2021-22 സീസണിലെ ആദ്യ ലീഗ് മത്സരത്തിനിറങ്ങാന്‍ ഒരുങ്ങി പി എസ് ജി. സീസണിലെ ആദ്യ ലീഗ് മത്സരത്തില്‍ സ്റ്റ്രാസ്ബര്‍ഗിനെ നേരിടാന്‍ ഇറങ്ങുമ്ബോള്‍ ഫുട്ബോള്‍ ആരാധകരെല്ലാം ആകാംക്ഷയോടെ ഉറ്റുനോക്കുന്നത് ലയണല്‍ മെസ്സി പി എസ് ജിക്കായി അരങ്ങേറ്റം നടത്തുമോ എന്നതാണ്. മെസ്സി പി എസ് ജിയിലേക്ക് ചേര്‍ന്നതിന് ശേഷം ഏവരും ഫ്രഞ്ച് ലീഗ് തുടങ്ങാന്‍ വേണ്ടി ആവേശത്തോടെ കാത്തിരിക്കുകയായിരുന്നു.

എന്നാല്‍ ഇന്നത്തെ മത്സരത്തില്‍ മെസ്സി കളിക്കാന്‍ സാധ്യതയില്ല എന്നതാണ് റിപ്പോര്‍ട്ടുകള്‍ സൂചിപ്പിക്കുന്നത്. ക്ലബ്ബിന്റെ പ്രീ സീസണ്‍ ക്യാമ്ബുകളില്‍ ഇല്ലാതിരുന്ന മെസ്സി ആകെ മൂന്ന് ട്രെയിനിങ് സെഷനില്‍ മാത്രമെ ഇതുവരെ പങ്കെടുത്തിട്ടുള്ളു എന്നതിനാല്‍ താരത്തെ ഇന്ന് കളിപ്പിച്ച്‌ വലിയ സാഹസത്തിന് മുതിരാന്‍ പി എസ് ജി ഒരുക്കമായിരിക്കില്ല. അതുകൊണ്ട് തന്നെയാണ് ലീഗിലെ ആദ്യ മത്സരത്തില്‍ മെസ്സിയെ ഉള്‍പ്പെടുത്താതെയുള്ള ടീമിനെ പി എസ് ജി പ്രഖ്യാപിച്ചിരിക്കുന്നത്. മെസ്സിക്ക് പുറമെ ക്ലബ്ബില്‍ പുതുതായി എത്തിയ സെര്‍ജിയോ റാമോസ്, ഡൊന്നരുമ എന്നിവരും ഇന്നത്തെ മത്സരത്തിനുള്ള ടീമില്‍ ഉള്‍പ്പെട്ടിട്ടില്ല. അതേസമയം വൈനാള്‍ഡവും ഹക്കീമിയും ടീമില്‍ ഇടം നേടിയിട്ടുണ്ട്. ഇവര്‍ക്ക് പുറമെ ബ്രസീല്‍ താരം നെയ്മര്‍, അര്‍ജന്റീനയുടെ ഡി മരിയ, പരാഡെസ് എന്നിവരും ടീമില്‍ ഉള്‍പ്പെട്ടിട്ടില്ല.

ഒരാഴ്ച കൂടി ടീമിനൊപ്പം പരിശീലിച്ച്‌ ടീമിന്റെ ശൈലിയിലേക്ക് പൂര്‍ണമായി ഇണങ്ങുകയും താരത്തിന്റെ പരിപൂര്‍ണ ഫിറ്റ്നസില്‍ എത്തിയതിന് ശേഷമാകും മെസ്സിയെ പി എസ് ജി കളത്തില്‍ ഇറക്കുക. മെസ്സിയെ ഇന്നത്തെ മത്സരത്തില്‍ ഇറക്കിയില്ലെങ്കിലും താരത്തെ ആരാധകര്‍ക്ക് മുന്നില്‍ മത്സരത്തിന് മുന്‍പ് അവതരിപ്പിക്കാനുള്ള സാധ്യതയുണ്ട്. അങ്ങനെയെങ്കില്‍ പി എസ് ജി ജേഴ്‌സിയില്‍ മെസ്സിയെ കാണാന്‍ വേണ്ടി ആകാംക്ഷയോടെ കാത്തിരിക്കുന്ന ഫുട്‍ബോള്‍ ആരാധകര്‍ക്ക് ഇതൊരു സന്തോഷ വാര്‍ത്ത തന്നെയാണ്.

ഇന്ന് രാത്രി 12.30ന് പി എസ് ജിയുടെ ഹോം ഗ്രൗണ്ടായ പാര്‍ക്ക് ഡി പ്രിന്‍സസ് സ്റ്റേഡിയത്തില്‍ വെച്ചാണ് മത്സരം നടക്കുന്നത്. ഫ്രഞ്ച് ലീഗ് മത്സരങ്ങള്‍ ഇന്ത്യയില്‍ സംപ്രേക്ഷണം ചെയ്യുന്നില്ല. അതുകൊണ്ട് തന്നെ ഓണ്‍ലൈന്‍ സ്ട്രീമിങ് സൈറ്റുകളെ ആശ്രയിക്കേണ്ട ഗതികേടിലാണ് ഇന്ത്യന്‍ ഫുട്ബോള്‍ പ്രേമികള്‍.

ബാഴ്‌സയുമായി കരാറിലെത്താന്‍ കഴിഞ്ഞ മെസ്സിയെ പി എസ് ജി രണ്ട് വര്‍ഷത്തേക്കാണ് കരാര്‍ നല്‍കിയിരിക്കുന്നത്. സീസണില്‍ 35 ദശലക്ഷം യൂറോ ആയിരിക്കും മെസ്സിയുടെ പ്രതിഫലം. രണ്ടു വര്‍ഷത്തേക്കാണ് പ്രാഥമിക കരാറെങ്കിലും ഇത് 2024വരെ നീട്ടാമെന്നും ധാരണയുണ്ട്. പി എസ് ജിയില്‍ മെസ്സി 30ാ൦ നമ്ബര്‍ ജേഴ്‌സി ധരിച്ചാകും കളിക്കുക.