എഞ്ചിനിൽ നിന്ന് പുക വരുന്നത് കണ്ടതിനെ തുടർന്ന് ആണ് സലാം എയർ വിമാനത്തിന്റെ അത്ര മുടങ്ങിയത് . ഇന്നലെ രാത്രി ബംഗ്ലാദേശിലെ ചിറ്റഗോംഗിൽ നിന്ന് മസ്‌കറ്റിലേക്ക് പോയ സലാം എയർ വിമാനമാണ് എഞ്ചിനിൽ പുക കണ്ടതോടെ നാഗ്പൂർ വിമാനത്താവളത്തിൽ സുരക്ഷിതമായി ഇറക്കിയത്. ബംഗ്ലാദേശിൽ നിന്ന് പറന്നുയർന്ന വിമാനത്തിൽ 200 ഓളം യാത്രക്കാരും ഏഴ് ജീവനക്കാരും ഉണ്ടായിരുന്നുവെന്ന് ഉദ്യോഗസ്ഥർ പറഞ്ഞു.

“എഞ്ചിനിൽ നിന്ന് പുക വരുന്നത് പൈലറ്റ് കണ്ടെത്തിയതിനെത്തുടർന്ന് സലാം എയർ വിമാനം ഇന്നലെ രാത്രി നാഗ്പൂർ വിമാനത്താവളത്തിൽ അടിയന്തര ലാൻഡിംഗ് നടത്തി. വിമാനത്തിൽ 200 ഓളം യാത്രക്കാരും ഏഴ് ജീവനക്കാരുമാണ് ഉണ്ടായിരുന്നത്. യാത്രക്കാരും ജീവനക്കാരും സുരക്ഷിതരാണ്. എയർപോർട്ട് ഉദ്യോഗസ്ഥർ പറഞ്ഞു.

അതേസമയം ഫെബ്രുവരി 27 ന് പക്ഷി ഇടിച്ചതിനെ തുടർന്ന് ഇൻഡിഗോ വിമാനം അടിയന്തിരമായി നിലത്തിറക്കിയിരുന്നു. സൂറത്തിൽ നിന്ന് ഡൽഹിയിലേക്ക് പോവുകയായിരുന്ന വിമാനമാണ് അടിയന്തിരമായി അഹമ്മദാബാദ് വിമാനത്താളത്തിൽ ലാൻഡ് ചെയ്യ്തത്. പ്രാഥമിക പരിശോധനയിൽ വിമാനത്തിന്റെ എഞ്ചിന്റെ ഫാൻ ബ്ലേഡുകൾക്ക് കേടുപാടുകൾ സംഭവിച്ചതായി കണ്ടെത്തിയിരുന്നു. രണ്ടാം എഞ്ചിന്റെ ഫാൻ ബ്ലേഡുകൾക്കാണ് ക്ഷതമേറ്റിരുന്നത്. ആളപായമുണ്ടായിരുന്നില്ല.

നേരത്തെ കോഴിക്കോട് നിന്ന് ദമാമിലേക്ക് യാത്ര തിരിച്ച എയർ ഇന്ത്യ എക്‌സ്പ്രസ് വിമാനം തിരുവനന്തപുരത്ത് ഇറക്കിയിരുന്നു. ടേക്ക് ഓഫ് ചെയ്യുന്നതിനിടയിൽ സാങ്കേതിക തകരാർ സംഭവിച്ചതിനെ തുടർന്നായിരുന്നു അടിയന്തിര ലാൻഡിംഗ്. തകരാർ പരിഹരിച്ച ശേഷം വിമാനം ദമാമിലേക്ക് തിരിച്ചു

പക്ഷിയിടിച്ചതിനെ തുടർന്ന് ഭുവനേശ്വറിൽ എയർ ഏഷ്യ വിമാനം അടിയന്തരമായി നിലത്തിറക്കി. ഭുവനേശ്വറിലെ ബിജു പട്നായിക് അന്താരാഷ്ട്ര വിമാനത്താവളത്തിലാണ് അടിയന്തരമായി വിമാനം ഇറക്കിയത്. ഭുവനേശ്വറിൽ നിന്ന് പറന്നുയർന്നതിന് പിന്നാലെയാണ് വിമാനത്തിൽ പക്ഷിയിടിച്ചത്.

പുനെയിലേക്കുള്ള വിമാനമാണ് അടിയന്തര ലാൻഡിങ് നടത്തിയത്. വിമാനത്തിന് കാര്യമായ കേടുപാടുകൾ സംഭവിച്ചിട്ടില്ലെന്ന് അധികൃതർ വ്യക്തമാക്കി. വിശദ പരിശോധനയ്ക്ക് പിന്നാലെ വിമാനത്തിന് ടേക്ക് ഓഫിന് അനുമതി നൽകി.

സമീപ ദിവസങ്ങളിൽ അടിയന്തിരമായി ലാൻഡ് ചെയ്യുന്ന നാലാമത്തെ സംഭവമാണിത്. സൂററ്റ് – ഡൽഹി ഇൻഡിഗോ വിമാനം, കൊച്ചി – ഡൽഹി ഇൻഡിഗോ വിമാനം, കോഴിക്കോട് – ദമാം എയര്‍ ഇന്ത്യ എക്‌സ്പ്രസ് വിമാനം എന്നിവയാണ് ഈ ദിവസങ്ങളിൽ എമർജൻസി ലാൻഡിങ് നടത്തിയത്.