കുവൈറ്റിലുണ്ടായ വാഹനാപകടത്തില്‍ കോട്ടയം സ്വദേശിയായ യുവാവ് മരിച്ചു. കല്ലറ പെരുന്തുരുത്ത് തെക്കെടേത്ത് പരേതനായ സെബാസ്റ്റ്യന്റെ മകന്‍ റോബിറ്റ് സെബാസ്റ്റിയന്‍ (36) ആണ് മരിച്ചത്. കുവൈറ്റില്‍ വ്യാഴാഴ്ച്ച രാവിലെയാണ് അപകടമുണ്ടായത്.

നൈറ്റ് ഡ്യൂട്ടി കഴിഞ്ഞ് താമസ സ്ഥലത്തേക്ക് വരുമ്പോളാണ് അപകടത്തില്‍പെട്ടത്. ബസിറങ്ങി താമസസ്ഥലത്തേക്കു നടക്കുമ്പോള്‍ അജ്ഞാതവാഹനമിടിച്ചു തെറിപ്പിക്കുകയായിരുന്നുവെന്ന് ബന്ധുക്കള്‍ പറഞ്ഞു. വാഹനം കണ്ടെത്താന്‍ പോലീസ് അന്വേഷണം നടക്കുന്നുണ്ട്.

മൃതദേഹം നാട്ടിലെത്തിക്കുന്നതിനുള്ള നടപടികള്‍ സ്വീകരിച്ചിട്ടുണ്ട്. മാതാവ് റോസമ്മ. ഭാര്യ രേഷ്മയും കുവൈറ്റില്‍ ജോലി നോക്കുകയാണ്. റോബിന്‍ (ഇസ്രായേല്‍), ബോബി എന്നിവര്‍ സഹോദരങ്ങളാണ്.