ശ്രീശാന്ത് വീണ്ടും ക്രിക്കറ്റിൽ സജീവമാകുന്നു; രഞ്ജി ട്രോഫിക്കുള്ള കേരളാ ടീമിന്റെ സാദ്ധ്യതാ പട്ടികയില് ഇടംനേടി താരം
രഞ്ജി ട്രോഫിക്കുള്ള കേരളാ ടീമിന്റെ സാദ്ധ്യതാ പട്ടികയില് ഇടംനേടി മുന് ഇന്ത്യന് താരം എസ് ശ്രീശാന്ത്. ഒത്തുകളി വിവാദത്തെ തുടര്ന്ന് ബി സി സി ഐയുടെ വിലക്ക് നേരിട്ടിരുന്ന ശ്രീശാന്ത് ഒന്പത് വര്ഷത്തെ ഇടവേളയ്ക്ക് ശേഷമാണ് രഞ്ജി ടീമിന്റെ സാദ്ധ്യതാ പട്ടികയിലെങ്കിലും ഇടംനേടുന്നത്. ക്രിക്കറ്റില് നിന്ന് വിട്ടുനിന്നിരുന്ന കാലത്തും ഫിറ്റ്നസില് ശ്രദ്ധിച്ചിരുന്ന ശ്രീശാന്തിന് ഒരു ക്യാമ്ബില് വച്ച് ശാരീരികക്ഷമത തെളിയിക്കാന് കഴിഞ്ഞാല് മാത്രമായിരിക്കും അന്തിമ ടീമില് സ്ഥാനം ലഭിക്കുകയെന്നാണ് അറിയാന് സാധിക്കുന്നത്.
സച്ചിന് ബേബി നയിക്കുന്ന ടീമില് സഞ്ജു സാംസണ് ഉള്പ്പെടെയുള്ള മുന്നിര താരങ്ങള് എല്ലാവരുമുണ്ട്. അതേസമയം പരിക്കേറ്റ റോബിന് ഉത്തപ്പയെ സാദ്ധ്യതാ പട്ടികയിലും ഉള്പ്പെടുത്തിയിട്ടില്ല. വിഷ്ണു വിനോദ് ആണ് വൈസ് ക്യാപ്ടന്. വിജയ് ഹസാരെ ട്രോഫിയില് മികച്ച പ്രകടനം കാഴ്ചവച്ച ഓള്റൗണ്ടര് വിനൂപ് മോഹനും സാദ്ധ്യതാ പട്ടികയില് ഇടംപിടിച്ചിട്ടുണ്ട്. ഡിസംബര് 30 മുതല് വയനാട് കൃഷ്ണഗിരി സ്റ്റേഡിയത്തില് നടക്കുന്ന ക്യാമ്ബിന് ശേഷം അന്തിമ ടീമിനെ തിരഞ്ഞെടുക്കും.
ജനുവരി 13ന് വിദര്ഭയ്ക്ക് എതിരെയാണ് കേരളത്തിന്റെ ആദ്യ മത്സരം. ബംഗാള്, രാജസ്ഥാന്, ത്രിപുര, ഹരിയാന എന്നിവരാണ് കേരളത്തിന്റെ ഗ്രൂപ്പിലുള്ള മറ്റ് ടീമുകള്. കേരളത്തിന്റെ എല്ലാ മത്സരങ്ങള്ക്കും ബംഗളൂരു വേദിയാകും.
സാദ്ധ്യതാ ടീം: സച്ചിന് ബേബി (ക്യാപ്ടന്), വിഷ്ണു വിനോദ് (വൈസ് ക്യാപ്ടന്, വിക്കറ്റ് കീപ്പര്), ആനന്ദ് കൃഷ്ണന്, രോഹന് കുന്നുമേല്
വത്സല് ഗോവിന്ദ്, രാഹുല് പി, സല്മാന് നിസാര്, സഞ്ജു സാംസണ്, ജലജ് സക്സേന, സിജോ മോന്, അക്ഷയ് കെ സി, മിഥുന് എസ്, ബേസില് എന് പി, നിധീഷ് എം ഡി, മനു കൃഷ്ണന്, ബേസില് തമ്ബി, ഫാനൂസ് എഫ്, ശ്രീശാന്ത് എസ്, അക്ഷയ് ചന്ദ്രന്, വരുണ് നായനാര് (വിക്കറ്റ് കീപ്പര്), ആനന്ദ്, വിനൂപ് മനോഹരന്, അരുണ് എം, വൈശാഖ് ചന്ദ്രന്
https://www.facebook.com/Malayalivartha
