മാഞ്ചസ്റ്റര് യുനൈറ്റഡിലേക്കുള്ള വരവ് രാജകീയമാക്കി ക്രിസ്റ്റ്യാനോ; പ്രീമിയര് ലീഗ് പോരാട്ടത്തില് ന്യൂകാസിലിനെതിരായ മത്സരത്തിൽ ഒന്നിനെതിരെ നാലു ഗോളുകളുടെ ആധികാരിക ജയം
പന്ത്രണ്ട് വര്ഷങ്ങള്ക്ക് ശേഷം തന്റെ പഴയ തട്ടകമായ മാഞ്ചസ്റ്റര് യുനൈറ്റഡിലേക്കും പ്രീമിയര് ലീഗിലേക്കുമുള്ള വരവ് രാജകീയമാക്കി ക്രിസ്റ്റ്യാനോ. പ്രീമിയര് ലീഗ് പോരാട്ടത്തില് ന്യൂകാസിലിനെതിരായ ഒന്നിനെതിരെ നാലു ഗോളുകളുടെ ആധികാരിക ജയം. ജയത്തോടെ നാലു മത്സരങ്ങളില് നിന്ന് 10 പോയിന്റുമായി യുനൈറ്റഡ് മാഞ്ചസ്റ്റര് സിറ്റിയെ പിറകിലാക്കി പോയിന്റ് പട്ടികയില് ഒന്നാം സ്ഥാനത്തെത്തി.
മത്സരത്തില് ഇരട്ട ഗോളോടെ ക്രിസ്റ്റ്യാനോ മിന്നി നിന്നു. ഒരുപക്ഷേ ആരാധകര് പ്രതീക്ഷിച്ചതിലും കൂടുതല് ഗംഭീരമാക്കി തന്റെ വരവ്.
ക്രിസ്റ്റ്യാനോ റൊണാള്ഡോയായിരുന്നു മാഞ്ചസ്റ്ററിന് വേണ്ടി ആദ്യവെടി പൊട്ടിച്ചത്. ആദ്യപകുതിയുടെ ഇഞ്ചുറി ടൈമിലായിരുന്നു റൊണാള്ഡോയുടെ ആദ്യ ഗോള്. മേസണ് ഗ്രീന്വുഡിന്റെ ഗ്രൗന്ഡ് ഷോട് തടുത്തിടുന്നതില് ന്യൂകാസില് ഗോള്കീപെര് ഫ്രെഡി വുഡ്മാന് പറ്റിയ പിഴയില് നിന്നാണ് റൊണാള്ഡോയുടെ ആദ്യ ഗോള് പിറന്നത്. ഗോള് കീപെറുടെ കൈയില് തട്ടി തെറിച്ച പന്ത് റൊണാള്ഡോ ഗോളാക്കി മാറ്റുകയായിരുന്നു.
രണ്ടാം പകുതിയുടെ 56ാം മിനിറ്റില് ന്യൂകാസില് ജാവിയര് മാന്ക്വിലോയിലൂടെ ഒപ്പമെത്തി. എന്നാല് ആറ് മിനുറ്റിന് ശേഷം വീണ്ടും ക്രിസ്റ്റ്യാനോ വല ചലിപ്പിച്ചതോടെ തന്റെ വരവ് രാജകീയമാക്കി. ലൂക് ഷോയുടെ ത്രൂ പാസ് പിടിച്ചെടുത്ത് റൊണാള്ഡോ ഗോള് ആകുകയായിരുന്നു.
ബ്രൂണോ ഹെര്ണാണ്ടസായാണ് മാഞ്ചസ്റ്ററിന് മൂന്നാം ഗോള് സമ്മാനിച്ചത്. ബോക്സിന് പുറത്തു നിന്ന് പോഗ്ബ നല്കിയ പാസില് ബ്രൂണോ ഹെര്ണാണ്ടസ് തൊടുത്ത ലോംഗ് റേഞ്ചര് ന്യൂകാസിന്റെ വല തുളയ്ക്കുകയായിരുന്നു. പകരക്കാരനായി ഇറങ്ങിയ ലിംഗാര്ഡ് ഇഞ്ചുറി ടൈമില് യുനൈറ്റഡിന് നാലാം ഗോള് സമ്മാനിച്ചതോടെ ഓള്ഡ് ട്രഫോര്ഡ് ചുവപ്പണിഞ്ഞു. മത്സരത്തില് രണ്ട് ഗോള് നേടിയതോടെ മാഞ്ചസ്റ്റര് യുനൈറ്റഡിനായുള്ള റൊണാള്ഡോയുടെ ഗോള് നേട്ടം 120 ആയി.
https://www.facebook.com/Malayalivartha
