കരുനാഗപ്പള്ളി സ്വദേശി ബിജില്‍ എന്ന യുവാവിന്റെ കാര്‍, കെഎസ്ആര്‍ടിസി ബസുകള്‍ക്ക് തന്റെ വണ്ടിയെ മറികടന്നുപോകുവാനുള്ള അവസരം നല്‍കാറില്ല. അത് പെട്ടെന്ന് മനസ്സിലാകുന്ന വിധത്തില്‍ കാറിന്റെ നമ്പര്‍ പ്ലേറ്റിനരികിലായി എഴുതി പ്രദര്‍ശിപ്പിച്ചിട്ടുമുണ്ട്. ഇങ്ങനെയൊരു തീരുമാനമെടുക്കാന്‍ ബിജില്‍ എന്ന യുവാവിന് ഇടയാക്കിയത് നവംബര്‍ 11-ന് പാഞ്ഞെത്തിയ ഒരു കെഎസ്ആര്‍ടിസി ബസ് ആണ്.

ബിജിലിന്റെ പിതാവിന്റെ അനുജന്‍ നജീബും കുടുംബവും സഞ്ചരിച്ചിരുന്ന വാഹനം നങ്ങ്യാര്‍ക്കുളങ്ങരയില്‍ എത്തിയിരുന്നു. അപ്പോഴാണ് അതിവേഗം പാഞ്ഞെത്തിയ ഒരു കെഎസ്ആര്‍ടിസി ബസ് ഈ കാറിലേക്ക് ഇടിക്കുന്നത്. മറ്റൊരു വണ്ടിയെ മറികടന്നാണ് ബസ് കാറില്‍ ഇടിച്ച് കയറിയത്. അപകടത്തില്‍ ബിജിലിന്റെ കൊച്ചച്ചന്റെ മകള്‍ ഫാത്തിമ (20) മരിച്ചു. ഫാത്തിമയുടെ സഹോദരന്‍ അലിയുടെ വലത് കൈ നഷ്ടമാകുകയും ചെയ്തു. അലിയാണ് വാഹനം ഓടിച്ചിരുന്നത്. കാറിലിടച്ച ബസ് 300 മീറ്റര്‍ മാറിയാണ് നിര്‍ത്തിയത്. അപകടം നടന്നതിന് ശേഷം ഡ്രൈവര്‍ ഓടി രക്ഷപ്പെടുകയും ചെയ്തു. എന്നാല്‍ അടുത്ത ദിവസം പോലീസ് സ്റ്റേഷനില്‍ ഹാജരായ ഇയാള്‍ക്ക് ജാമ്യം ലഭിക്കുകയും ചെയ്തു.

കെഎസ്ആര്‍ടിസി എന്റെ പെങ്ങളെ കൊന്നു. കഴുത മോങ്ങുന്നത് പോലെ ഹോണടിച്ചാല്‍ നിങ്ങള്‍ക്ക് എന്നെ മറികടക്കാന്‍ കഴിയില്ല. നമ്പര്‍ പ്ലേറ്റിന്റെ താഴെ ഇപ്പോള്‍ ഇങ്ങനെ എഴുതി വച്ചാണ് ബിജിലിന്റെ കാര്‍ ഓടുന്നത്.

പിന്നീട് ബിജിലിന്റെ വാഹനത്തിന് നേരെ ദിശ തെറ്റി പാഞ്ഞ് വന്ന കെഎസ്ആര്‍ടിസിയുടെ വീഡിയോയും ബിജില്‍ പങ്ക്വെച്ചിട്ടുണ്ട്. പെങ്ങള്‍ക്ക് നീതി ലഭിക്കുന്നത് വരെ കെഎസ്ആര്‍ടിസിക്കെതിരെ പ്രതിഷേധം തുടരുമെന്ന് ബിജില്‍ പറയുന്നു. കെഎസ്ആര്‍ടിസി-യുടെ ഡ്രൈവിങ് നിയന്ത്രിക്കേണ്ടവര്‍ നടപടിയെടുക്കുകയും ചെയ്യണം എന്നും അദ്ദേഹം പറയുന്നു.

ജെസ്റ്റിസ് ഫോര്‍ ഫാത്തിമ നജീബ് മണ്ണേല്‍ എന്ന ഹാഷ് ടാഗിലാണ് ബിജിലിന്റെ പോസ്റ്റ്:
ഇതെന്റെ പ്രതിഷേധമാണ്! KSRTC ബസ്സോടിക്കുന്ന കാലന്മാരുടെ ഇന്നും തുടരുന്ന നരനായാട്ട് അവസാനിപ്പിക്കാന്‍ കെല്‍പ്പില്ലാത്ത എല്ലാ ഏമാന്മാരോടും. KSRTC ഡ്രൈവറന്മാരെ നിയന്ത്രിക്കാന്‍ കഴിയാത്ത, KSRTC സ്സങ്കയോട്, KSRTCയിലെ ഓരോ അധികാരികളോടും, യൂണിയന്‍ നേതാക്കന്മാരോടും, ഗവണ്മെന്റിനോട്, ട്രാന്‍സ്‌പോര്‍ട്ട് മിനിസ്റ്ററോട്, എല്ലാ വകുപ്പ് തല മേലാളന്മാരോടും,എത്ര അനുഭവം ഉണ്ടായാലും പ്രതികരിക്കാത്ത കഴുതകളായ ജനങ്ങളോട്...എന്റെ പെങ്ങള്‍ക്ക് വേണ്ടി എന്നാല്‍ കഴിയുന്നതൊക്കെയും ഞാന്‍ ചെയ്യും...