ഒരു ഓട്ടോ ഡ്രൈവറുടെ ജീവിതം പല തരത്തിലുള്ള കഷ്ടപ്പാടുകള്‍ നിറഞ്ഞതാണ്. രാവിലെ മുതല്‍ വൈകുന്നേരം വരെ ജോലി ചെയ്താലും നാമമാത്രമായ തുകയാണ് വരുമാനമായി ലഭിക്കുന്നത് എന്നതാണ് ഇവരുടെ പരാതി.

അതേസമയം, ഇക്കൂട്ടത്തില്‍ വ്യ ത്യസ്തമാണ് ബെംഗളൂരുവിലെ ഓട്ടോ സ്റ്റാന്‍ഡില്‍ ഓടുന്ന സുബ്രമണിയുടെ ജീവിതം. 1.6 കോടിയുടെ ആഡംബര വില്ലയിലാണ് സുബ്രമണിയുടെ ജീവിതം. അതും സമ്പന്നര്‍ മാത്രം താമസിക്കുന്ന വൈറ്റ്ഫീല്‍ഡിലെ ഒരു വില്ലയില്‍.

പെട്ടെന്ന് സമ്പന്നന്‍ ആയതോടെ ആദായനികുതി വകുപ്പിന്റെ കണ്ണിലെ കരടായി മാറിയിരിക്കുകയാണ് സുബ്രമണി. ഇതോടെ ആദായ നികുതി വകുപ്പ് ഇയാളുടെ വില്ല പരിശോധിക്കുകയും ചെയ്തു. കണക്കുപ്രകാരം 7.9 കോടിയുടെ ആഭരണങ്ങളും കണ്ടുകിട്ടി. ഇതിന്പുറമെ കോടികള്‍ വിലമതിക്കുന്ന രേഖകളും ആദായ നികുതി ഉദ്യോഗസ്ഥര്‍ കണ്ടെത്തിയിരുന്നു.

എന്നാല്‍, ജീവകാരുണ്യ പ്രവര്‍ത്തനത്തിന് എത്തിയ 72-കാരിയായ ഒരു വിദേശ വനിത നല്‍കിയതാണ് ഈ പണം എന്നാണ് സുബ്രമണി അവകാശപ്പെടുന്നത്. 2013-ല്‍ ബെംഗളൂരുവില്‍ എത്തിയ വിദേശവനിത സഞ്ചരിച്ചിരുന്നത് സുബ്രമണിയുടെ ഓട്ടോയിലാണ്. ഇയാളുടെ സാമ്പത്തീക ബുദ്ധിമുട്ടുകളും പരാധീനതകളും കണക്കിലെടുത്ത് ഇവര്‍ താമസിച്ച വില്ല സുബ്രമണിക്ക് വാങ്ങി നല്‍കുകയായിരുന്നു എന്നാണ് പിന്നീട് നടത്തിയ അന്വേഷണത്തിലും കണ്ടെത്തിയത്. വില്ല നിര്‍മ്മിച്ച റിയല്‍ എസ്റ്റേറ്റ് സ്ഥാപനവും ഇക്കാര്യം അംഗീകരിച്ചിട്ടുണ്ട്.

2013-ല്‍ ബെംഗളൂരുവില്‍ എത്തിയ വിദേശവനിത പ്രസ്തുത വില്ല വാടകയ്ക്ക് എടുത്തിരുന്നു. പിന്നീട് 2015-ലാണ് വില്ല സുബ്രമണി വാങ്ങിയത്. 1.6 കോടി രൂപയുടെ ചെക്കാണ് അന്ന് സുബ്രമണി നല്‍കിയത്. എന്നാല്‍ ഇയാള്‍ പെട്ടെന്ന് ഇത്ര പണക്കാരനായതില്‍ അയല്‍വാസികള്‍ക്ക് സംശയം തോന്നിയതോടെയാണ് ആദായനികുതി പരിശോധന നടത്തേണ്ടി വന്നത്. എന്തായാലും ഇത്രയും വലിയ തുക ജീവകാരുണ്യ പ്രവര്‍ത്തനങ്ങള്‍ക്ക് നല്‍കിയ സ്ത്രീ കൗതുകമുയര്‍ത്തിയിരിക്കയാണ്.