ട്വന്റി-20 ലോകകപ്പ് ആദ്യ സന്നാഹ മത്സരത്തില്‍ ഇംഗ്ലണ്ടിനെതിരെ ഇന്ത്യക്ക് ഏഴു വിക്കറ്റ് ജയം. ഇംഗ്ലണ്ട് ഉയര്‍ത്തിയ 189 റണ്‍സ് വിജയലക്ഷ്യം ഇന്ത്യ 19 ഓവറില്‍ മൂന്നു വിക്കറ്റ് നഷ്ടത്തില്‍ മറികടക്കുകയായിരുന്നു.

ഇഷാന്‍ കിഷനാണ് ഇന്ത്യയുടെ ടോപ് സ്‌കോറര്‍. 46 പന്തില്‍ 70 റണ്‍സെടുത്തു. അര്‍ധ സെഞ്ചുറി നേടിയ ഇഷാന്‍ കിഷനും കെ.എല്‍. രാഹുലുമാണ് ഇന്ത്യയുടെ വിജയത്തില്‍ നിര്‍ണായക പങ്ക് വഹിച്ചത്.

ഓപ്പണിംഗ് വിക്കറ്റില്‍ 82 റണ്‍സ് നേടിയ ശേഷമാണ് ഈ കൂട്ടുകെട്ട് പിരിഞ്ഞത്. 24 പന്തില്‍ 51 റണ്‍സെടുത്ത കെ.എല്‍. രാഹുലിനെ മാര്‍ക്ക് വുഡ് പുറത്താക്കി. ഇഷാന്‍ കിഷന്‍ റിട്ടയര്‍ഡ് ഹര്‍ട്ടായി മടങ്ങി.പിന്നാലെ എത്തിയ ക്യാപ്റ്റന്‍ വിരാട് കോഹ്ലി(11), സൂര്യകുമാര്‍ യാദവ്(8) എന്നിവര്‍ കാര്യമായൊന്നും ചെയ്യാതെ മടങ്ങി.

എന്നാല്‍ ഒരറ്റത്ത് നിലയുറപ്പിച്ച റിഷഭ് പന്തും(14 പന്തില്‍ 29) ഹര്‍ദിക് പാണ്ഡ്യയും(10 പന്തില്‍ 12) ചേര്‍ന്നു ഇന്ത്യയെ വിജയത്തിലെത്തി. നേരത്തെ, ആദ്യം ബാറ്റ് ചെയ്ത ഇംഗ്ലണ്ട് നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 188 റണ്‍സെടുത്തു.