ഫൈനല് കാണാന് ടിക്കറ്റെടുത്തു,ടീം സെമിയില് പുറത്തായി! എടുത്ത ടിക്കറ്റുകള് ആരാധകര് എന്ത് ചെയ്തെന്നറിഞ്ഞാല് ആരും കൈയ്യടിക്കും
ഫുട്ബോള് ആരാധകര്ക്കിടയില് എന്നും വേറിട്ട് നില്ക്കുന്ന ആരാധകക്കൂട്ടമാണ് ജര്മ്മന് ആരാധകര്. അത്തരമൊരു സംഭവമാണ് കഴിഞ്ഞ ദിവസങ്ങളില് യൂറോപ്പില് അരങ്ങേറിയത്. യുവേഫയുടെ രണ്ടാംനിര ടൂര്ണ്ണമെന്റായ യൂറോപ്പ ലീഗില് സെമിഫൈനല് മത്സരം ജര്മ്മന് ക്ലബ്ബ് ഏയ്ന്ട്രാക്ട് ഫ്രാങ്ക്ഫുര്ട്ടും ഇംഗ്ലീഷ് ക്ലബ്ബ് ചെല്സിയും തമ്മിലായിരുന്നു. ആദ്യ പാദത്തില് ഫ്രാങ്ക്ഫുര്ട്ടിന്റെ മൈതാനത്തില് ഇരുടീമുകളും ഓരോ ഗോള് വീതം നേടി സമനിലയില് പിരിഞ്ഞു. അതിന് ശേഷമാണ് ആയിരക്കണക്കിന് ഫ്രാങ്ക്ഫുര്ട് ആരാധകര് ബാകുവില് വെച്ച് നടക്കുന്ന ഫൈനല് മത്സരത്തിലേക്കുള്ള ടിക്കറ്റുകള് വാങ്ങിക്കൂട്ടിയത്.
എന്നാല് സംഭവിച്ചത് മറ്റൊന്നായിരുന്നു...രണ്ടാംപാദത്തില് വീണ്ടും ഇരുടീമുകളും ഓരോ ഗോള് വീതം നേടി മത്സരം പെനാല്റ്റി ഷൂട്ടൗട്ടിലേക്ക് കടന്നു. ചെല്സി മത്സരം 4-3 എന്ന സ്കോറില് വിജയിച്ച് ഫൈനലില് കടക്കുകയും ചെയ്തു.
എന്നാല് അസര്ബൈജാനില് വെച്ച് നടക്കുന്ന ഫൈനല് മത്സരം കാണാനുള്ള നിരവധി ടിക്കറ്റുകള് എടുത്ത് കൂട്ടിയ ഫ്രാങ്ക്ഫുര്ട്ട് ആരാധകര് ചെയ്തതെന്തെന്നോ...ശാരീരിക വൈകല്യമുള്ള കുട്ടികള്ക്ക് ആ ടിക്കറ്റുകള് മുഴുവന് സൗജന്യമായി നല്കുകയായിരുന്നു. ജര്മ്മന് ആരാധകരുടെ ഈ സത്പ്രവര്ത്തി കണ്ട് കൈയ്യടിക്കുകയാണ് മറ്റ് ആരാധകരും.
https://www.facebook.com/Malayalivartha