ആദായ നികുതി ഇളവ് നാളെ മുതല്‍ പ്രാബല്യത്തില്‍ വരും. വാര്‍ഷികവരുമാനമോ ഇളവുകള്‍ കഴിച്ചുള്ള വാര്‍ഷികവരുമാനമോ അഞ്ചുലക്ഷംരൂപ വരെയാണെങ്കില്‍ ഇനി ആദായനികുതി നല്‍കേണ്ടതില്ല. മാസവരുമാനക്കാരും പെന്‍ഷന്‍കാരും അടക്കം മൂന്നുകോടി പേര്‍ക്ക് ഇതിന്റെ പ്രയോജനം ലഭിക്കും.വാര്‍ഷിക വരുമാനമോ ആദായനികുതി ഇളവുകള്‍ കഴിച്ചുള്ള വാര്‍ഷികവരുമാനമോ അഞ്ചുലക്ഷം രൂപവരെയാണെങ്കില്‍ ആദായനികുതി നല്‍കേണ്ടതില്ലെന്ന ബഡ്ജറ്റ് പ്രഖ്യാപനമാണ് നാളെ മുതല്‍ പ്രാബല്യത്തില്‍ വരിക. ഇതിലൂടെ മാസവരുമാനക്കാര്‍, പെന്‍ഷന്‍കാര്‍, ചെറുകിട കച്ചവടക്കാര്‍ തുടങ്ങി മൂന്ന് കോടി പേര്‍ക്ക് ഏതാണ്ട് പതിനെണ്ണായിരത്തി അഞ്ഞൂറുകോടിരൂപയുടെ നേട്ടമുണ്ടാകും.
ഒന്‍പതര ലക്ഷം രൂപ വരെ വാര്‍ഷിക വരുമാനമുള്ളവര്‍ക്ക് നിക്ഷേപ പദ്ധതികള്‍ പ്രയോജനപ്പെടുത്തി ആദായ നികുതി ഇളവ് നേടാനാകുമെന്ന് കേന്ദ്രസര്‍ക്കാര്‍ വ്യക്തമാക്കിയിട്ടുണ്ട്. നിലവിലെ സ്‌ളാബുകളില്‍ മാറ്റം വരുത്താതെ റിബേറ്റ് നല്‍കിയാണ് ആദായനികുതി ഒഴിവാക്കുന്നത്. 2500 മുതല്‍ 12500 രൂപ വരെയാണ് റിബേറ്റ് നിര്‍ദേശിച്ചിരിക്കുന്നത്. നികുതി ഇളവുകള്‍ക്കു ശേഷം അഞ്ചുലക്ഷത്തിനു മുകളില്‍ വാര്‍ഷികവരുമാനമുള്ളവര്‍ക്ക് ഇളവ് ലഭിക്കില്ല.
ഇക്കൂട്ടര്‍ നിലവിലെ സ്‌ളാബ് അനുസരിച്ച് രണ്ടരലക്ഷംരൂപ മുതല്‍ അഞ്ചുലക്ഷംരൂപവരെയുള്ള വരുമാനത്തിനു അഞ്ചുശതമാനവും അഞ്ചുലക്ഷംരൂപ മുതല്‍ പത്തുലക്ഷംരൂപ വരെയുള്ള വരുമാനത്തിന് ഇരുപത് ശതമാനവും പത്തുലക്ഷത്തിന് മുകളിലുള്ളതിന് മുപ്പതുശതമാനവും ആദായനികുതി നല്‍കേണ്ടിവരും.ഭൂമിയുടെ ന്യായവില 10% വര്‍ധിപ്പിക്കുന്നത് നാളെ മുതല്‍ നടപ്പാകില്ല. വിജ്ഞാപനം ഏപ്രിലില്‍ത്തന്നെ പുറത്തിറക്കുമെന്നും അതിനു ശേഷമേ വിലക്കയറ്റം പ്രാബല്യത്തിലാകൂ എന്നും റജിസ്‌ട്രേഷന്‍ മന്ത്രി ജി. സുധാകരന്റെ ഓഫിസ് അറിയിച്ചു. ബജറ്റില്‍ പ്രഖ്യാപിച്ച 1% പ്രളയ സെസ് നടപ്പാക്കുന്നതും നീട്ടിവച്ചിട്ടുണ്ട്.