ഇന്ത്യയുടെ അഭിമാനം വാനോളം ഉയര്‍ത്തി വനിത ഗുസ്തി താരം വിനേഷ് ഫൊഗാട്ട്. റോമില്‍ നടന്ന മറ്റിയോ പെല്ലികോണ്‍ റാങ്കിംഗ് സീരിസ് ഫൈനലില്‍ കാനഡയുടെ ഡയാന വെയ്ക്കറിനെ മലര്‍ത്തിയടിച്ച് വിനേഷ് ഫൊഗാട്ട് സ്വര്‍ണം നേടി.

ഇതോടെ രണ്ടാഴ്ചയ്ക്കിടെ രണ്ടാം തവണയാണ് വിനേഷ് സ്വര്‍ണ മെഡല്‍ സ്വന്തമാക്കുന്നത്. ആദ്യ പീരിഡില്‍ തന്നെ പരമാവധി സ്‌കോര്‍ ചെയ്ത വിനേഷ് രണ്ടാം പീരിഡില്‍ ലീഡ് നിലനിര്‍ത്തിയാണ് ഫൈനലില്‍ വിജയിച്ചത്. കഴിഞ്ഞ ആഴ്ച കൈ്വവില്‍ നടന്ന ടൂര്‍ണമെന്റിലും വിനേഷ് സ്വര്‍ണം നേടിയിരുന്നു.

കൈ്വവ് ഫൈനലിലെ വിജയം നല്‍കിയ ആത്മവിശ്വാസവുമായി റോമിലേയ്ക്കെത്തിയ വിനേഷ് തൊട്ടതെല്ലാം പൊന്നാക്കുന്ന കാഴ്ചയാണ് പിന്നീട് കാണാനായത്. ാങ്കിംഗില്‍ മൂന്നാം സ്ഥാനക്കാരിയായാണ് വിനേഷ് റോമില്‍ മത്സരത്തിന് ഇറങ്ങിയത്.

എന്നാല്‍ ഫൈനലില്‍ വിജയിച്ച് സ്വര്‍ണ മെഡല്‍ നേടിയതിന് പിന്നാലെ വിനേഷ് ഫൊഗാട്ടിന് 14 പോയിന്റുകള്‍ ലഭിച്ചു. ഇതോടെ തന്റെ കാറ്റഗറിയിലെ ലോക ഒന്നാം നമ്ബര്‍ താരമെന്ന നേട്ടവും വിനേഷ് ഫൊഗാട്ടിനെ തേടിയെത്തി.



അതേസമയം റോമില്‍ നടക്കുന്ന മാറ്റിയോ പെല്ലികോണ്‍ റാങ്കിംഗ് സീരീസ് ഇവന്റില്‍ നാല് ഇന്ത്യന്‍ താരങ്ങള്‍ക്ക് വെങ്കല മെഡല്‍.ഗ്രീക്കോ - റോമന്‍ സ്‌റ്റൈല്‍ ഗുസ്തിയില്‍ 10 ഇന്ത്യക്കാരാണ് പങ്കെടുക്കുന്നത്. ഇവരില്‍ നാല് പേര്‍ മെഡലിന് അര്‍ഹനായി.

55 കിലോ വിഭാഗത്തില്‍ അര്‍ജ്ജുന്‍ ഹാലകുര്‍ക്കി, 63 കിലോ വിഭാഗത്തില്‍ നീരജ്, 72 കിലോ വിഭാഗത്തില്‍ കുല്‍ദീപ് മാലിക്ക്, 130 കിലോ വിഭാഗത്തില്‍ നവീന്‍ എന്നിവരാണ് വെങ്കല മെഡലിന് അര്‍ഹരായത്.