പൊതുവേ ചിത്രശലഭങ്ങളുടെ ചിറകുകള്‍ സുതാര്യമാണ്. ഭക്ഷണം ചവയ്ക്കുന്നതിനുള്ള കഴിവില്ലാത്തതിനാല്‍ ഇവ ദ്രവ രൂപത്തിലുള്ള ഭക്ഷണം മാത്രമേ കഴിക്കുകയുള്ളു. സ്‌ട്രോ പോലെയുള്ള മുന്‍കാലുകള്‍ ഉപയോഗിച്ച് പൂമ്പൊടി, സസ്യ ദ്രവങ്ങള്‍, ചില കറകള്‍ എന്നിവ ഊറ്റിക്കുടിക്കുകയാണ് ചെയ്യുന്നത്. മധുരം മാത്രം കുടിച്ചു ജീവിക്കാനാവില്ല; മറ്റു മൂലകങ്ങളും വേണം. ഇതിനായി ഭൂമിയില്‍ കെട്ടി നില്‍ക്കുന്ന വെള്ളവും അല്ലെങ്കില്‍ മരത്തിലും ഇലകളിലും തങ്ങി നില്‍ക്കുന്ന വെള്ളവും കുടിച്ച് ആവശ്യമായ ധാതുലവണങ്ങള്‍ നേടുന്നു.

സ്‌കിപ്പെര്‍ എന്നറിയപ്പെടുന്ന ചിത്രശലഭങ്ങള്‍ക്കു വളരെ വേഗത്തില്‍ പറക്കാന്‍ സാധിക്കും. മറ്റു ചിത്രശലഭങ്ങള്‍ മണിക്കൂറില്‍ 8 മുതല്‍ 20 കിലോ മീറ്റര്‍ വേഗത്തില്‍ പറക്കുമ്പോള്‍, സ്‌കിപ്പെര്‍ ചിത്രശലഭങ്ങള്‍ക്കു മണിക്കൂറില്‍ 60 കിലോമീറ്ററാണ് വേഗം. ഇതു ശരാശരി ഒരു കുതിരയുടെ വേഗത്തിനേക്കാള്‍ കൂടുതലാണ്.

ക്വീന്‍ അലക്‌സാണ്ട്ര ബേര്‍ഡ്  വിങ് ആണ് ഏറ്റവും വലിയ ചിത്രശലഭം.പെണ്‍ ശലഭങ്ങള്‍ക്ക് ആണ്‍ ശലഭങ്ങളെക്കാള്‍ വലുപ്പം ഉണ്ട്. ഇവ ചിറകു വിരിക്കുമ്പോള്‍ ഏകദേശം 28 സെന്റീ മീറ്റര്‍ മുതല്‍ 31 സെന്റി മീറ്റര്‍ വരെ നീളം വരും. ന്യൂ ഗിനിയായിലെ മഴക്കാടുകളില്‍ മാത്രമാണ് ഇവ കാണപ്പെടുന്നത്. വെസ്‌റ്റേണ്‍ പിഗ്മി ബ്ലൂ ആണ് ഏറ്റവും ചെറിയ ശലഭം. ഇതു ചിറകു വിരിക്കുമ്പോള്‍ രണ്ട് സെന്റ്റി മീറ്ററില്‍ താഴെ മാത്രമേ നീളം ഉണ്ടാവൂ.

മൊണാര്‍ക്ക് എന്ന ചിത്രശലഭങ്ങള്‍ ദേശാടനത്തിനു പ്രസിദ്ധമാണ്. ഇവ ഏകദേശം 4000 കിലോ മീറ്റര്‍ സഞ്ചരിച്ചു മുട്ടയിടുന്നു. പിന്നീട് മുട്ട വിരിഞ്ഞു ശലഭങ്ങളായി ഇവ തിരിച്ചു പറന്നു തങ്ങളുടെ അമ്മമാര്‍ പുറപ്പെട്ട സ്ഥലത്തു വന്നു ചേരുന്നു.

ചിത്രശലഭങ്ങള്‍ തണുത്ത രക്ത ജീവികള്‍ ആയതിനാല്‍ ഇവ രാത്രികളിലും മഴക്കാറുള്ള സമയങ്ങളിലും പുറത്തിറങ്ങാറില്ല. ഈ സമയങ്ങളില്‍ ഇവ വിശ്രമിക്കുന്നു. ഇവയുടെ കണ്ണുകള്‍ എപ്പോഴും തുറന്നിരിക്കുന്നു. മാത്രമല്ല ഇവയ്ക്കു കണ്‍ പോളകളുമില്ല. ചിത്രശലഭങ്ങള്‍ വിശ്രമിക്കാറുണ്ടെങ്കിലും മനുഷ്യരെ പോലെ ഉറങ്ങാറില്ല എന്നു വേണം കരുതാന്‍.