എത്ര സംഘര്‍ഷഭരിതമായ മനസിനെയും ശാന്തമാക്കാന്‍ കഴിയുന്ന ഒന്നാണ് കൊച്ചുകുട്ടികളോടൊപ്പമുള്ള സമയം ചെലവഴിക്കല്‍. ഏത് ശിലാഹൃദയത്തെയും അലിയിക്കാനുള്ള കഴിവും അതിനുണ്ട്. സമാനമായ രീതിയില്‍ ഒരു അപ്പൂപ്പനും കൊച്ചുമോളും തമ്മിലുള്ള രസകരമായ ചില നിമിഷങ്ങളാണ് ഇപ്പോള്‍ നവമാധ്യമങ്ങളില്‍ ചിരിയുണര്‍ത്തി വൈറലായിരിക്കുന്നത്.

ഒരു അപ്പൂപ്പനും കൊച്ചുമോളും തമ്മിലുള്ള രസകരമായ വഴക്കിന്റെ വിഡിയോയാണ് പ്രചരിച്ചുകൊണ്ടിരിക്കുന്നത്. വീടിന്റെ അടുക്കള ഭാഗത്ത് വൃത്തിയായി അടുക്കിവച്ചിരുന്ന തേങ്ങകള്‍ മുറ്റത്ത് ചിതറി കിടക്കുന്നത് കണ്ടപ്പോഴേ ആരാണ് അതിനു പിന്നിലെന്ന് മുത്തശ്ശന് മനസ്സിലായി. കുസൃതിക്കാരിയായ കൊച്ചുമോളുടെ ചെയ്തി ആണ് അതെന്നറിഞ്ഞ മുത്തശ്ശന്‍ അവളെ ഒന്നു വിരട്ടി നോക്കാമെന്ന് തീരുമാനിക്കുന്നു.

എന്താടീ നിന്റെ ഉദ്ദേശം പെറുക്കി എടുക്കെടീ തേങ്ങ മുഴുവനും എന്ന് ആക്രോശിച്ച മുത്തശ്ശനോട്, ഓ...പിന്നെ ഇതൊക്കെ കുറേ കണ്ടിട്ടുണ്ട് എന്ന മട്ടില്‍ അതിന്റെ ഇരട്ടി ഉച്ചത്തില്‍ തിരിച്ച് ആക്രോശിക്കുകയാണ് പേരക്കുട്ടി ചെയ്തത്. കപടദേഷ്യത്തോടെ മുത്തശ്ശന്‍ വീണ്ടും വീണ്ടും പറഞ്ഞെങ്കിലും കുട്ടി അനുസരിക്കാന്‍ കൂട്ടാക്കുന്നില്ല.

ഇത് കണ്ട് അമ്മൂമ്മ ഇടപെടുന്നു. അമ്മൂമ്മ സൗമ്യമായി പറഞ്ഞുനോക്കി. ആ തേങ്ങയെല്ലാം എവിടെ നിന്നാണോ വലിച്ചു നിലത്തിട്ടത് അവിടേക്ക് തിരിച്ചെടുത്തിടാന്‍...! പക്ഷേ അവള്‍ അമ്പിനും വില്ലിനും അടുത്തില്ലെന്നു മാത്രമല്ല, ഇനി എന്നെ മര്യാദ പഠിപ്പിക്കാന്‍ വന്നാല്‍ എന്താണ് സംഭവിക്കുക എന്ന് ഞാന്‍ കാട്ടിത്തരാം എന്നു പറയുന്ന്തു പോലെ ഒന്നു രണ്ടു തേങ്ങ കൂടി വലിച്ച് പുറത്തേക്ക് എറിയുന്നു.

അങ്ങനെ മര്യാദ പഠിപ്പിക്കാന്‍ ശ്രമിക്കുന്ന അമ്മൂമ്മയ്ക്കും അപ്പൂപ്പനും തിരിച്ച് പണി കൊടുത്ത് താരമാവുകയാണ് ആ മിടുക്കി.തേങ്ങയെടുത്ത് മുറ്റത്തേക്ക് വലിച്ചെറിയുന്ന രംഗത്തോടെയാണ് വീഡിയോ അവസാനിക്കുന്നത്.