ഹോളിവുഡ് സൂപ്പര്‍സ്റ്റാര്‍ വില്‍ സ്മിത് തന്റെ അമ്പതാം പിറന്നാള്‍ ആഘോഷം വേറിട്ടതാക്കി. അമേരിക്കയിലെ അരിസോണയിലുള്ള ഗ്രാന്‍ഡ് കന്യാന്‍ മലയിടുക്കില്‍ ബഞ്ചി ജംപിംഗ് നടത്തിയാണ് താരം ജീവിതത്തില്‍ ഹാഫ് സെഞ്ചുറി തികച്ചതിന്റെ ആഘോഷം കെങ്കേമമാക്കിയത്.

ഭൂനിരപ്പില്‍ നിന്ന് 550 അടി ഉയരത്തിലായിരുന്ന ഹെലികോപ്റ്ററില്‍ നിന്നായിരുന്നു സാഹസികച്ചാട്ടം. ഇന്റര്‍നാഷണല്‍ അഡ്വക്കസി ഗ്രൂപ്പായ ഗ്ലോബല്‍ സിറ്റിസണ്‍-ന്റെ പ്രവര്‍ത്തനങ്ങളെകുറിച്ച് അവബോധം ഉണ്ടാക്കുവാനും അവരുടെ വിദ്യാഭ്യാസ കാംപെയിനുകള്‍ക്കായി ധനം സ്വരൂപിക്കുന്നതിലേക്കുമായി പ്രസ്തുത സ്റ്റണ്ട് ലൈവ് സ്ട്രീം ചെയ്തിരുന്നു.

ഭാര്യ ജാഡ പിന്‍കെറ്റ് സ്മിത്, മകള്‍ വില്ലോ സ്മിത്, ആണ്‍മക്കളായ ജാഡെന്‍ സ്മിത്, ട്രേയ് എന്നിവരും ഏതാനും ആരാധകരും സംഭവത്തിനു ദൃക്‌സാക്ഷികളായി. വില്‍ സ്മിതിന്റെ ഔദ്യോഗിക യൂട്യൂബ് ചാനലാണ് സംഭവത്തിന്റെ ദൃശ്യങ്ങള്‍ പുറത്തുവിട്ടത്.

ചാടുന്നതിനു തൊട്ടുമുമ്പ് ആശങ്കാകുലനായാണ് സ്മിത് വീഡിയോ ദൃശ്യങ്ങളില്‍ കാണപ്പെടുന്നതെങ്കിലും ചാടിക്കഴിഞ്ഞു താരം ആത്മവിശ്വാസം പ്രകടിപ്പിക്കുന്നതും വീഡിയോയില്‍ കാണാം. സംഭവം കൊള്ളാമെന്നും ഇനിയും ഇതു പ്രതീക്ഷിക്കാമെന്നും താരം ചാട്ടത്തിനു ശേഷം പ്രതികരിച്ചു.

ഇലാസ്തികതയുള്ള കേബിളുമായി ബന്ധിച്ചശേഷം ഉയരങ്ങളില്‍ നിന്നു ചാടുന്നതാണ് ബഞ്ചി ജംപിംഗ്. ഇന്ത്യയിലെ നിരവധി വിനോദസഞ്ചാര കേന്ദ്രങ്ങളില്‍ ബഞ്ചി ജംപിംഗിനു സൗകര്യമുണ്ട്.

സാധാരണയായി മലമുകളിലോ ഉയര്‍ന്ന കെട്ടിടങ്ങളിലോ ഉള്ള പ്ലാറ്റ്‌ഫോമില്‍ നിന്നാണ് ചാട്ടം. ഇതിനു പുറമേ ബലുണില്‍ നിന്നും ഹെലികോപ്റ്ററില്‍ നിന്നും ബഞ്ചി ജംപിംഗ് നടത്താറുണ്ട്. ഹെലികോപ്റ്ററില്‍ നിന്നുള്ള ബഞ്ചി ജംപിംഗ് ഏറ്റവും അപകട സാധ്യതയുള്ളതായാണ് വിലയിരുത്തപ്പെടുന്നത്.