ചാത്തന്നൂര്‍ കൃഷിഭവന്റെ മട്ടുപ്പാവില്‍ മണ്ണില്ലാകൃഷി
ചാത്തന്നൂര്‍ കൃഷിഭവനിലെ ആഗ്രോ സര്‍വീസ് സെന്റര്‍ മട്ടുപ്പാവില്‍ മണ്ണില്ലാ കൃഷിയൊരുക്കി. ചാത്തന്നൂര്‍ മിനി സിവില്‍ സ്റ്റേഷന്‍ കെട്ടിടത്തിന്റെ മട്ടുപ്പാവില്‍ 350 ഗ്രോബാഗുകളിലാണ് മണ്ണില്ലാ കൃഷി. ചകിരിച്ചോറ്, ചാണകപ്പൊടി, ന്യൂസ് പേപ്പര്‍ എന്നിവയാണ് മണ്ണ് ഉപയോഗിക്കാതെയുള്ള കൃഷി സമ്പ്രദായത്തില്‍ ഗ്രോബാഗുകളില്‍ നിറയ്ക്കുന്നത്.
ജലസേചനം നടത്തുന്നത് തിരി നനരീതിയിലാണ്. 20 മുതല്‍ 35 സെന്റീമീറ്റര്‍ നീളത്തില്‍ തുണി എടുത്ത് കുഴല്‍ രൂപത്തില്‍ തുന്നി എടുക്കും. അതില്‍ ചകിരി ചോറ് കമ്പോസ്റ്റ് നിറയ്ക്കും. ഇതാണ് തിരി നനയ്ക്കുള്ള സംവിധാനം. ഇത് മൂന്നിഞ്ച് വ്യാസമുള്ള പി.വി.സി പൈപ്പിന് മുകളില്‍ ചെറിയ സുഷിരങ്ങളുണ്ടാക്കി അതില്‍ ഉറപ്പിക്കും. ഗ്രോബാഗിന്റെ ചുവടു തുളച്ചുണ്ടാക്കിയ സുഷിരത്തിലൂടെ തിരി കടത്തിവിടും.
പൈപ്പില്‍ വെള്ളം നിറയ്ക്കുമ്പോള്‍ ഇത് കമ്പോസ്റ്റ് നിറച്ച തിരിയിലൂടെ ഗ്രോബാഗിലെ മിശ്രിതത്തിനാവശ്യമായ ജലം ലഭ്യമാക്കും. പൈപ്പിന്‍വെള്ളം നിറച്ച ഗ്രോബാഗിലെ ചെടി ഒരാഴ്ചയോളം വാട്ടം വരാതെ നില്‍കും. വാട്ടര്‍ സേവിംഗ്‌സ് ടെക്‌നോളജിയിലൂടെ സാധാരണ ഗ്രോബാഗിലെ ചെടിക്ക് നല്‍കേണ്ടി വരുന്ന ജലത്തിന്റെ നാലിലൊരു ഭാഗം മാത്രം മതി എന്നതാണ് ഇതിന്റെ മേന്മ.
മഴ പെയ്ത് ഗ്രോബാഗില്‍ നിറയുന്ന ജലം ടെറസ്സില്‍ വീഴാതെ പൈപ്പില്‍ ശേഖരിക്കപ്പെടുകയും ചെയ്യും.ഇത് മട്ടുപ്പാവില്‍ വെള്ളം കെട്ടി നില്ക്കുന്നത് തടയും.സാധാരണ ഗ്രോബാഗിനെക്കാള്‍ ഭാരം കുറവാണെന്നതിനാല്‍ (അഞ്ച് കിലോ ഭാരം മാത്രം) യഥേഷ്ടം മാറ്റി സ്ഥാപിക്കാനും കഴിയും. മണ്ണ് ഉപയോഗിക്കാത്തതിനാല്‍ ഇങ്ങനെ വളര്‍ത്തുന്ന ചെടികള്‍ക്ക് മണ്ണിലുടെ ഉണ്ടാകുന്ന രോഗങ്ങളും പിടിപെടില്ല.
ചാത്തന്നൂര്‍ മിനി സിവില്‍ സ്റ്റേഷന്റെ മട്ടുപ്പാവില്‍ തുടങ്ങിയ മണ്ണില്ലാ കൃഷി ജി.എസ്.ജയലാല്‍ എം.എല്‍.എ ഉദ്ഘാടനം ചെയ്തു.ബ്ലോക്ക് പഞ്ചായത്തംഗം ഡി.ഗിരി കുമാര്‍, ഗ്രാമ പഞ്ചായത്തംഗം ഷീജ, കൃഷി അസി.ഡയറക്ടര്‍ ഷിബുകുമാര്‍, കൃഷി ഓഫീസര്‍ എം.എസ്.പ്രമോദ് എന്നിവര്‍ പങ്കെടുത്തു.
ചാത്തന്നൂര്‍ കൃഷിഭവന്റെ ആഗ്രോ സര്‍വീസ് സെന്ററില്‍ നിന്നും വീടുകളില്‍ മണ്ണില്ലാ കൃഷി നടത്തുന്നതിനുള്ള സേവനം ലഭിക്കുമെന്ന് കൃഷി ഓഫീസര്‍ എം.എസ്.പ്രമോദ് അറിയിച്ചു.50 ഗ്രോബാഗുള്ള ഒരു യൂണിറ്റിന് 12500 രൂപയാണ് ചിലവ് വരുന്നത്.
ഇത്തിക്കര ബ്ലോക്ക് പഞ്ചായത്തിന്റെ പ്ലാന്‍ ഫണ്ടില്‍ ഉള്‍പ്പെടുത്തി 75 ശതമാനം സബ്‌സിഡി നിരക്കില്‍ 50 വീടുകളില്‍ മണ്ണില്ലാ കൃഷിനടത്തുന്നതിനുള്ള പ്രവര്‍ത്തനം തുടങ്ങി കഴിഞ്ഞു. ഗ്രാമ പഞ്ചായത്തുകള്‍ തയാറാവുകയാണെങ്കില്‍ പദ്ധതി ആവിഷ്‌കരിച്ച് നടപ്പാക്കുമെന്നും കൃഷി ഓഫീസര്‍ അറിയിച്ചു.
https://www.facebook.com/Malayalivartha
