'അഭ്യൂഹങ്ങൾക്ക് വിരാമം'; പോര്ച്ചുഗല് നായകന് ക്രിസ്റ്റ്യാനോ റൊണാള്ഡോ മാഞ്ചസ്റ്റര് യുനൈറ്റഡില് തിരികെയെത്തി; റൊണാള്ഡോ തന്റെ പഴയ തട്ടകത്തില് തിരിച്ചെത്തുന്നത് 12 വര്ഷത്തിനു ശേഷം
ഇറ്റാലിയന് ക്ലബ്ബായ യുവന്റസ് വിട്ട പോര്ച്ചുഗല് നായകന് ക്രിസ്റ്റ്യാനോ റൊണാള്ഡോ ഇംഗ്ലീഷ് പ്രീമിയര് ലീഗ് ക്ലബ്ബായ മാഞ്ചസ്റ്റര് യുനൈറ്റഡില് തിരികെയെത്തി.12 വര്ഷത്തിനുശേഷമാണ് റൊണാള്ഡോ തന്റെ പഴയ തട്ടകത്തില് തിരിച്ചെത്തുന്നത്. 36കാരനായ റൊണാള്ഡോയുമായി 2 വര്ഷത്തേക്കാണ്് ഇപ്പോള് ടീം കരാറൊപ്പിട്ടിരിക്കുന്നത്.ട്രാന്സ്ഫര് തുക സംബന്ധിച്ച തര്ക്കം പരിഹരിക്കാന് കഴിയാത്തതിനെത്തുടര്ന്നാണ് സിറ്റി റൊണാള്ഡോയെ കൈയൊഴിഞ്ഞതെന്ന് സൂചനയുണ്ടായിരുന്നു. പിന്നാലെ റൊണാള്ഡോയുടെ ഏജന്റ് ജോര്ജ് മെന്ഡസ് യുനൈറ്റഡ് അധികൃതരുമായി ചര്ച്ച നടത്തിയിരുന്നു.പിന്നാലെയാണ് സ്ഥീരീകരണമുണ്ടായിരിക്കുന്നത്.
18ാം വയസില് യുണൈറ്റഡിലൂടെയായിരുന്നു ക്രിസ്റ്റ്യാനോ പ്രീമിയര് ലീഗില് അരങ്ങേറിയത്. 2003 മുതല് 2009 വരെ യുനൈറ്റഡിനായി 292 മത്സരങ്ങളില് കളിച്ച റൊണാള്ഡോ 118 ഗോളുകള് നേടിയിട്ടുണ്ട്. റൊണാള്ഡോയെ വരവേല്ക്കാന് ക്ലബ്ബിലെ എല്ലാവരും ഒരുങ്ങിക്കഴിഞ്ഞുവെന്ന് യുനൈറ്റഡ് വാര്ത്താക്കുറിപ്പില് വ്യക്തമാക്കി.2003ല് സ്പോര്ട്ടിങ് ക്ലബ്ബില് നിന്ന് മാഞ്ചസ്റ്റര് യുനൈറ്റഡിലെത്തിയ റൊണാള്ഡോ 2009വരെ ക്ലബ്ബില് തുടര്ന്നു. 2009ല് റെക്കോര്ഡ് ട്രാന്സ്ഫര് തുകക്ക് റയലിലേക്ക് പോയ റൊണാള്ഡോ അവിടെ നിന്നാണ് യുവന്റസിലെത്തിയത്.
ക്രിസ്റ്റ്യാനോ റൊണാള്ഡോയ്ക്കായുള്ള നീക്കം അവസാനിപ്പിച്ചതായി മാഞ്ചസ്റ്റര് സിറ്റി വെള്ളിയാഴ്ച അറിയിച്ചിരുന്നു.റൊണാള്ഡോ ടീമിലെത്താനുള്ള സാധ്യത യുനൈറ്റഡ് പരിശീലകന് ഒലെ ഗുണ്ണാര് സോള്ഷ്യര് തള്ളിക്കളഞ്ഞതുമില്ല. യുവന്റസ് വിടുകയാണെങ്കില് റൊണാള്ഡോയെ ഇരുകൈയും നീട്ടി സ്വീകരിക്കാന് യുനൈറ്റഡ് തയാറാണെന്ന് സോള്ഷ്യര് പറഞ്ഞു. റൊണാള്ഡോ യുനൈറ്റഡിന്റെ ഇതിഹാസ താരമാണെന്നും സോള്ഷ്യര് വ്യക്തമാക്കി.
യുവന്റസിലെ സഹതാരങ്ങളോടു യാത്ര പറയാന് റൊണാള്ഡോ എത്തി. ശേഷം സ്വകാര്യ വിമാനത്തില് ടൂറിനില് നിന്ന് മടങ്ങുകയും ചെയ്തു.റൊണാള്ഡോ യുവന്റസ് താരങ്ങളോട് യാത്രപറഞ്ഞ് സ്വകാര്യ വിമാനത്തില് ഇറ്റലി വിടുന്നതിന്റെ ചിത്രങ്ങളും പിന്നാലെ പുറത്തുവന്നിരുന്നു. യുവന്റസുമായി ഒരു വര്ഷം കരാര് ബാക്കിയിരിക്കെയാണ് റൊണാള്ഡോ യുനൈറ്റഡില് തിരികെയെത്തുന്നത്.
https://www.facebook.com/Malayalivartha