സോഷ്യല്‍മീഡിയയിലൂടെ സ്വന്തം വികലമനോഭാവങ്ങള്‍ വെളിപ്പെടുത്തുന്നതിന് മുമ്പ് അല്‍പമൊന്ന് ചിന്തിച്ചു നോക്കാന്‍ ചിലരെങ്കിലും മിനക്കെട്ടിരുന്നെങ്കില്‍ അവര്‍ക്കുണ്ടാകുന്ന നാണക്കേട് ഒഴിവാക്കാന്‍ കഴിയുമായിരുന്നു. അതെങ്ങനെ, തലച്ചോറിലെ ചിന്തിക്കുന്ന ഭാഗം ശരിയായി പ്രവര്‍ത്തിക്കുന്നുണ്ടെങ്കില്‍ ഇത്തരം പണിയ്‌ക്കൊന്നും പോകില്ലല്ലോ!

തങ്ങളുടെ സോഷ്യല്‍ മീഡിയാപേജിലൂടെ പ്രമുഖര്‍ പങ്കുവയ്ക്കുന്ന ചിത്രത്തിന് അശ്ലീലം നിറഞ്ഞ കമന്റുകള്‍ പങ്കുവയ്ക്കുന്നത് ചിലര്‍ക്ക് ഹരമാണ്. അത്തരക്കാരുടെ കപടമുഖം ചില താരങ്ങള്‍ സോഷ്യല്‍മീഡിയയില്‍ തുറന്നു കാട്ടാറുമുണ്ട്. ഇപ്പോഴിതാ തനിക്കു നേരെ അശ്ലീലം കലര്‍ന്ന കമന്റ് പാസാക്കിയ ആള്‍ക്ക് നടി തപ്‌സി പന്നു നല്‍കിയ മറുപടിയാണ് സോഷ്യല്‍മീഡിയയില്‍ കൈയടി നേടുന്നത്.

'നിങ്ങളുടെ ശരീരഭാഗങ്ങള്‍ എനിക്ക് ഇഷ്ടമാണ്' എന്നായിരുന്നു അകു പാണ്ഡെ എന്നൊരാള്‍ തപ്‌സിക്ക് നല്‍കിയ കമന്റ്. ഉടന്‍ തന്നെ വന്നു തപ്‌സിയുടെ മറുപടി. 'വൗ.. എനിക്കും എന്റെ ശരീരഭാഗങ്ങള്‍ ഏറെ ഇഷ്ടമാണ്. നിങ്ങള്‍ക്ക് ഏതു ഭാഗമാണ് ഇഷ്ടം. എനിക്ക് ഇഷ്ടം സെറിബ്രമാണ്'.

അകു പാണ്ഡെയുടെ കമന്റും അതിനു നല്‍കിയ മറുപടിയും തപ്‌സി ട്വീറ്റ് ചെയ്തതോടെ സംഭവം താരത്തിന്റെ ആരാധകര്‍ ഏറ്റെടുക്കുകയായിരുന്നു. ട്വീറ്റിന് പ്രതികരണം നല്‍കി നിരവധിയാളുകളാണ് രംഗത്തെത്തിയിരിക്കുന്നത്.