ടെസ്റ്റ് ക്രിക്കറ്റില്‍ മറ്റൊരു സുപ്രധാന നാഴികക്കല്ല് പിന്നിട്ട് ഇന്ത്യന്‍ സ്പിന്നര്‍ ആര്‍. അശ്വിന്‍. ഇതിഹാസ താരം കപില്‍ ദേവിനെ (434 ​വിക്കറ്റ്) മറികടന്ന് അശ്വിന്‍ ടെസ്റ്റിലെ ഇന്ത്യയുടെ എക്കാലത്തെയും മികച്ച രണ്ടാമത്തെ വിക്കറ്റ് വേട്ടക്കാരനായി. 132 മത്സരങ്ങളില്‍ നിന്ന് 619 വിക്കറ്റ് വീഴ്ത്തിയ ഇതിഹാസ സ്പിന്നര്‍ അനില്‍ കുംബ്ലെയാണ് പട്ടികയില്‍ ഒന്നാമന്‍.

430 വിക്കറ്റുമായി മൊഹാലിയിലെത്തിയ തമിഴ്നാട്ടുകാരന്‍ ആദ്യ ഇന്നിങ്സില്‍ രണ്ടും അവസാന ഇന്നിങ്സില്‍ നാലും വിക്കറ്റ് വീഴ്ത്തി. ലങ്കയുടെ രണ്ടാം ഇന്നിങ്സില്‍ ചരിത് അസലങ്കയെ വീഴ്ത്തിയാണ് അശ്വിന്‍ റെക്കോഡ് നേട്ടം സ്വന്തമാക്കിയത്. പതും നിസങ്കയെ വീഴ്ത്തി കപിലിനൊപ്പമെത്തിയ അശ്വിന്‍ ശേഷം രണ്ടുവിക്കറ്റ് കൂടി വീഴ്ത്തി. 131 ടെസ്റ്റിലാണ് കപില്‍ നേട്ടത്തിലെത്തിയതെങ്കില്‍ അശ്വിന് വെറും 85 മത്സരങ്ങള്‍ മാത്രമാണ് വേണ്ടിവന്നത്.

നിലവില്‍ ടെസ്റ്റ് ക്രിക്കറ്റിലെ എക്കാലത്തെയും മികച്ച വിക്കറ്റ് വേട്ടക്കാരുടെ പട്ടികയില്‍ ഒമ്ബതാമനാണ് അശ്വിന്‍. 439 വിക്കറ്റുകളുള്ള ദക്ഷിണാഫ്രിക്കയുടെ ഡെയ്ല്‍ സ്റ്റെയിനാണ് ഇനി അശ്വിന് മുമ്ബിലുള്ളത്. കുംബ്ലെ, അശ്വിന്‍, കപില്‍ ദേവ്, ഹര്‍ഭജന്‍ സിങ് എന്നീ ബൗളര്‍മാര്‍ മാത്രമാണ് ഇന്ത്യക്കായി ടെസ്റ്റില്‍ 400ന് മുകളില്‍ വിക്കറ്റ് വീഴ്ത്തിയത്.