സച്ചിന്‍ ടെന്‍ഡുല്‍ക്കറിന്റെ ആദ്യ ഏകദിന ക്രിക്കറ്റ് സെഞ്ചുറിക്ക് ഇന്ന് 22 വയസ്സ് പൂര്‍ത്തിയാവുന്നു. ഓസ്‌ട്രേലിയയ്‌ക്കെതിരെ 1994 സെപ്റ്റംബര്‍ ഒമ്പതിനായിരുന്നു സച്ചിന്‍ തന്റെ ആദ്യ സെഞ്ചുറി നേടുന്നത്.

സച്ചിന്റെ ബാറ്റില്‍ നിന്ന് 110 റണ്‍സ് പിറന്ന മത്സരത്തില്‍ ഓസ്‌ട്രേലിയയെ ഇന്ത്യ 31 റണ്‍സിന് പരാജയപ്പെടുത്തി. പിന്നീട് അതേ വര്‍ഷം തന്നെ ന്യൂസിലാന്‍ഡിനെതിരെ ഒക്ടോബറിലും വെസ്റ്റ് ഇന്‍ഡീസിനെതിരെ നവംബറിലും സച്ചിന്‍ ഏകദിന സെഞ്ചുറി നേടി. 49 ഏകദിന സെഞ്ചുറികളും 51 ടെസ്റ്റ സെഞ്ചുറികളുമാണ് പിന്നീട് തുടര്‍ച്ചയായി നേടിയത്.

അന്താരാഷ്ട്ര ക്രിക്കറ്റില്‍ നൂറു ശതകങ്ങള്‍ തികച്ച ആദ്യത്തെ കളിക്കാരനാണ് സച്ചിന്‍. 2012 മാര്‍ച്ച് 16നു ധാക്കയിലെ മിര്‍പ്പൂരില്‍ ബംഗ്ലാദേശിനെതിരെ നടന്ന ഏഷ്യാ കപ്പ് ഗ്രൂപ്പ് ഏകദിനമത്സരത്തിലാണ് സച്ചിന്‍ തന്റെ നൂറാം ശതകം തികച്ചത്. ടെസ്റ്റ് ക്രിക്കറ്റിലും, ഏകദിന ക്രിക്കറ്റിലുമായി നിരവധി റെക്കോര്‍ഡുകള്‍ സച്ചിന്റെ പേരിലുണ്ട്. ഏകദിന ക്രിക്കറ്റിലും, ടെസ്റ്റ് ക്രിക്കറ്റിലും നിലവില്‍ ഏറ്റവും കൂടുതല്‍ റണ്‍സ് നേടിയിട്ടുള്ള കളിക്കാരനാണ് ഇദ്ദേഹം. 2011 ല്‍ സച്ചിന്‍ ലോക കപ്പില്‍ രണ്ടായിരം റണ്‍സെടുക്കുന്ന ആദ്യ ബാറ്റ്‌സ്മാനായി.

440 ഏകദിന മത്സരങ്ങളിലായി 17000ത്തില്‍ അധികം റണ്‍സ് ഇദ്ദേഹം നേടിയിട്ടുണ്ട് . 17,000 റണ്‍സ് തികച്ച ഏക ക്രിക്കറ്റ് കളിക്കാരനുമാണ് സച്ചിന്‍. ടെസ്റ്റ് ക്രിക്കറ്റില്‍ 11,000 റണ്‍സ് പിന്നിടുന്ന മൂന്നാമത്തെ കളിക്കാരനും, ആദ്യത്തെ ഇന്ത്യക്കാരനുമാണ് സച്ചിന്‍. ടെസ്റ്റിലും ഏക ദിനത്തിലും ഏറ്റവും കൂടുതല്‍ സെഞ്ചുറികള്‍ എന്ന റെക്കോര്‍ഡും സച്ചിന്റെ പേരിലാണ്. ഏക ദിനത്തിലെ ഏറ്റവും ഉയര്‍ന്ന ആറാമത്തെ വ്യക്തിഗത സ്‌കോറിന്റെ ഉടമയായ (24 ഫെബ്രുവരി 2010നു ദക്ഷിണആഫ്രിക്കക്കെതിരെ ഗ്വാളിയോറില്‍ വെച്ചു പുറത്താവാതെ 200 റണ്‍സ്) സച്ചിന്‍, ഏക ദിന ക്രിക്കറ്റില്‍ ഇരട്ട ശതകം നേടിയ ആദ്യത്തെ കളിക്കാരനുമാണ്.

2009 നവംബര്‍ 5ന് ഹൈദരാബാദില്‍ വെച്ച് നടന്ന ഇന്ത്യആസ്‌ട്രേലിയ ഏക ദിന പരമ്പരയിലെ മത്സരത്തില്‍, 17000 റണ്‍സ് തികയ്ക്കുന്ന ലോകത്തിലെ ആദ്യത്തെ താരം എന്ന ബഹുമതിയും സച്ചിന്‍ നേടി. ടെസ്റ്റ് ക്രിക്കറ്റിലെ സച്ചിന്റെ ഉയര്‍ന്ന സ്‌കോര്‍ ബംഗ്ലാദേശിനെതിരെ 2004ല്‍ നേടിയ 248 റണ്‍സ് ആണ്. മാസ്റ്റര്‍ ബ്ലാസ്റ്റര്‍ എന്ന വിളിപ്പേരില്‍ അറിയപ്പെടുന്ന സച്ചിന്‍, 14ആമത്തെ വയസ്സില്‍ ആഭ്യന്തര ക്രിക്കറ്റില്‍ മുംബൈ ക്രിക്കറ്റ് ടീമിനു വേണ്ടി കളിക്കുകയും ആദ്യ മത്സരത്തില്‍ തന്നെ സെഞ്ച്വറി തികക്കുകയും ചെയ്തു. പിന്നീട് 1989 ല്‍ തന്റെ പതിനാറാം വയസ്സില്‍ പാകിസ്ഥാന്‍ ക്രിക്കറ്റ് ടീമിനെതിരെ കറാച്ചിയില്‍ അന്താരാഷ്ട്ര ക്രിക്കറ്റില്‍ അരങ്ങേറ്റം നടത്തി.