4 അടി നീളമുള്ള പാമ്പിനെ കാറിന്റെ ഡിക്കിയില് കണ്ടെത്തി
കാറിന്റെ ഡിക്കിയില് കയറിയ 4 അടി നീളമുള്ള പാമ്പിനെ വിദഗ്ധമായി പുറത്തെടുക്കുന്ന വിഡിയോയാണ് സോഷ്യല് മീഡിയയില് ഇപ്പോള് വൈറലാകുന്നത്. റോഡിനരികില് പാര്ക്കുചെയ്തിരുന്ന കാറിനുള്ളില് പാമ്പുണ്ടെന്ന് മനസിലായെങ്കിലും എവിടെയാണ് ഒളിച്ചിരിക്കുന്നതെന്ന് മനസിലാക്കാന് കാറുടമയ്ക്ക് കഴിഞ്ഞിരുന്നില്ല. ഒടുവില് കാര് പരിശോധിക്കുന്നതിനിടെ ഡിക്കിയിലെ സ്പെയര് ടയറിന് കീഴിലായി പാമ്പിരിക്കുന്നത് കണ്ടു. പാമ്പുപിടുത്തക്കാരുടെ സഹായത്തോടെ പാമ്പിനെ പുറത്തെടുത്തെങ്കിലും എങ്ങനെയാണ് അത് ഡിക്കിക്കുള്ളില് എത്തിയതെന്ന ചിന്തയിലാണ് കാറുടമ.സാധാരണ എന്ജിന് ബോണറ്റിനുള്ളിലാണ് പാമ്പിനെ കാണാറുള്ളത്.
കാറില് കുടുങ്ങിയ പാമ്പ് വില്ലനാകുന്നത് ഒരിക്കലെങ്കിലും അനുഭവിച്ചറിയാത്തവര് കുറവായിരിക്കും. ചൂടുള്ള, ഇരുണ്ട ഇടങ്ങള് ഏറെ ഇഷ്ടപ്പെടുന്നവരാണ് പാമ്പുകള്. അതിനാല് തന്നെ എന്ജിന് ബോണറ്റിനടിയില് സുഖ നിദ്രയിലേര്പ്പെട്ടിരിക്കുന്ന പാമ്പുകള് സ്ഥിരം കാഴ്ചയാണ്. എന്ജിന് കംപാര്ട്ട്മെന്റ് വിട്ടു പാമ്പുകള് കാറുകളിലെ മറ്റിടങ്ങളിലേക്ക് അധികം സഞ്ചരിക്കാറില്ല. അപൂര്വ്വമാണെങ്കിലും ഡിക്കികളിലും പാമ്പുകളെ കണ്ടു വരാറുണ്ട്. ഇതൊക്കെയാണെങ്കിലും യാത്രക്കാര് ഇരിക്കുന്ന ഭാഗങ്ങളിലേക്ക് എത്തിനോക്കുന്നതു പോലും പാമ്പുകള്ക്ക് ഇഷ്ടമല്ല. അതുകൊണ്ടു തന്നെ ഒരു പരിധി വരെ ഭയപ്പെടേണ്ട ആവശ്യമില്ല.
വാഹനത്തിന്റെ എന്ജിന്റെ ചൂട് തന്നെയാണ് പാമ്പുകളെ അതിനുള്ളിലേക്ക് ആകര്ഷിക്കുന്നത്. കൂടാതെ വയറിങ്ങിന് ഉപയോഗിക്കുന്ന മെറ്റീരിയല്സും ചിലപ്പോള് ജീവികളെ ആകര്ഷിക്കാറുണ്ട്. കാറില് മുന്ഭാഗത്തുകൂടെ തന്നെ പാമ്പുകള്ക്ക് എന്ജിന് ബേയിലേക്ക് പ്രവേശിക്കാന് സാധിക്കും. ചെറിയ എലികള് ചിലപ്പോഴൊക്കെ വാഹനത്തിന്റ എന്ജിന് ബേയില് കയറാറുണ്ട് അവയെ പിന്തുടര്ന്നും ചിലപ്പോള് പാമ്പു വന്നേക്കാം. അത്ര എളുപ്പമല്ലെങ്കിലും ചില ഘട്ടങ്ങളില് എസി വെന്റുകള് വഴി പാമ്പ് ഇന്റിരീയറിലേക്കും വരാനുള്ള സാധ്യതയുണ്ട്.
നഗരപ്രദേശങ്ങളില് വസിക്കുന്നവരെ സംബന്ധിച്ചിടത്തോളം പാമ്പു ശല്യം ഏറെ അലട്ടുന്നതല്ലെങ്കിലും ഗ്രാമീണ മേഖലകളില് ഇതൊരു വലിയ വിഷയമാണ്. പൊന്തക്കാടുകള് കൂടുതലാകുമെന്നതാണ് ഗ്രാമപ്രദേശങ്ങളില് പാമ്പിന്റെ ഭീഷണി വര്ധിക്കാനുള്ള പ്രധാന കാരണം. കാര് നിര്ത്തിയിടുമ്പോള് വിന്ഡോ ഗ്ലാസുകള് ഉയര്ത്തിയിട്ടുണ്ടെന്നും ഡോര് ലോക്ക് ചെയ്തിട്ടുണ്ടെന്നും ഉറപ്പു വരുത്തുക. പുല്ലുകള് നിറഞ്ഞ പ്രദേശത്തിനു സമീപത്ത് കാര് നിര്ത്തിയിടാതിരിക്കാന് പ്രത്യേകം ശ്രദ്ധിക്കണം.
പാമ്പുകള് കാണാന് സാധ്യതയുള്ള ഒരു സ്ഥലത്തും വാഹനം പാര്ക്ക് ചെയ്യാതിരിക്കുക എന്നത് ഏറ്റവും പ്രാഥമിക കാര്യമാണ്. കാറാണെങ്കില് ഇടയ്ക്കിടെ ബോണറ്റ് തുറന്ന് പരിശോധിക്കുന്നത് നന്നായിരിക്കും. പാര്ക്ക് ചെയ്തിട്ട് പോകുമ്പോള് വാഹനത്തിന്റെ ഡോറുകളും വിന്ഡോകളും അടയ്ക്കാന് ശ്രദ്ധിക്കുക. അഥവാ വാഹനത്തിനുള്ളില് പാമ്പുണ്ടെന്ന് തോന്നുകയാണെങ്കില് സര്വീസ് സെന്ററുകളെയൊ വനപാലകരേയൊ സമീപിക്കാം. ടൂവീലറുകള് നന്നായി പരിശോധിച്ച് യാത്ര ആരംഭിക്കുന്നതാണ് നല്ലത്.
https://www.facebook.com/Malayalivartha
