കർണ്ണാടകയോട് ദയനീയമായി തോറ്റ കേരളാ ക്രിക്കറ്റ് ടീം ഇന്ന് ബീഹാറിനെ നേരിടാൻ ഇറങ്ങുന്നു. രാവിലെ ഒൻപത് മണിയ്ക്ക് ആരംഭിച്ച മത്സരത്തിൽ ഒടുവിൽ റിപ്പോർട്ട് കിട്ടുമ്പോൾ 35 ഓവറിൽ ഏഴ് വിക്കറ്റ് നഷ്‌ടത്തിൽ 125 റൺസ് എന്ന നിലയിലാണ് ബീഹാർ. ടോസ് നേടിയ കേരളം ബീഹാറിനെ ബാറ്റിങ്ങിന് അയയ്ക്കുകയായിരുന്നു.

കേരളത്തിന് വേണ്ടി എസ്.ശ്രീശാന്ത് നാല് വിക്കറ്റും ജലജ് സക്സേന രണ്ടും എം.ഡി നിതീഷ് ഒരു വിക്കറ്റും നേടി. ബീഹാറിനായി ബാബുൽ കുമാർ അർദ്ധസെഞ്ചുറി നേടി പുറത്തായി.

കേരളം നിലവിൽ എലൈറ്റ് സി ഗ്രൂപ്പിൽ കർണാടകയ്ക്കും ഉത്തർപ്രദേശിനും പിന്നിലായി മൂന്നാം സ്ഥാനത്താണ്. ക്വാർട്ടറിൽ പ്രവേശിക്കണം എങ്കിൽ ഇനിയുള്ള എല്ലാ മത്സരത്തിലും കേരളത്തിന് ജയം അനിവാര്യമാണ്. മൂന്നു ടീമുകളാണ് ക്വാർട്ടർ ഫൈനലിലേക്ക് കടക്കുക.