മൂന്നാറിനെ കുത്തക മുതലാളിമാർ പകുത്തെടുക്കുന്നത് കണ്ടിട്ടും കണ്ണടച്ചു ഇരുട്ടാക്കുന്ന സർക്കാരുകൾ അവിടുത്തെ പരിസ്ഥിതി പ്രശ്നവും മലിനീകരണവും മനപ്പൂർവം വിസ്മരിച്ചു. ഹൈറേഞ്ചിന്റെ കാലാവസ്ഥ വ്യതിയാനം കണ്ടിട്ടും കണ്ടില്ലെന്നു നടിച്ചു. മൂന്നാറിലെ ചൂടു ക്രമാതീതമായിട് ഉയരുകയാണ്. ഹൈറേഞ്ചും കോടമഞ്ഞും തണുത്ത കാലാവസ്ഥയുമൊന്നും ഇല്ലാത്ത മൂന്നാറിനെ സഞ്ചാരികൾക്കു വേണ്ടാതാകും. ഇത് നമ്മുടെ ടൂറിസം മേഖലയെയും അതുമായി ബന്ധപെട്ടു കിടക്കുന്ന മറ്റു മേഖലകളെയും ബാധിക്കും.
ജലസ്രോതസുകളായ പുൽമേടുകൾ നശിപ്പിക്കപ്പെട്ടു. ഇത് അവിടുത്തെ ആവാസവ്യവസ്ഥിതിയെ തന്നെ സാരമായി ബാധിച്ചിട്ടുണ്ട്. ഹോട്ടലുകൾക്കുവേണ്ടിയുള്ള വനനശീകരണമാണ് ഇതിൽ പ്രധാനം. മൂന്നാറിൽ 250 ഓളം ഹോട്ടലുകളും റിസോർട്ടുകളും ഉണ്ട്. പരിസ്ഥിക്കു ഇണങ്ങാത്ത നിർമ്മിതികളും വാഹനപ്പെരുപ്പവും പരിസ്ഥിതിപ്രശ്നങ്ങൾക് സാഹചര്യമൊരുക്കുന്നു.
ചിന്നാർ വന്യജീവി സംഗീതത്തിലൂടെ പ്രതിവർഷം രണ്ടു ലക്ഷത്തോളം വാഹനങ്ങളാണ് കടന്നുപോകുന്നത്. വരയാടുകളുടെ വാസസ്ഥലമായ ഇരവികുളത്തെ സ്ഥിതിയും വ്യത്യസ്തമല്ല. മൂന്നാറിൽ മാത്രം പ്രതിവർഷം 4745 ടൺ ഖാരമാലിന്യം സൃഷ്ടിക്കപ്പെടുന്നു. ഇവ നേരാംവണ്ണം സംസ്കരിക്കപ്പെടാൻ സർക്കാർ നടപടികളൊന്നും എടുത്തിട്ടില്ല. ചില ഹോട്ടലുകളിൽ നിന്നുള്ള മനുഷ്യ വിസർജ്യം മുതിരംപുഴയാറിലേക്കാണ് തുറന്നുവിടുന്നത്.
പ്രധാന ടൂറിസ്റ്റ് കേന്ദ്രങ്ങളായ ഇരവികുളം, മതികെട്ടാൻ, പാമ്പാടുംചോല എന്നിവിടങ്ങളിലാണ് ഭൂമി കയ്യേറ്റവും, അനധികൃത നിർമ്മാണങ്ങളും നടക്കുന്നത്. ഇതും പാരിസ്ഥിതിക പ്രശ്നങ്ങൾ സൃഷ്ടിക്കുന്നതോടൊപ്പം പ്രകൃതിയുടെ സൗന്ദര്യവും നശിപ്പിക്കുന്നു. കെ.ഡി.എച് വില്ലേജിൽ മാത്രം 1200 ഏക്കർ ഭൂമി കയ്യേറിയിട്ടുണ്ട്. പുതിയ കെട്ടിടങ്ങൾക് നിർമാണാനുമതി ഇല്ലാത്തതിനാൽ പഴയ കെട്ടിട നമ്പർ ഉപയോഗിച്ചാണ് റിസോർട്ടുകൾ ഉയരുന്നത്.
1999 -ൽ പട്ടയവിതരണം തുടങ്ങി. 160 അപേക്ഷകളാണ് കെ.ഡി.എച് വില്ലേജിൽനിന്നും ഉണ്ടായിരുന്നത്. പട്ടയമേള അന്ന് അവസാനിച്ചിരുന്നെങ്കിലും അന്നത്തെ തീയതിയിൽ ഇന്നും പട്ടയം കിട്ടുന്ന അവസ്ഥയാണ്. ബാഗ് നിറയെ പണവുമായി ഹൈറേൻജ് കായുന്നവർ തിരികെ പോകുന്നത് റിസോർട് ഉടമകളായിട്ടാണ്. സർക്കാരുകൾ ഇതൊന്നും കണ്ടില്ലന്നു നടിക്കുന്നതാണ് ഇതിന്റെ കാരണം എന്ന് വ്യക്തമാണല്ലോ. ക്രമാതീതമായി ഉയർന്നുവരുന്ന ബഹുനില കെട്ടിടങ്ങൾ നിയമലംഘനങ്ങളുടെ സാക്ഷ്യപത്രമാകുന്നു.