പണ്ടുതൊട്ടേ മലയാളികള്‍ക്ക് ആഭരണങ്ങളോട് പ്രത്യേക താല്‍പര്യമാണ്.

പുതിയ ഡിസൈനുകള്‍ ശ്രദ്ധിക്കാത്ത സ്ത്രീകളും അപൂര്‍വമായിരിക്കും.

പക്ഷേ ആരും ഇതുവരെ കണ്ടിട്ടില്ലാത്ത മോതിരം നിര്‍മിച്ചു കൗതുകം സൃഷ്ടിക്കുകയാണ് തിരുവനന്തപുരം സ്വദേശി ഇ.രാജഗോപാല്‍.

വെറും മോതിരമല്ല, അഴിച്ചെടുക്കാനാവും, തിരികെ അതിനെ മോതിരരൂപത്തിലാക്കാന്‍ അത്ര എളുപ്പം കഴിയാത്തൊരു അദ്ഭുതമാണ് ഇന്ത്യന്‍ വിസ്മയം എന്നു പേരിട്ട ഈ മോതിരം.

അഞ്ചു വളയങ്ങളായാണ് മോതിരം നിര്‍മിച്ചിരിക്കുന്നത്. അതായത് അഞ്ചു ചെറിയ മോതിരങ്ങള്‍.

ഓരോ മോതിരത്തിലും ഇന്ത്യയെന്ന വാക്കിലെ അഞ്ച് അക്ഷരങ്ങള്‍.

കൂടാതെ ഭാരതത്തിന്റെ ദേശീയ ചിഹ്നങ്ങളും പൂര്‍ണമായി മോതിരത്തില്‍ അടയാളപ്പെടുത്തിയിട്ടുണ്ട്. രാജ്യത്തിന്റെ അഖണ്ഡതയെയാണ് അഞ്ചു വളയങ്ങള്‍ സംയോജിക്കുന്നതിലൂടെ ശില്പി ആവിഷ്‌കരിച്ചിരിക്കുന്നത്. 20 ഗ്രാമാണ് ഈ പഞ്ചലോഹ മോതിരത്തിന്റെ തൂക്കം.

ചങ്ങലപോലെ കിടക്കുന്ന അഞ്ചു മോതിരങ്ങള്‍ കൂട്ടിയോജിപ്പിക്കുമ്പോള്‍ ഇന്ത്യയെന്ന വാക്കു പൂര്‍ണമാവുന്നു. അതിനോടൊപ്പം ത്രിവര്‍ണ പതാകയും മുന്‍നിരയിലെത്തും. 

25 വര്‍ഷമായി ആഭരണ ഡിസൈനിങ് മേഖലയില്‍ പ്രവര്‍ത്തിക്കുന്ന രാജഗോപാലിനു ഹിമാലയ യാത്രയ്ക്കിടെയാണ് ഇന്ത്യന്‍ വിസ്മയം എന്ന മോതിരത്തിന്റെ ആശയം ലഭിക്കുന്നത്. അടുത്ത വിസ്മയത്തെക്കുറിച്ചുള്ള ആലോചന ആരംഭിച്ചിട്ടുണ്ടെങ്കിലും അതു മോതിരമായിരിക്കില്ല എന്നു രാജഗോപാല്‍ പറയുന്നു. പ്രധാനമന്ത്രിക്കു സ്വന്തം കൈകൊണ്ടു മോതിരം സമ്മാനിക്കണമെന്നാണ് ഈ കലാകാരന്റെ ആഗ്രഹം.