ഇംഗ്ലണ്ടിനെതിരായ ട്വന്റി 20 പരമ്പരയിലെ ആദ്യ മത്സരത്തില്‍ ഇന്ത്യക്ക് തകര്‍പ്പന്‍ ജയം. ഈഡന്‍ ഗാര്‍ഡന്‍സില്‍ ബൗളിങ്ങിലും ബാറ്റിങ്ങിലും സമഗ്രാധിപത്യം പുലര്‍ത്തിയ ടീമിന് മുന്നില്‍ ഇംഗ്ലണ്ടിന് പിടിച്ചുനില്‍ക്കാനായില്ല. 43 പന്തുകള്‍ ബാക്കി നില്‍ക്കെ ഇന്ത്യ വിജയലക്ഷ്യം മറികടന്നു. സ്‌കോര്‍: ഇംഗ്ലണ്ട്-132/10, ഇന്ത്യ- 133/3. ഓപ്പണര്‍ അഭിഷേക് ശര്‍മയുടെ ഉജ്ജ്വല ഇന്നിങ്‌സാണ് ഇന്ത്യക്ക് വിജയം സമ്മാനിച്ചത്. 34 പന്തില്‍ നിന്ന് 79 റണ്‍സാണ് അഭിഷേക് ടീമിനായി നേടിയത്. എട്ട് സിക്‌സറുകളും അഞ്ച് ബൗണ്ടറികളും അടങ്ങുന്നതായിരുന്നു താരത്തിന്റെ ഇടിവെട്ട് ഇന്നിങ്‌സ്. 133 റണ്‍സ് വിജയലക്ഷ്യം മുന്നില്‍ക്കണ്ടിറങ്ങിയ ഇന്ത്യക്ക് മികച്ച തുടക്കമാണ് സഞ്ജു സാംസണും അഭിഷേക് ശര്‍മയും ചേര്‍ന്ന് നല്‍കിയത്. ഇരുവരുടേയും കൂട്ടുകെട്ടില്‍ 41 റണ്‍സ് പിറന്നു.

അഞ്ചാം ഓവറില്‍ ജോഫ്രാ ആര്‍ച്ചറാണ് ഇംഗ്ലണ്ടിന് ആവശ്യമായ ബ്രേക്ക് ത്രൂ നല്‍കുന്നത്. ഈ ഓവറിലെ ആദ്യ പന്തില്‍ സഞ്ജു കൂടാരംകയറി. 20 പന്തില്‍ നിന്ന് 26 റണ്‍സ് സ്വന്തമാക്കിയാണ് സഞ്ജു പുറത്താകുന്നത്. ഒരു സിക്‌സും നാല് ബൗണ്ടറികളും അടങ്ങുന്നതായിരുന്നു താരത്തിന്റെ ഇന്നിങ്‌സ്. തൊട്ടുപിന്നാലെയെത്തിയ ക്യാപ്റ്റന്‍ സൂര്യകുമാര്‍ യാദവും ആര്‍ച്ചറിന് മുന്നില്‍ കുരുങ്ങി. പൂജ്യം റണ്ണോടെ ഡക്ക് ആയിട്ടായിരുന്നു ക്യാപ്റ്റന്റെ പുറത്താകല്‍.

പിന്നാലെ വന്ന തിലക് വര്‍മ 16 പന്തില്‍ നിന്ന് 19 റണ്‍സ് നേടി പുറത്താകാതെ നിന്നു. തിലക്കും അഭിഷേകും ചേര്‍ന്ന് ടീമിനെ വിജയത്തിലെത്തിക്കമെന്ന ഘട്ടത്തില്‍ നില്‍ക്കെയാണ് ആദില്‍ റഷീദ് എറിഞ്ഞ 12-ാം ഓവറില്‍ അഭിഷേക് പുറത്താകുന്നത്. ജയിക്കാന്‍ എട്ട് റണ്‍സ് മാത്രം ബാക്കിനില്‍ക്കെയായിരുന്നു അഭിഷേകിന്റെ വിക്കറ്റ്. തൊട്ടുപിന്നാലെ വന്ന ഹാര്‍ദികും(3) തിലകും ചേര്‍ന്ന് മത്സരം അവസാനിപ്പിച്ചു.

ടോസ് നഷ്ടപ്പെട്ട് ആദ്യം ബാറ്റ് ചെയ്യേണ്ടിവന്ന ഇംഗ്ലണ്ടിന് ഇരുപത് ഓവറില്‍ ഒന്‍പത് വിക്കറ്റ് നഷ്ടത്തില്‍ 132 റണ്‍സ് മാത്രമാണ് നേടാനായത്. ജോസ് ബട്‌ലര്‍ ഒഴികേയുള്ള ഇംഗ്ലീഷ് ബാറ്റര്‍മാര്‍ക്കൊന്നും ഇന്ത്യന്‍ ബൗളിങ്ങിനെ പ്രതിരോധിക്കാനായില്ല. 44 പന്തില്‍ നിന്ന് 68 റണ്‍സാണ് ബട്‌ലര്‍ നേടിയത്. പതിനേഴ് റണ്‍സെടുത്ത ഹാരി ബ്രൂക്കും പന്ത്രണ്ട് റണ്‍സെടുത്ത ജൊഫ്ര ആര്‍ച്ചറും മാത്രമാണ് രണ്ടക്കം കടന്നത്. ഇന്ത്യയ്ക്കുവേണ്ടി വരുണ്‍ ചക്രവര്‍ത്തി മൂന്നും അര്‍ഷ്ദീപ് സിങ്ങും ഹര്‍ദിക് പാണ്ഡ്യയും അക്‌സര്‍ പട്ടേലും രണ്ട് വിക്കറ്റ് വീതം വീഴ്ത്തി. ഇതോടെ ടിട്വന്റിയിലെ ഇന്ത്യയുടെ ഏറ്റവും വലിയ വിക്കറ്റ്‌വേട്ടക്കാരനായി അര്‍ഷ്ദീപ് മാറി. 97 വിക്കറ്റാണ് അര്‍ഷ്ദീപ് ഇതുവരെ വീഴ്ത്തിയത്. 96 വിക്കറ്റ് വീഴ്ത്തിയ യൂസ്‌വേന്ദ്ര ചാഹലിന്റെ റെക്കോഡാണ് അര്‍ഷദീപ് മറികടന്നത്.

ആദ്യ ഓവറിന്റെ മൂന്നാമത്തെ പന്ത് മുതല്‍ തന്നെ വിക്കറ്റുകള്‍ നഷ്ടപ്പെട്ട ഇംഗ്ലണ്ടിന്റെ ഏക പ്രതീക്ഷയായിരുന്നു ബട്‌ലര്‍. എട്ട് ബൗണ്ടറിയും രണ്ട് സിക്‌സും ഉള്‍പ്പടെയാണ് ബട്‌ലര്‍ 68 റണ്‍സെടുത്തത്. ഫില്‍ സാള്‍ട്ട് (0), ബെന്‍ ഡക്കറ്റ് (4), ലിയാം ലിവിങ്സ്റ്റണ്‍ (0), ജേക്കബ് ബെത്തെല്‍ (7), ജാമി ഓവര്‍ട്ടണ്‍ (2), ഗസ് അറ്റ്കിന്‍സണ്‍ (2), മാര്‍ക്ക് വുഡ് (1) എന്നിവരാണ് ഒറ്റയക്കത്തിന് മടങ്ങിയത്. എട്ട് റണ്‍സെടുത്ത ആദില്‍ റഷീദ് പുറത്താകാതെ നിന്നു.

ടോസ് നേടിയ ഇന്ത്യന്‍ നായകന്‍ സൂര്യകുമാര്‍ യാദവ് ഇംഗ്ലണ്ടിനെ ബാറ്റിങ്ങിനയക്കുകയായിരുന്നു. മുഹമ്മദ് ഷമിയെ കൂടാതെയാണ് ഇന്ത്യ കളിക്കുന്നത്. ഷമിക്ക് പകരമാണ് അര്‍ഷ്ദീപ് സിങ് എത്തിയത്. വൈസ് ക്യാപ്റ്റന്‍ അക്‌സര്‍ പട്ടേലിന് പുറമെ രവി ബിഷ്‌ണോയിയും വരുണ്‍ ചക്രവര്‍ത്തിയും ടീമില്‍ ഇടംപിടിച്ചു. സഞ്ജു സാംസണാണ് കീപ്പര്‍. 2024 ട്വന്റി 20 ലോകകപ്പ് സെമിയില്‍ ഇംഗ്ലണ്ട് ഇന്ത്യയോട് തോറ്റുപുറത്തായിരുന്നു. ഫൈനലില്‍ ദക്ഷിണാഫ്രിക്കയെ തോല്‍പ്പിച്ച് ഇന്ത്യ കിരീടംനേടി. അതിനുശേഷം ആദ്യമായാണ് ഇംഗ്ലണ്ട്-ഇന്ത്യ മുഖാമുഖം ഏറ്റുമുട്ടുന്നത്.