ത്യശ്ശൂര്‍ പാറന്നൂര്‍ ചിറ ടൂറിസം വില്ലേജില്‍ ജലസൗന്ദര്യത്തിന്റെ മനം നിറയ്ക്കുന്ന കാഴ്ചകള്‍ കാണാന്‍ സഞ്ചാരികളുടെ തിരക്കേറി.

കാലവര്‍ഷത്തെ തുടര്‍ന്ന് വാഴാനി ഡാമില്‍നിന്ന് വെള്ളം കൂടുതല്‍ പുഴയിലൂടെ ഒഴുകിയെത്തിയതോടെ ചിറയും തോടുകളും നിറഞ്ഞൊഴുകുകയാണ്.

വെള്ളത്തിന്റെ ഒഴുക്ക് ശക്തി പ്രാപിച്ചതോടെ പാറന്നൂര്‍ ചിറയിലെ മൂന്ന് ചിറകളും തുറന്നിരിക്കുകയാണ്.

ഇതോടെ ഗ്രാമഭംഗി ആസ്വദിക്കാനും വെള്ളത്തില്‍ നീരാടാനുമായി ഒട്ടേറെ വിനോദ സഞ്ചാരികളാണ് ചിറയില്‍ എത്തുന്നത്. ചിറകളിലെ വെള്ളച്ചാട്ടവും പച്ചപ്പ് നിറഞ്ഞ പാടശേഖരങ്ങളെ മുറിച്ചൊഴുകുന്ന പുഴയും സഞ്ചാരികള്‍ക്ക് കൗതുകമാകുന്നു.

ചൂണ്ടല്‍ പഞ്ചായത്തിലെ പ്രധാന ജലസംഭരണിയായ പാറന്നൂര്‍ ചിറ ടൂറിസം വില്ലേജില്‍ ഇത്തവണ സഞ്ചാരികള്‍ക്കായി കുതിര സവാരിയും ഏര്‍പ്പെടുത്തിയിട്ടുണ്ട്.

വെള്ളച്ചാട്ടത്തിന്റെ സമീപത്തുനിന്ന് ഫോട്ടോയെടുക്കാനും ചൂണ്ടയിടാനുമായി ധാരാളം പേര്‍ ഇപ്പോള്‍ ചിറയിലെത്തുന്നുണ്ട്.