പ്രധാനമന്ത്രി മോദിയുടെ ഫോട്ടാഗ്രഫി വൈദഗ്ദ്ധ്യം വിളിച്ചറിയിക്കുന്ന പ്രകൃതി ദൃശ്യങ്ങള്‍
പ്രധാനമന്ത്രി നരേന്ദ്ര മോദി കാമറകള്‍ക്കു മുന്നില്‍ പ്രത്യക്ഷപ്പെടുമ്പോള്‍ പാലിക്കുന്ന സൂക്ഷ്മതയും ശ്രദ്ധയും വളരെ പ്രസിദ്ധമാണ്. ഏതു പരിപാടിയില്‍ പങ്കെടുക്കുമ്പോഴും കാമറ എവിടെയാണുള്ളതെന്ന് മോദിക്കറിയാം, അതിനനുസരിച്ച് പെരുമാറാനും അറിയാം. എന്നാല്‍ മോദി എന്ന ഫോട്ടോഗ്രാഫറെ ലോകം വേണ്ടത്ര മനസ്സിലാക്കിയിട്ടില്ല. താന്‍ പകര്‍ത്തിയ ചിത്രങ്ങള്‍ ട്വിറ്ററിലൂടെ പങ്കുവെച്ചിരിക്കുകയാണ് ഇപ്പോള്‍ മോദി.
സിക്കിമിലേക്കുള്ള ആകാശ യാത്രയില്‍ മോദി പകര്‍ത്തിയ നാലു ചിത്രങ്ങളാണ് ട്വിറ്ററില്‍ പങ്കുവെച്ചിരിക്കുന്നത്. 'സ്വച്ഛവും മനോഹരവും! സിക്കിമിലേക്കുള്ള യാത്രയില്‍ പകര്‍ത്തിയത്.. ഏറെആകര്‍ഷകവും അവിശ്വസനീയവും!' എന്ന കുറിപ്പോടെയാണ് മോദി ചിത്രങ്ങള്‍ പോസ്റ്റ് ചെയ്തിരിക്കുന്നത്. ആകാശത്തുനിന്നുള്ള ഭൂഭാഗ ദൃശ്യങ്ങളാണ് ഇവ.
മുമ്പും ചില പൊതു പരിപാടികളില്‍ പങ്കെടുക്കുന്നതിനിടെ മോദി കാമറയുമായി എത്തിയിട്ടുണ്ട്. 2016-ല്‍ ഛത്തീസ്ഗഡിലെ നന്ദന്‍ വന്‍ മൃഗസംരക്ഷണ കേന്ദ്രം സന്ദര്‍ശിക്കുന്നതിനിടെ കടുവയുടെ ചിത്രങ്ങള്‍ പകര്‍ത്തുന്ന മോദിയുടെ ചിത്രം സോഷ്യല്‍ മീഡിയയില്‍ വൈറലായിരുന്നു. കമ്പിയഴികള്‍ക്കപ്പുറം നില്‍ക്കുന്ന കടുവയുടെ സമീപത്തുനിന്ന് ചിത്രമെടുക്കുന്ന മോദിയുടെ ചിത്രങ്ങളാണ് അന്ന് പ്രചരിച്ചത്.
പക്യോങ്ങിലെ പുതിയ വിമാനത്താവളം ഉദ്ഘാടനം ചെയ്യുന്നതിനാണ് മോദി സിക്കിമിലേക്ക് പോയത്. സമുദ്രനിരപ്പില്‍ നിന്ന് 4,500 അടി ഉയരത്തില്‍ സ്ഥിതിചെയ്യുന്ന ഈ വിമാനത്താവളം സിക്കിമിലെ ആദ്യ വിമാനത്താവളമാണ്.
https://www.facebook.com/Malayalivartha
