തന്റെ പുതിയ സംരംഭത്തിന്റെ ലോഞ്ചിന് സ്ഥലത്തുണ്ടായിരുന്നിട്ടും എത്താതിരുന്ന ഏകദിന ക്യാപ്റ്റന്‍ മഹേന്ദ്ര സിങ് ധോണിക്കെതിരെ യുവരാജ് സിങ്. ധോണിക്ക് വളരെ തിരക്കാണെന്നും തന്റെ ഫോണെടുക്കാന്‍ പോലും സമയമില്ലെന്നുമാണ് യുവരാജ് പറയുന്നത്. യുഡബ്ലിയുസി ഫാഷന്‍ എന്ന പേരില്‍ യുവരാജിന്റെ വസ്ത്രവില്‍പന രംഗത്തേക്കുള്ള ചുവട് വെയ്പിന് സാക്ഷ്യം വഹിക്കാന്‍ വന്‍ താര നിര എത്തിയെങ്കിലും ധോണി മാത്രം എത്താത്തതിനെക്കുറിച്ചു ചോദിച്ചപ്പോഴാണ് യുവരാജിന്റെ പ്രതികരണം. 

ഞായറാഴ്ചയായിരുന്നു ഫാഷന്‍ രംഗത്തേക്കുള്ള യുവിയുടെ അരങ്ങേറ്റം. അമിതാഭ് ബച്ചന്‍, ദീപിക പദുക്കോണ്‍, ഫര്‍ഹാന്‍ അക്തര്‍, അര്‍ജുന്‍ രാംപാല്‍, ഫറാ ഖാന്‍ തുടങ്ങിയ ചലച്ചിത്ര താരങ്ങളും ക്രിക്കറ്റില്‍ നിന്നും വീരേന്ദ്ര സെവാഗ്, ക്രിസ് ഗെയ്ല്‍, ഡ്വെയ്ന്‍ ബ്രാവോ, ഇര്‍ഫാന്‍ പത്താന്‍, സഹീര്‍ ഖാന്‍ തുടങ്ങിയ പ്രമുഖരും എത്തിച്ചേര്‍ന്നിരുന്നു. എന്നാല്‍ താരപ്രഭക്കിടയിലും എല്ലാവരും ശ്രദ്ധിച്ചത് ധോണിയുടെ അസാന്നിധ്യമായിരുന്നു. 

'എനിക്ക് തോന്നുന്നു ധോണി വളരെ തിരക്കിലാണ് എന്ന്. ഞാന്‍ ധോണിയെ ബന്ധപ്പെടാന്‍ ശ്രമിച്ചിരുന്നു. ധോണി ആരുടെയും ഫോണ്‍ എടുക്കാറില്ല എന്ന് തോന്നുന്നു. ട്വന്റി 20 ക്രിക്കറ്റുമായി ബന്ധപ്പെട്ട് അദ്ദേഹം തിരിക്കിലായിരിക്കും, എന്തായാലും ധോണിയുടെ സഹായം എനിക്കുണ്ടാകും എന്ന് തന്നെയാണ് കരുതുന്നത്-യുവരാജ് പറയുന്നു. 

നേരത്തെ വി വി എസ് ലക്ഷ്മണും ഐപിഎല്‍ ധോണിയുടെ ടീം ഉടമയും ധോണിയെ വിളിച്ചാല്‍ ഫോണ്‍ എടുക്കാറില്ല എന്ന പരാതിയുമായി രംഗത്തു വന്നിരുന്നു. എന്നാല്‍ യുവരാജ് സിങിന്റെ വാക്കുകളോട് ധോണി ഇതുവരെ പ്രതികരിച്ചിട്ടില്ല.