത്തിലുള്ള നീക്കങ്ങളിലേക്കാണ് യുഎഇ ഇപ്പോൾ കടന്നിരിക്കുന്നത്.

ദുബൈ എമിഗ്രേഷനിൽ നിന്ന് റസിഡൻസ് വിസ ലഭിച്ചിട്ടില്ലെങ്കിൽ പുതിയ ജീവനക്കാരെ ജോലിക്ക് അനുവദിക്കരുതെന്ന് സ്വകാര്യ സ്ഥാപനങ്ങൾക്ക് യുഎഇ മാനവവിഭവശേഷി, സ്വദേശിവത്കരണ വകുപ്പ് നിർദേശം നൽകിയിരിക്കുകയാണ്. വെബ്സൈറ്റ് മുഖേനയാണ് ഈ പ്രധാനപ്പെട്ട കാര്യം അധികൃതർ വ്യക്തമാക്കിയത്. ഇനിഷ്യൽ വർക്ക് പെർമിറ്റ് ലഭിച്ചു എന്നതിന്‍റെ അടിസ്ഥാനത്തിൽ മാത്രം സ്ഥാപനങ്ങൾ പുതിയ ജീവനക്കാരെ ജോലി ആരംഭിക്കാൻ അനുവദിക്കരുതെന്നാണ് അധികൃതർ വ്യക്തമാക്കുന്നത്.

ഇതോടെ കമ്പനികൾക്കും തലവേദനയായിരുകയാണ്. വർക്പെർമിറ്റ് പുതിയ ജീവനക്കാരന് റെസിഡൻസി നടപടിക്രമങ്ങൾ പൂർത്തിയാക്കുന്നതിന് താൽക്കാലികമായി മാത്രം നൽകുന്ന ഒന്നാണെന്നും ബന്ധപ്പെട്ടവർ അറിയിച്ചു. ഇതുമായി ബന്ധപ്പെട്ട ചോദ്യങ്ങൾക്ക് മറുപടി നൽകുന്നതിന്‍റെ ഭാഗമായാണ് മന്ത്രാലയം ഇക്കാര്യത്തിൽ കൂടുതൽ വ്യക്തത വരുത്തിയത്.

വർക്ക് പെർമിറ്റിന് നൽകുന്ന അപേക്ഷകൾ അംഗീകരിക്കുന്നതിന് തൊഴിലുടമകൾ പാലിക്കേണ്ട അഞ്ച് പ്രധാന വ്യവസ്ഥകളും മന്ത്രാലയം വിശദീകരിച്ചു.

1. സ്ഥാപനത്തിന്‍റെ പ്രവർത്തനത്തിന് ആനുപാതികമായ ജോലിയായിരിക്കണം ജീവനക്കാരന് നൽകേണ്ടത്.

2. ജീവനക്കാരന് മറ്റൊരു കമ്പനിയിൽ നിലവിലുള്ള വർക്ക് പെർമിറ്റോ കാർഡോ ഇല്ലെന്ന് പരിശോധിക്കണം.

3. ജീവനക്കാരന് 18 വയസും അതിനുമുകളിലും പ്രായമുണ്ടെന്ന് ഉറപ്പാക്കണം.

4. ഉടമയും തൊഴിലാളിയും തമ്മിലുള്ള തൊഴിൽ ബന്ധത്തെ സൂചിപ്പിക്കുന്ന രണ്ട് കക്ഷികളും ഒപ്പിട്ട വർക്ക് ഓഫർ സമർപ്പിക്കണം.

5. രാജ്യത്തെ അംഗീകൃത ബാങ്കുകളിലൊന്ന് മുഖേന മന്ത്രാലയത്തിന്‍റെ ബാങ്ക് അക്കൗണ്ടിൽ ഓരോ ജീവനക്കാരനും 3,000 ദിർഹം ബാങ്ക് ഗ്യാരണ്ടി നൽകണം. ജോലി പെർമിറ്റിന് അപേക്ഷിക്കുമ്പോൾ ആവശ്യമായ പ്രൊഫഷണൽ യോഗ്യതയോ വിദ്യാഭ്യാസ യോഗ്യതയോ ഉണ്ടായിരിക്കണമെന്നും അധികൃതർ വ്യക്തമാക്കി.

അതേസമയം, ആറ് മാസത്തിലധികം യുഎഇയ്ക്ക് പുറത്ത് താമസിച്ചതിന്റെ പേരില്‍ വിസ റദ്ദായവര്‍ക്ക് പുതിയ നിയമപ്രകാരം അതേ വിസയില്‍ തന്നെ രാജ്യത്തേക്ക് മടങ്ങിയെത്താം. ഇതിനായി അവര്‍ക്ക് റീഎന്‍ട്രിയ്ക്ക് അപേക്ഷ നല്‍കാനാവും. എന്നാൽ യുഎഇക്ക് പുറത്ത് 6 മാസത്തിൽ കൂടുതൽ തങ്ങിയവർ വീസ കാലാവധി തീരുന്നതിന് 2 മാസം മുൻപെങ്കിലും തിരിച്ചുവരാനുള്ള (റീ എൻട്രി) അപേക്ഷ സമർപ്പിക്കണം.

അപേക്ഷിച്ച തീയതി മുതൽ വീസയ്ക്ക് 60 ദിവസമെങ്കിലും സാധുത ഉണ്ടായിരിക്കണം. വിദേശത്ത് നിന്നാണ് അപേക്ഷിക്കേണ്ടത്. റീ–എൻട്രി അനുമതി ലഭിച്ചാൽ 30 ദിവസത്തിനകം രാജ്യത്ത് പ്രവേശിക്കണമെന്നും ഐസിപി വിശദീകരിച്ചു. എന്നാല്‍ രാജ്യത്തിന് പുറത്ത് തങ്ങേണ്ടി വന്ന കാരണം വിശദീകരിക്കുകയും ഒപ്പം കാലാവധി കഴിഞ്ഞും യുഎഇക്ക് പുറത്ത് താമസിച്ച കാലയളവ് കണക്കാക്കി പിഴ അടയ്ക്കുകയും വേണം.