ദേശീയ ഗെയിംസില്‍ കേരളത്തിന് ഇരട്ട വെള്ളിയടക്കം മൂന്നു മെഡലുകള്‍. ഔദ്യോഗികമായി ഗെയിംസ് മിഴിതുറന്ന വ്യാഴാഴ്ച ഫെന്‍സിങ് വനിത വിഭാഗത്തിലും അക്രോബാറ്റിക് ജിംനാസ്റ്റിക്‌സിലുമാണ് വെള്ളിനേട്ടം.

ഗെയിംസില്‍ അരങ്ങേറ്റംകുറിച്ച പെന്‍കാക് സിലാട്ടില്‍ ആന്‍ മരിയ ഏബ്രഹാം വെങ്കലവും സ്വന്തമാക്കി. ഇതോടെ കേരളത്തിന്റെ മൊത്തം മെഡല്‍നേട്ടം നാലായി ഉയര്‍ന്നു.


ഫെന്‍സിങ് വനിത വിഭാഗം സാബര്‍ വ്യക്തിഗത ഇനത്തില്‍ എസ്. സൗമ്യയാണ് വ്യാഴാഴ്ച ആദ്യം വെള്ളിത്തിളക്കം സ്വന്തമാക്കിയത്. ഫൈനലില്‍ തമിഴ്‌നാടിന്റെ ഒളിമ്പ്യന്‍ ഭവാനി ദേവിക്കു മുന്നില്‍ സൗമ്യക്ക് അടിതെറ്റി (155).

തലശ്ശേരി സായി സെന്ററിലെ താരമായ സൗമ്യ കന്യാകുമാരി സ്വദേശിയാണ്. അക്രോബാറ്റിക് ജിംനാസ്റ്റിക്‌സില്‍ പുരുഷ വിഭാഗം ഗ്രൂപ്പിലാണ് രണ്ടാം വെള്ളി നേട്ടം. ഹമ്മദ് നിബ്രാസുല്‍ ഹഖ്, പി.കെ. മുഹമ്മദ് സഫാന്‍, ഷിറില്‍ റുമാന്‍, എം.പി. സ്വാതിക് എന്നിവരായിരുന്നു ടീമംഗങ്ങള്‍. പെന്‍കാക് സിലാട്ടില്‍ ആന്‍ മരിയ ഏബ്രഹാം സെമിഫൈനലില്‍ പ്രവേശിച്ചാണ് വെങ്കലത്തിളക്കം സ്വന്തമാക്കിയത്. സെമിയില്‍ ആന്‍ പരാജയപ്പെട്ടു.

വ്യാഴാഴ്ച നടന്ന നെറ്റ്ബാള്‍ ഫാസ്റ്റ് ഫൈവില്‍ കേരള വനിതകള്‍ സെമിയില്‍ പ്രവേശിച്ചു. ആദ്യ മത്സരത്തില്‍ ആതിഥേയരായ ഗോവയെ പരാജയപ്പെടുത്തിയ കേരളം (26 24) രണ്ടാം മത്സരത്തില്‍ ഹിമാചല്‍പ്രദേശിനെ തകര്‍ത്താണ് (2726) സെമി ബര്‍ത്ത് ഉറപ്പാക്കിയത്. ഇന്ന് നടക്കുന്ന സെമിയില്‍ തെലങ്കാനയാണ് എതിരാളികള്‍.

അതിനിടെ, വോളിബാള്‍ മത്സരം സംഘടിപ്പിക്കാനായി ദേശീയ ഗെയിംസ് അധികൃതര്‍ക്ക് നിര്‍ദേശം നല്‍കണമെന്നാവശ്യപ്പെട്ട് കേരള താരങ്ങള്‍ സമര്‍പ്പിച്ച ഹരജി ഇന്ന് കേരള ഹൈകോടതി പരിഗണനയിലാണ്.