ചാമ്പ്യന്‍സ് ലീഗിനുപുറമെ യൂറോപ്പ ലീഗ് ഫുട്‌ബോളിലും സ്പാനിഷ് ടീമുകളുടെ മുന്നേറ്റം. സ്‌പെയിന്‍ ക്ലബ്ബുകളായ സെവിയ്യയും വലന്‍സിയയുമാണ് വ്യാഴാഴ്ച രാത്രി നടന്ന ക്വാര്‍ട്ടറില്‍ എതിരാളികളെ കീഴടക്കി യൂറോപ്പ ലീഗ് സെമി സീറ്റു നേടി കരുത്ത് തെളിയിച്ചത്. വെള്ളിയാഴ്ച നടന്ന നറുക്കെടുപ്പില്‍ സെമി പോരാട്ടം ഈ രണ്ടു ടീമുകളും തമ്മിലായതോടെ സ്‌പെയിന് ഇക്കുറി ഫൈനലിലും പ്രാതിനിധ്യം ഉറപ്പായി. രണ്ടാം സെമിയില്‍ പോര്‍ച്ചുഗലിന്റെ ബെന്‍ഫിക്ക ഇറ്റലിയുടെ യുവന്റസിനെ നേരിടും.
നിയോണിലെ യൂണിയന്‍ ഓഫ് യൂറോപ്യന്‍ ഫുട്‌ബോള്‍ അസോസിയേഷന്‍ (യുവേഫ) ആസ്ഥാനത്താണ് സെമി മത്സരത്തിനുള്ള ടീമുകളുടെ നറുക്കെടുപ്പ് നടന്നത്. ഏപ്രില്‍ 24-നും മെയ് ഒന്നിനും രണ്ടുപാദങ്ങളിലായി സെമി മത്സരങ്ങള്‍ നടക്കും. ക്വാര്‍ട്ടറില്‍ പോര്‍ട്ടോയെ കീഴടക്കി സെവിയ്യ സെമിയിലെത്തിയപ്പോള്‍(ആകെ ഗോള്‍ 4-2) ബാസലിനെ തോല്‍പ്പിച്ചാണ്(ആകെ ഗോള്‍ 5-3) വലന്‍സിയ അവസാന നാലില്‍ സീറ്റ് നേടിയത്. യുവന്റസ് ലിയോണിനെ തോല്‍പ്പിച്ചപ്പോള്‍(ആകെ ഗോള്‍ 3-1) ബെന്‍ഫിക്ക അല്‍ക്കമാറിനെ തകര്‍ത്തു(ആകെ ഗോള്‍ 3-0)