ജനിച്ചത് നായ ആയിട്ടാണെങ്കിലെന്താ .. തലയിൽ വരച്ചത് രാജയോഗമാണെങ്കിലോ? അത്തരം ഭാഗ്യമുള്ള കൂട്ടത്തിൽ പെട്ടതാണ്  'കിങ് ചാള്‍സ് സ്പാനിയല്‍'. ഇംഗ്ലണ്ടിലെ ചാള്‍സ് രണ്ടാമന്റെ(1630-1685) അരുമകളായിരുന്നത്രെ 'കിങ് ചാള്‍സ് സ്പാനിയല്‍' എന്ന വർഗ്ഗത്തിൽ പെട്ട നായ്ക്കുട്ടികൾ. അതിന് മുന്‍പ് മേരി ട്യൂഡറുടെ(1516-1558) കാലത്തും ഇത്തരം നായ്ക്കൾ രാജകൊട്ടാരത്തിൽ ഉണ്ടായിരുന്നു. രാജകൊട്ടാരങ്ങളുടെ അകത്തളങ്ങളിൽ എപ്പോൾ വേണമെങ്കിലും ഒരു വിലക്കുമില്ലാതെ കടന്നു ചെല്ലാനുള്ള അവകാശം ഇവർക്ക് മാത്രമായിരുന്നു.

അന്നത്തെക്കാലത്ത് രാജാവിനോളംതന്നെ ജനങ്ങള്‍ ഭയക്കുകയും ബഹുമാനിക്കുകയും ചെയ്തിരുന്ന വർഗ്ഗമാണ് ഇവയുടേത് .. രാജാക്കന്മാരെപോലെ തന്നെ സുഖ ഭക്ഷണം താമസം എല്ലാം തികച്ചും റോയൽ രീതിയിൽ തന്നെ

കിങ് ചാള്‍സ് സ്പാനിയലിനെ ഇംഗ്ലീഷ് ടോയ് സ്പാനിയല്‍ എന്നുംവിളിക്കാറുണ്ട്. . 1903ൽ കെന്നല്‍ ക്ലബ് നാല് വ്യത്യസ്ത സ്പാനിയല്‍ കുടുംബങ്ങളെ ഒന്നാക്കി കിങ് ചാള്‍സ് സ്പാനിയല്‍ എന്ന ഒറ്റ വർഗ്ഗത്തിന് കീഴിലാക്കി. രാജവംശത്തില്‍പ്പെട്ടവര്‍ പരസ്പ്പരം സമ്മാനമായി നൽകിയിരുന്നത് പോലും ഇത്തരം നായ്ക്കളെ ആയിരുന്നു.

മുന്‍കാല പെയിന്റിങ്ങുകളിലും സാഹിത്യങ്ങളിലും എല്ലാം ഒരുകാലത്തു നിറഞ്ഞു നില്ക്കാൻ ഭാഗ്യം സിദ്ധിച്ച ഇവയെ കുറിച്ച് സാമുവല്‍ പെപ്പീസിന്റെ ഡയറിയിലുണ്ട് .

വിക്ടോറിയ രാജ്ഞിയുടെ അരുമയായ 'ഡാഷ്' എന്ന് പേരുള്ള നായ ചാള്‍സ് സ്പാനിയല്‍ ആയിരുന്നു. ഏറിയാൽ അഞ്ചോ ആറോ കിലോ തൂക്കവും 23-28 സെന്റിമീറ്റര്‍ ഉയരവുംമാത്രമേ ഇവക്ക് ഉണ്ടാകൂ . കറുപ്പ്, തവിട്ട്, കറുപ്പിനൊപ്പം തവിട്ട് നിറത്തില്‍ പാട്, വെള്ളയും കറുപ്പും, ചുവപ്പ് എന്നീ നിറങ്ങളാണ് പൊതുവെ കാണപ്പെടാറുള്ളത് . വലിയ കറുത്ത കണ്ണുകളും ചെറിയ മൂക്കും നല്ല വലിപ്പമുള്ള തലയും വായ്ക്ക് ചുറ്റുമുള്ള കറുത്ത തൊലിയും എല്ലാം കൂടി ഓമനത്തം തുളുമ്പുന്ന ഭാവമാണ് ഇവക്ക് .വാലിന് നീളം ഇല്ലെങ്കിലും നീണ്ട രോമങ്ങളാണ് ഉള്ളത് ഇത് ബ്രെഷ് ചെയ്തിടുമ്പോൾ നല്ല ചന്തമാണ്‌ എന്ന് നായ പ്രേമികൾ പറയുന്നു.

ഇത്രയൊക്കെ ആണെങ്കിലും കാവൽ ജോലിക്കൊന്നും ഇവയെ കിട്ടില്ല. കുറയ്ക്കും പാട്ടി കടിക്കില്ല എന്ന പഴഞ്ചോലിന്റെ ഉത്തമ ഉദാഹരണങ്ങളാണ് ഇവ എന്ന് പറയാം. വീട്ടിനുള്ളിൽ കുടുംബാംഗങ്ങളോടൊപ്പം കളിച്ചു ഉല്ലസിച്ചു ജീവിക്കാനാണ് ഇവക്കിഷ്ടം.