പി എസ് ജി ജേഴ്‌സിയില്‍ ആദ്യത്തെ മത്സരത്തിനൊരുങ്ങി മെസ്സി; അരങ്ങേറ്റം ഉടനുണ്ടാകുമെന്ന സൂചന നൽകി പരിശീലകൻ മൗറീഷ്യോ പൊച്ചട്ടീനോ
ബാഴ്‌സലോണയില്‍ നിന്നും പി എസ് ജിയിലേക്ക് എത്തിയ മെസ്സി ക്ലബ് ജേഴ്‌സിയില്‍ ആദ്യത്തെ മത്സരം കളിക്കുന്നത് കാണാനായുള്ള കാത്തിരിപ്പിലാണ് ഫുട്‍ബോള്‍ ആരാധകര്‍. ഫ്രഞ്ച് ലീഗ് മത്സരങ്ങള്‍ തുടങ്ങി പി എസ് ജി അവരുടെ മൂന്ന് മത്സരങ്ങള്‍ കളിച്ച്‌ കഴിഞ്ഞപ്പോഴും സൂപ്പര്‍ താരം ഇതുവരെയായി ഫ്രഞ്ച് ക്ലബിന്റെ ജേഴ്‌സിയില്‍ ആരാധകര്‍ക്ക് മുന്നില്‍ പന്ത് തട്ടാന്‍ ഇറങ്ങിയിട്ടില്ല. മെസ്സിയുടെ പി എസ് ജി അരങ്ങേറ്റം എന്നാകും എന്ന ചോദ്യം ഉയര്‍ന്നുകൊണ്ടിരിക്കെ ആരാധകര്‍ക്ക് സന്തോഷം നല്‍കുന്ന ഒരു വാര്‍ത്ത പങ്കുവെച്ചിരിക്കുകയാണ് പി എസ് ജിയുടെ പരിശീലകനായ മൗറീഷ്യോ പൊച്ചട്ടീനോ. ഫ്രഞ്ച് ലീഗില്‍ അടുത്ത ആഴ്ച ഓഗസ്റ്റ് 29ന് റെയിംസിനെതിരെ നടക്കുന്ന മത്സരത്തില്‍ ലയണല്‍ മെസ്സി പിഎസ്‌ജിക്ക് വേണ്ടി അരങ്ങേറിയേക്കും എന്ന പ്രതീക്ഷയാണ് പി എസ് ജി പരിശീലകന്‍ പങ്കുവെച്ചത്.
അര്‍ജന്റീനക്കൊപ്പം കോപ്പ അമേരിക്ക കിരീടം നേടിയതിന് ശേഷം താരം തന്റെ കുടുംബത്തോടൊപ്പം അവധിക്കാലം ചെലവഴിക്കുകയായിരുന്നു. ഏകദേശം ഒരു മാസത്തോളം കാര്യമായ പരിശീലനം ഒന്നും തന്നെ ഇല്ലാതിരുന്നതിനാലാണ് മെസ്സിയുടെ പി എസ് ജി അരങ്ങേറ്റം വൈകുന്നത്. പി എസ് ജി താരങ്ങള്‍ക്കൊപ്പം താരം പരിശീലനം നടത്തുന്നതിനോടൊപ്പം ശാരീരികമായി കൂടുതല്‍ മെച്ചപ്പെടുന്നതിന് വേണ്ടിയുള്ള അധിക പരിശീലനം കൂടി മെസ്സി നടത്തുന്നുണ്ട്.
മെസ്സിയുടെ പിഎസ്‌ജി അരങ്ങേറ്റം എന്നാകുമെന്ന് പൊച്ചട്ടീനോ ഉറപ്പിച്ചു പറയുന്നില്ലെങ്കിലും, എല്ലാ കാര്യങ്ങളും പ്രതീക്ഷിച്ച രീതിയില്‍ നടക്കുകയാണെങ്കില്‍ റെയിംസിനെതിരായ മത്സരത്തില്‍ മെസ്സി കളിക്കും എന്ന് തന്നെയാണ് അദ്ദേഹം പറയുന്നത്.
"ലിയോയെ സംബന്ധിച്ചിടത്തോളം ഇത് വളരെ നല്ലൊരു ആഴ്ചയാണ്. അടുത്ത ആഴ്ച നീണ്ടതായിരിക്കും, പക്ഷെ എല്ലാം നല്ല രീതിയില്‍ പോവുകയാണെങ്കില്‍, മെസ്സി ടീമില്‍ ഉണ്ടാകും, അടുത്ത മത്സരത്തില്‍ (റെയിംസിനെതിരെ) മെസ്സിക്ക് കളിക്കാനാകുമെന്നും ഞങ്ങള്‍ പ്രതീക്ഷിക്കുന്നു," പൊച്ചട്ടീനോ പറഞ്ഞു.
അതേസമയം, റെയിംസിനെതിരെ നടക്കുന്ന മത്സരം പി എസ് ജിക്ക് എവേ മത്സരമായതിനാല്‍, പി എസ് ജിയുടെ സ്റ്റേഡിയമായ പാര്‍ക്ക് ഡി പ്രിന്‍സസില്‍ കളിക്കുന്നതിനായി മെസ്സിക്കും മെസ്സിയുടെ കളി ക്ലബിന്റെ ഹോം ഗ്രൗണ്ടില്‍ കാണാന്‍ പി എസ് ജി ആരാധകര്‍ക്കും കാത്തിരിക്കേണ്ടി വരും. സെപ്റ്റംബര്‍ ആദ്യ വാരത്തിലെ അര്‍ജന്റീനയുടെ 2022 ലോകകപ്പ് യോഗ്യതാ മത്സരങ്ങള്‍ക്ക് ശേഷം വരുന്ന പി എസ് ജിയുടെ മത്സരത്തിലായിരിക്കും പി എസ് ജിയുടെ ഹോം ഗ്രൗണ്ടില്‍ മെസ്സിയുടെ അരങ്ങേറ്റം.
പി എസ് ജിയുമായി രണ്ട് വര്‍ഷത്തെ കരാറില്‍ ഒപ്പുവെച്ച താരത്തെ കഴിഞ്ഞ ദിവസം പാര്‍ക്ക് ഡി പ്രിന്‍സസില്‍ ഈ സീസണില്‍ ടീമിലെത്തിയ മറ്റു താരങ്ങള്‍ക്കൊപ്പം ആരാധകരുടെ മുന്നില്‍ അവതരിപ്പിച്ചിരുന്നു. ആരാധകരാല്‍ തിങ്ങിനിറഞ്ഞ സ്റ്റേഡിയത്തില്‍ മെസ്സിക്ക് വലിയ സ്വീകരണം തന്നെയാണ് ലഭിച്ചത്.
https://www.facebook.com/Malayalivartha
