ദൈവത്തിന്റെ സ്വന്തം നാടായ കേരളം പ്രകൃതി മനോഹാരിത കൊണ്ട് സമ്പന്നമാണല്ലോ. പുഴകളും, പൂക്കളും, അരുവികളും, മലനിരകളും ഇങ്ങനെ നീണ്ടുപോകുന്നു കേരളത്തിന്റെ വർണ്ണനാതീതമായ സൗന്ദര്യം. കേരളത്തിലെ ദ്വീപുകളും ആകർഷണീയം തന്നെ. ഏകാന്തതയുടെ പ്രതീകമായ കേവലം തുരുത്തുകൾ മാത്രമല്ല ദ്വീപുകൾ. മനസിന് സന്തോഷവും കുളിർമയും പകർന്നു നൽകുന്ന ദ്വീപുകളുമുണ്ട്. നമുക്ക് അവയെ പരിചയപ്പെടാം. വയനാട്ടിലെ കുറുവദ്വീപും, കണ്ണൂരിന് അടുത്തുള്ള ധർമ്മടം തുരുത്തും. കൊല്ലം ജില്ലയിലെ മൺറോ തുരുത്തും കേരളത്തിലെ പ്രശസ്തമായ ദ്വീപുകളാണ്.
1. ധർമ്മടം തുരുത്ത്
കണ്ണൂർ ജില്ലയിലാണ് പ്രശസ്തമായ ധർമ്മടം തുരുത്ത് സ്ഥിതി ചെയ്യുന്നത്. കണ്ണൂർ തലശ്ശേരി റോഡിലൂടെ യാത്ര ചെയ്യുമ്പോൾ ധർമ്മടം എന്ന സ്ഥലത്ത് എത്താം. ധര്‍മടത്തുനിന്നും കേവലം 100 മീറ്റര്‍ മാത്രം മാറിയാണ് മനോഹരമായ പ്രകൃതിക്കാഴ്ചകള്‍ക്കു പേരുകേട്ട ധര്‍മടം തുരുത്ത് സ്ഥിതിചെയ്യുന്നത്. ധർമ്മടം തുരുത്തിലേക്ക് പ്രവേശിക്കാൻ മുൻകൂട്ടിയുള്ള അനുമതി വാങ്ങണം.

2. മണ്‍റോ തുരുത്ത്‌
മണ്‍റോ തുരുത്ത്‌ സ്ഥിതി ചെയ്യുന്നത് കൊല്ലത്താണ്. എട്ട്‌ ചെറുദ്വീപുകളുടെ കൂട്ടമാണ്‌ ഈ തുരുത്ത്. ഈ മേഖലയില്‍ കനാലുകള്‍ നിര്‍മ്മിക്കുന്നതിനും കായല്‍പ്പാതകള്‍ തമ്മില്‍ ബന്ധിപ്പിക്കുന്നതിനും മുന്‍കൈ എടുത്ത ബ്രട്ടീഷ്‌ ഉദ്യോഗസ്ഥനായ കേണല്‍ ജോണ്‍ മണ്‍റോയുടെ പേരിലാണ്‌ ഈ ദ്വീപ് സമൂഹം അറിയപ്പെടുന്നത്‌. കൊല്ലം ജില്ലയുടെ ഭാഗമായ ഇവിടേക്ക് റോഡ്‌ മാര്‍ഗ്ഗവും കായല്‍ മാര്‍ഗ്ഗവും എത്താവുന്നതാണ്‌.

3. കുറുവ ദ്വീപ്
കബനി നദിയിലെ ദ്വീപാണ് കുറുവ ദ്വീപ്. വര്‍ഷം മുഴുവന്‍ പച്ചപ്പ് നിറഞ്ഞുനില്‍ക്കുന്നു എന്നതാണിവിടുത്തെ പ്രത്യേകത. വയനാട്ടിലെ പ്രമുഖനദിയാണ് കബനി. ഒപ്പം കിഴക്കോട്ടൊഴുകുന്ന കേരളത്തിലെ മൂന്ന് നദികളില്‍ ഒന്നുകൂടിയാണ് കബനി. നിത്യഹരിതമരങ്ങള്‍ വളരുന്ന കുറുവ ദ്വീപ് സഞ്ചാരികളുടെ പ്രിയപ്പെട്ട കേന്ദ്രമാണ്. അത്യപൂര്‍വ്വമായ പക്ഷികളുടെ ആവാസകേന്ദ്രം കൂടിയാണ് കുറുവ ദ്വീപ്.

4. വലിയപറമ്പ് ദ്വീപ്
കാസർകോട് ജില്ലയിലെ കവ്വായി കായലിലാണ് വലിയപറമ്പ് ദ്വീപ് സ്ഥിതി ചെയ്യുന്നത്. ഒന്നിലധികം തുരുത്തുകൾ ചേർന്ന ഈ ദ്വീപ് കാസർകോട് എത്തുന്ന വിനോദ സഞ്ചാരികളുടെ വലിയ ആക്ർഷണമാണ്. ബേക്കലിൽ നിന്ന് 30 കിലോമീറ്റർ യാത്ര ചെയ്താൽ ഈ ദ്വീപിൽ എത്താം.

5. വൈപ്പിൻ‌ ദ്വീപ്
1331ൽ എറണാകുളം ജില്ലയിൽ രൂപപ്പെട്ട ദ്വീപാണ് വൈപ്പിൻ‌. ടൂറിസ്റ്റുകളുടെ പ്രധാന സന്ദർശന കേന്ദ്രങ്ങളായ പുതുവൈപ്പ്ബീച്ച്, ചെറായിബീച്ച് എന്നിവ ഈ തീരങ്ങളിലാണ്.

6. വെല്ലിംഗ്ടണ്‍ ഐലന്റ്
വേമ്പനാട്ട് കായലില്‍ 1936 ലാണ് വെല്ലിംഗ്ടണ്‍ ഐലന്റ് നിര്‍മിക്കപ്പെട്ടത്. കൊച്ചി തുറമുഖത്തിന്റെ ശില്പിയായിരുന്ന റോബര്‍ട്ട് ബ്രിസ്‌റ്റോയുടെ ദീര്‍ഘ വീക്ഷണമാണ് വെല്ലിംഗ്ടണ്‍ ഐലന്റ് എന്ന് പറയാം. മുന്‍ വൈസ്രോയിയാരുന്ന വെല്ലിംഗ്ടന്റെ സ്മരണ നിലനിര്‍ത്തുന്നതിനാണ് ഇതിന് വെല്ലിംഗ്ടണ്‍ ഐലന്റ് എന്ന പേര് നല്‍കിയിരിക്കുന്നത്. ഇതും ഒരു സഞ്ചാര കേന്ദ്രം തന്നെയാണ്.

7. കവ്വായി ദ്വീപ്
കണ്ണൂർ ജില്ലയിലെ പയ്യന്നൂരിനടുത്തായാണ് കവ്വായി ദ്വീപ് സ്ഥിതി ചെയ്യുന്നത്. കവ്വായി നദിക്ക് കുറുകെ നിർമ്മിച്ച ചെറിയപാലമാണ് കവ്വായി നിവാസികളെ പയ്യന്നൂരുമായി ബന്ധിപ്പിക്കുന്നത്.