ലില്ലയ്ക്ക് കള്ളു ചെത്തു കണ്ട് 'തലയ്ക്കു പിടിച്ചു', പിന്നെ മടിച്ചില്ല തെങ്ങില്‍ കയറി നിന്നുകൊണ്ടെടുത്തു ഒരു സെല്‍ഫി !
കൊച്ചിയിലെ കേരള ട്രാവല്‍ മാര്‍ട്ടില്‍ പങ്കെടുക്കാനാണ് വിദേശ ടൂര്‍ ഓപ്പറേറ്റര്‍ ഹംഗറി സ്വദേശിനി ലില്ല കേരളത്തിലെത്തിയത്. ഇതിനിടെയാണ് കുമരകത്ത് എത്തിയതും വലവീശലും കള്ളു ചെത്തും ലില്ലയുടെ ശ്രദ്ധയില്‍പെട്ടതും. കള്ളു ചെത്തും വല വീശലും കണ്ട് 'ലഹരി പിടിച്ച് ' ലില്ല ഉടന്‍ തന്നെ തെങ്ങില്‍ കയറി ഒരു സെല്‍ഫിയുമെടുത്തു.
കേരള ട്രാവല്‍ മാര്‍ട്ട് കഴിഞ്ഞു വിദേശ ടൂര്‍ ഓപ്പറേറ്റര്‍മാര്‍ നേരെ എത്തിയത് കുമരകത്തേക്കാണ്. ട്രാവല്‍മാര്‍ട്ടില്‍ 70 രാജ്യങ്ങളിലെ ടൂര്‍ ഓപ്പറേറ്റര്‍മാര്‍ എത്തി. അതില്‍ അഞ്ച് രാജ്യങ്ങളുടെ പ്രതിനിധികള്‍ ഒഴികെ 95 പേര്‍ കുമരകത്ത് എത്തി. ഇവര്‍ക്കൊപ്പം മറ്റു സംസ്ഥാനങ്ങളില്‍ നിന്നുള്ള പ്രതിനിധികളുമുണ്ട്. പലരും കുമരകത്തു വരുന്നത് ആദ്യം. ഇവരുടെ വരവു കുമരകത്തേക്കു കൂടുതല്‍ വിദേശ വിനോദ സഞ്ചാരികളെ എത്തിക്കുമെന്നാണു പ്രതീക്ഷ.
ട്രാവല്‍ മാര്‍ട്ടില്‍ കുമരകത്തെ ഉത്തരവാദിത്ത ടൂറിസം ചര്‍ച്ചയായിരുന്നു. വിദേശ ട്രാവല്‍ ഏജന്‍സികളെ ആകര്‍ഷിച്ചതില്‍ ഉത്തരവാദിത്ത ടൂറിസം പ്രധാന ഘടകമായി. സംഘം കുമരകത്തെ ഗ്രാമങ്ങള്‍ സന്ദര്‍ശിച്ച് വല വീശല്‍, ഓല മെടയല്‍, പായ് നെയ്ത്ത്, കള്ള് ചെത്ത് എന്നിവ കണ്ട് ആസ്വദിച്ചു. ഉത്തരവാദിത്ത ടൂറിസം സംസ്ഥാന കോ-ഓര്‍ഡിനേറ്റര്‍ കെ.രൂപേഷ്‌കുമാര്‍, കുമരകം കോ-ഓര്‍ഡിനേറ്റര്‍ ഭഗത് സിങ് എന്നിവര്‍ വിശദീകരിച്ചു.
https://www.facebook.com/Malayalivartha
