ഐ.പി.എല്. ഇല്ലാത്ത വര്ഷം എന്നത് തങ്ങള് ചിന്തിച്ചിട്ടേ യില്ലെന്നു ഗാംഗുലി, 35 മുതല് 40 ദിവസങ്ങള് വരെ ലഭിച്ചാല് ടൂര്ണമെന്റ് നടത്തും
മാര്ച്ച് 29-ന് ആരംഭിക്കേണ്ടിയിരുന്ന ഐ.പി.എല്. സീസണ് കോവിഡ് -19 വൈറസ് വ്യാപനത്തെത്തുടര്ന്ന് അനിശ്ചിതമായി തുടരുകയാണ്. ഇന്ത്യന് പ്രീമിയര് ലീഗ് ട്വന്റി20 ക്രിക്കറ്റിന്റെ വേദി മാറ്റില്ലെന്ന് ബി.സി.സി.ഐ. പ്രസിഡന്റ് സൗരവ് ഗാംഗുലി.
ഐ.പി.എല്. ഇല്ലാത്ത വര്ഷം എന്നതു തങ്ങള് ചിന്തിച്ചിട്ടേയില്ലെന്നു ഗാംഗുലി പറഞ്ഞു. 35 മുതല് 40 ദിവസങ്ങള് വരെ ലഭിച്ചാല് ടൂര്ണമെന്റ് നടത്താനാകും. വേദികളില് ചില മാറ്റങ്ങള് വേണ്ടിവരും- ഗാംഗുലി തുടര്ന്നു. ഒക്ടോബര് -നവംബര് മാസങ്ങളിലായി ഓസ്ട്രേലിയയില് നടക്കേണ്ട ട്വന്റി20 ലോകകപ്പിനെ അനുസരിച്ചായിരിക്കും ഐ.പി.എല്ലിന്റെ നടത്തിപ്പെന്ന് ഇന്ത്യന് ടീം മുന് നായകന് കൂടിയായ സൗരവ് ഗാംഗുലി പറഞ്ഞു.
വിദേശത്തു മത്സരങ്ങള് സംഘടിപ്പിക്കുന്നതു ചെലവ് കൂട്ടുമെന്നു ബി.സി.സി.ഐ. പ്രസിഡന്റ് ചൂണ്ടിക്കാട്ടി. ബോര്ഡിനു മാത്രമല്ല ഫ്രാഞ്ചൈസികള്ക്കും താങ്ങാനാകാത്ത ചെലവായിരിക്കും വരിക. മുഴുവന് താരങ്ങളെയും കൊണ്ടു പോകാതിരിക്കാന് ഫ്രാഞ്ചൈസികള് നിര്ബന്ധിതരാകും. ഐ.പി.എല്. രാജ്യത്തു തന്നെ നടത്തുന്നതിനാണു പ്രഥമ പരിഗണന. ശ്രീലങ്ക, യു.എ.ഇ. എന്നിവരെ കൂടാതെ ന്യൂസിലന്ഡും ഐ.പി.എല്ലിനു വേദിയാകാന് താല്പര്യം പ്രകടിപ്പിച്ചതായും ഗാംഗുലി പറഞ്ഞു.
കോവിഡ് വൈറസ് വ്യാപനം രൂക്ഷമായ മുംബൈ, ഡല്ഹി, കൊല്ക്കത്ത, ചെന്നൈ എന്നിവിടങ്ങളില് ക്രിക്കറ്റ് മത്സരങ്ങള് നടത്തണമെന്നു നിര്ബന്ധം പിടിക്കാനാകില്ലെന്നത് മറ്റൊരു പ്രശ്നമാണ്-ഗാംഗുലി ചൂണ്ടിക്കാട്ടി. ട്വന്റി20 ലോകകപ്പിന്റെ നടത്തിപ്പില് രാജ്യാന്തര ക്രിക്കറ്റ് കൗണ്സില് അന്തിമ തീരുമാനമെടുക്കുന്നതു വരെ കാത്തിരിക്കുകയാണെന്നും ഗാംഗുലി പറഞ്ഞു.
മത്സരങ്ങള് അഹമ്മദാബാദ് പോലുള്ള ഒറ്റ സ്റ്റേഡിയത്തില് നടത്തുന്നതിനും ആലോചനയുണ്ട്. ഐ.പി.എല്ലിന്റെ 12 വര്ഷത്തെ ചരിത്രത്തില് ഒരു തവണ മാത്രമാണു ടൂര്ണമെന്റ് പുറത്തു വച്ചു നടത്തിയത്. 2009-ലെ ഐ.പി.എല്. സീസണ് ദക്ഷിണാഫ്രിക്കയിലാണു നടത്തിയത്. രാജ്യത്തു പൊതു തെരഞ്ഞെടുപ്പിന്റെ സമയമായതിനാലാണ് ഐ.പി.എല്ലിന്റെ വേദി മാറ്റിയത്. 2009-ല് തയാറെടുപ്പുകളോടെയാണ് വേദി മാറിയത്. ഇപ്പോഴത്തെ സ്ഥിതി അതല്ല- ഗാംഗുലി തുടര്ന്നു.
https://www.facebook.com/Malayalivartha
