കടുത്ത വേനലും റംസാന്‍ കാലവും ഉല്‍പാദനത്തിലുണ്ടായ വലിയ കുറവും തകര്‍ന്നു കിടന്ന പൈനാപ്പിള്‍ വില കുതിച്ചു കയറി. ആറു വര്‍ഷത്തിനിടെ പൈനാപ്പിളിന് ലഭിക്കുന്ന ഏറ്റവും മികച്ച വിലയാണ് ഇപ്പോഴുള്ളത്. പഴുത്ത പൈനാപ്പിളിന് മാര്‍ക്കറ്റില്‍ കിലോഗ്രാമിന് 50 രൂപയാണ് വില. വില കുത്തനെ കുറയുമെന്ന ആശങ്കയില്‍ കര്‍ഷകര്‍ പച്ച പൈനാപ്പിള്‍ വെട്ടി വിപണിയിലെത്തിക്കുന്നതാണ് പഴുത്ത പൈനാപ്പിളിന് വില ഉയരാന്‍ മറ്റൊരു കാരണം. പ്രളയവും തുടര്‍ന്നുള്ള സാമ്പത്തിക പ്രതിസന്ധികളും മൂലം കിലോഗ്രാമിന് ഏഴു രൂപ വരെയായി കുറഞ്ഞ പൈനാപ്പിള്‍ വിലയാണ് ഇപ്പോള്‍ കുതിച്ചു കയറിയത്. 

മുംബൈ, ഡല്‍ഹി, ചെന്നൈ, ഹൈദരാബാദ്, ബെംഗളൂരു വിപണികളില്‍ പൈനാപ്പിളിന് ആവശ്യക്കാരേറിയതും ഗുണമായി. പച്ചയ്ക്കും ഉയര്‍ന്ന വിലയാണ് ലഭിക്കുന്നത്. ഇന്നലെ പഴുത്ത പൈനാപ്പിളിന് 50 രൂപയും പച്ചയ്ക്ക് 42 രൂപയുമായിരുന്നു വില.