അഴകേറും പാദങ്ങള്‍ക്ക്
കൃത്യമായ പരിചരണത്തിന്റെ അഭാവമാണു പാദങ്ങളിലെ ചര്‍മത്തെ പരുക്കനാക്കുകയും വിണ്ടു കീറാന്‍ ഇടയാക്കുകയും ചെയ്യുന്നത്. നടക്കുക, നില്‍ക്കുക തുടങ്ങിയ പ്രവൃത്തികള്‍ ഏറെനേരം ചെയ്യുന്നതു പാദങ്ങള്‍ക്കു സമ്മര്‍ദ്ദമുണ്ടാക്കും. ഇത്തരത്തില്‍ ദിവസം അഞ്ച് മണിക്കൂറിലധികം നേരം സമ്മര്‍ദ്ദമുണ്ടാകുന്നതും തുറന്ന ചെരുപ്പുകള്‍ പതിവായി അണിയുന്നതും പാദം വിണ്ടുകീറാന്‍ ഇടയാക്കും. എന്നും അല്‍പനേരം പരിചരണത്തിനായി മാറ്റിവച്ചാല്‍ എത്രപരുക്കന്‍ പാദവും പട്ടു പോലെയാകും.
അഴകേകും ഫൂട്ട് സ്പാ
ഒരു ബേസിനില്‍ (പരന്ന പാത്രമാണു വേണ്ടത്. ബക്കറ്റ് ഒഴിവാക്കുക.) ഇളം ചൂടുവെള്ളമെടുക്കുക. ഇതില്‍ ഒരു കൈ നിറയെ കല്ലുപ്പ്, ഇന്തുപ്പ്(എപ്‌സം സാള്‍ട്ട്), ആലം എന്നിവ ചേര്‍ക്കുക. ഈ മൂന്നു ചേരുവയും അലിഞ്ഞു തീരുന്നതു വരെ കാലുകള്‍ മുക്കി വയ്ക്കുക. ഇതിനു ശേഷം പുമിസ് സ്‌റ്റോണ്‍ ഉപയോഗിച്ചു പാദങ്ങള്‍ ഉരച്ചു വൃത്തിയായി കഴുക്കണം. പദാങ്ങളിലെ വരണ്ടതും പരുക്കനുമായ ചര്‍മത്തെ ഇല്ലാതാക്കാന്‍ ഇതു സഹായിക്കും.
ഇന്തുപ്പും ആലവും കിട്ടാനില്ലെങ്കില്‍ കല്ലുപ്പ് മാത്രം ചേര്‍ത്തും ഈ ഫൂട്ട് സ്പാ ചെയ്യാം. ഇതിനുശേഷം അല്‍പം ബോഡിവാഷ് പാദങ്ങളില്‍ പുരട്ടുക. മൃദുവായി വേണം ഇവ പുരട്ടേണ്ടത്. ചര്‍മത്തിന്റെ വരള്‍ച്ച ഇല്ലാതാക്കാന്‍ ഇതു സഹായിക്കും. പാദം നന്നായി കഴുകി ശേഷം ഒരു ടവ്വല്‍ കൊണ്ട് നനവ് ഒപ്പി മാറ്റുക. ഇനി പാദങ്ങള്‍ക്കു വേണ്ടിയുള്ള മോയ്‌സ്ചറൈസിങ് ക്രീം പുരട്ടുക.
പ്രകൃതിദത്തമായ കല്ലുപ്പ് മൃതകോശങ്ങളെ അകറ്റി ചര്‍മത്തെ വൃത്തിയാക്കും. മഗ്‌നീഷ്യം സള്‍ഫേറ്റ് അഥവാ ഇന്തുപ്പ് പാദങ്ങളെ മൃദുലമാക്കാനും മസിലുകള്‍ക്കനുഭവപ്പെടുന്ന വേദന ഇല്ലാതാക്കാനും സഹായിക്കും. ആലം പാദങ്ങളിലെ ചര്‍മത്തെ മൃദുലമാക്കുകയും വിണ്ടുകീറല്‍ ഇല്ലാകതാക്കുകയും ചെയ്യും.
കാലുകളുടെ സമ്മര്‍ദ്ദമകറ്റാനും കാല്‍പാദത്തിന്റ വേദനയകറ്റാനും ഈ ഫുട്ട് സ്പാ സഹായിക്കും. നഖങ്ങള്‍ക്കടിയിലെ മഞ്ഞ നിറമകറ്റാനും ഇത് ഉത്തമമാണ്. അടിക്കടി നഖങ്ങളില്‍ നെയ്ല്‍ പോളിഷ് ഇടുന്നവര്‍ ഈ സ്പാ ചെയ്യുന്നതു നഖങ്ങളുടെ ആരോഗ്യത്തെ മെച്ചപ്പെടുത്താന്‍ സഹായിക്കും.
നിറം നല്‍കും ഫൂട്ട് മാസ്‌ക്
ഇടത്തരം വലുപ്പമുള്ള ഒരു കാരറ്റ് കുഴമ്പായി അരച്ചെടുക്കുക. ഇതില്‍ ഒരു തക്കാളിയുടെ നീര് കൈ കൊണ്ടു പിഴിഞ്ഞെടുത്തതും ഒരു നാരങ്ങയുടെ നീരും അല്‍പം പാലും ചേര്‍ത്തു മിശ്രിതമാക്കുക. സെന്‍സിറ്റീവ് ചര്‍മമുള്ളവര്‍ നാരങ്ങാനീര് രണ്ടോ മൂന്നോ തുള്ളി ചേര്‍ത്താല്‍ മതി. ഒപ്പം അല്‍പം തേനും ചേര്‍ക്കുക. ഈ മിശ്രിതം പതിനഞ്ച് മിനിറ്റ് നേരം ഫ്രിഡ്ജില്‍ വച്ചതിനു ശേഷം വേണം പാദങ്ങളില്‍ പുരട്ടാന്‍.
മാസ്‌ക് പാദങ്ങളില്‍ പുരട്ടുന്നതിനു മുമ്പ് സോപ്പോ ബോഡി വാഷോ കൊണ്ട് നന്നായി കഴുകി വൃത്തിയാക്കുക. മൃദുലമായ ടവ്വര്‍ കൊണ്ട് നനവ് ഒപ്പി മാറ്റണം. ഇനി ഒരു ബ്രഷോ കൈവിരല്‍ത്തുമ്പുകളോ ഉപയോഗിച്ച് ഈ മിശ്രിതം പാദങ്ങളില്‍ നന്നായി പുരട്ടുക. പതിനഞ്ച് മിനിറ്റിനു ശേഷം വെള്ളം കൊണ്ടു കഴുകിക്കളയണം. ആവശ്യമെങ്കില്‍ മൈല്‍ഡ് ബേബി സോപ്പ് ഉപയോഗിച്ചു വൃത്തിയാക്കാം.ആഴ്ചയിലൊരിക്കല്‍ ഇതു ചെയ്യുന്നതു പാദങ്ങളിലെ കരുവാളിപ്പും നിറവ്യത്യാസവുമകറ്റി നിറവും തിളക്കവും ലഭിക്കാന്‍ സഹായിക്കും..
മൂന്നു വലിയ സ്പൂണ്‍ അരി തരിയായി പൊടിച്ചെടുത്തതില്‍ ഒരു ചെറിയ സ്പൂണ്‍ വീതം തേനും വെളിച്ചെണ്ണയും ചേര്‍ത്തു പുരട്ടുക. ഇരുപത് മിനിറ്റ് കഴിഞ്ഞു കഴുകി വൃത്തിയാക്കുക. ഇതു ചര്‍മം മൃദുലമാകാന്‍ സഹായിക്കും.
മൂന്ന് വലിയ സ്പൂണ്‍ ഓട്‌സ് തരിയായി പൊടിച്ചതില്‍ ഒരു വലിയ സ്പൂണ്‍ വെളിച്ചെണ്ണ ചേര്‍ത്തു പാദങ്ങളില്‍ മാസ്‌കായി പുരട്ടുക. ഒരു ഫോയില്‍ കൊണ്ടു പൊതിയുക. അര മണിക്കൂറിനു ശേഷം കഴുകി വൃത്തിയാക്കണം. ഇതു പാദങ്ങളിലെ വരണ്ട ചര്‍മത്തെയും മൃതകോശങ്ങളെയും അകറ്റി പാദം സുന്ദരമാക്കും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
