ഇടുക്കി ജലാശയത്തിന്റേയും വന്യജീവി സങ്കേതത്തിന്റേയും മാസ്മരിക ഭംഗി ആസ്വദിച്ച് കഴിയാന് ഇക്കോ ടൂറിസം ജംഗിള് കോട്ടേജുകള്
കേരളത്തില് അന്പത് ശതമാനത്തിലധികം സംരക്ഷിത വനഭൂമിയുള്ള ജില്ലയാണ് ഇടുക്കി. തികച്ചും വ്യത്യസ്തമായ ഭൂപ്രകൃതിയുള്ള ഇടുക്കി ജില്ലയുടെ 97 ശതമാനം പ്രദേശങ്ങളും കാടുകളും മലകളുമാണ്.
സമുദ്രനിരപ്പില് നിന്ന് 2000 മീറ്ററിലധികം ഉയരമുള്ള 14 കൊടുമുടികള് ഇവിടെയുണ്ട്. ആനമുടിയും, മീശപ്പുലിമലയുമെല്ലാം ഇവിടെ തന്നെയാണ്. സുഗന്ധദ്രവ്യങ്ങളുടെ നാടായ ഇടുക്കി കൂടുതല് അറിയപ്പെടുന്നത് ഇടുക്കി ഡാമിന്റെ പേരിലുമാണ്.
കാനന ഭംഗിയില് ഇടവപ്പാതി മഴയും ആസ്വദിച്ച് കഴിയാന് ഇടുക്കി ജലാശയത്തോട് ചേര്ന്ന് നിരവധി സ്ഥലങ്ങളുണ്ട്. എന്നാല് ഇടുക്കി വന്യജീവി സങ്കേതം ഇക്കോ ടൂറിസം ജംഗിള് കോട്ടേജുകള് ഈ കാനനവാസത്തിന് പുതിയ തലങ്ങള് ഒരുക്കുന്നു.
ഇടുക്കിയില് വെള്ളാപ്പാറയില് ചെറുതോണി - തൊടുപുഴ റോഡില് നിന്നും ഇടുക്കി ഇക്കോ ടൂറിസം ബോട്ട് ലാന്ഡിംഗിലേക്കുള്ള വഴിയിലാണ് ജംഗിള് കോട്ടേജുകള് സ്ഥിതി ചെയ്യുന്നത്.
പില്ലറുകളില് അഷ്ടഭുജക്ഷേത്ര രൂപത്തില് നിര്മ്മിച്ചിരിക്കുന്ന കോട്ടേജുകളില് സുഖകരമായ താമസത്തിനുള്ള എല്ലാ സൗകര്യങ്ങളും ഒരുക്കിയിരിക്കുന്നു. കോട്ടേജുകളുടെ പുറം ചുവരുകളില് മനോഹരമായ രേഖാചിത്രങ്ങള് ആലേഖനം ചെയ്തിരിക്കുന്നു.
എല്ലാ ടെന്ഷനുകളും വിട്ട് കാട്ടില് താമസിക്കണോ? എങ്കില് ഇടുക്കിയില് വനംവകുപ്പിന്റെ ലേക്ക് വ്യൂ നെസ്റ്റിലേക്ക് പോരുന്നത് മികച്ച ഓപ്ഷനാണ്. ഇടുക്കി ജലാശയത്തിന്റേയും ഇടുക്കി വന്യജീവി സങ്കേതത്തിന്റേയും മാസ്മരിക ഭംഗി ഈ കെട്ടിടത്തില് നിന്ന് ആസ്വദിക്കുന്നത് ഒരു വ്യത്യസ്തമായ അനുഭൂതിയാണ്.
കാനന ഭംഗി മുറികളിലേക്ക് ഒഴുകി എത്തുന്നതിനായി മുന്ഭാഗം പൂര്ണ്ണമായും കണ്ണാടിയിലാണ് നിര്മ്മിതി. കാഴ്ച മനോഹരമാക്കാനും താമസക്കാരുടെ സുരക്ഷ ഉറപ്പാക്കുന്നതിനും പില്ലറുകളിലാണ് ലേക്ക് വ്യൂ നെസ്റ്റ് പണിതിരിക്കുന്നത്. എല്ലാ ആധുനിക സൗകര്യങ്ങളും റൂമുകളില് ഒരുക്കിയിട്ടുണ്ട്. ഇടുക്കി ഫോറസ്റ്റ് ഡെവലപ്പ്മെന്റ് ഏജന്സിയുടെ കീഴിലാണ് ലേക്ക് വ്യൂ നെസ്റ്റ് പ്രവര്ത്തിക്കുന്നത്.
കാനനകാഴ്ച്ചകളും ഗംഭീരങ്ങളായ ചെറുതോണി ഡാമും ഇടുക്കി ആര്ച്ച് ഡാമും കണ്ട് ഇടുക്കി ജലാശയത്തിലൂടെ ബോട്ട് സവാരി വനംവകുപ്പ് ഒരുക്കിയിരിക്കുന്നു. ഇടുക്കി ഫോറസ്റ്റ് ഡെവലപ്പ്മെന്റ് ഏജന്സിയുടെ കീഴില് പ്രവര്ത്തിക്കുന്ന ഇടുക്കി ഇക്കോ ടൂറിസമാണ് ബോട്ടിങ് നടത്തുന്നത്.
വിസ്താരമേറിയ ഇടുക്കി റിസര്വോയറിലൂടെയുള്ള ബോട്ടിങ് ടൂറിസ്റ്റുകള്ക്ക് വേറിട്ട ഒരനുഭവം പ്രദാനം ചെയ്യുന്നു. വന്യജീവികളെയും കാട്ടുകൊമ്പന്മാരെയും കണ്ട് വനംവകുപ്പിന്റെ കൊലുമ്പന് ബോട്ടില് ഒരു സവാരി നടത്താം. (ബുക്കിങ്ങിനായി ബന്ധപ്പെടേണ്ട നമ്പറുകള്: 8547603184 & 9496821481)
https://www.facebook.com/Malayalivartha