ഒരു പൂവന്‍ കോഴിയ്ക്ക് എത്ര വിലവരും അഞ്ഞൂറ്...ആയിരം എന്നൊക്കെ പറയാന്‍ വരട്ടെ കോട്ടയം നട്ടാശേരി പള്ളിയിലെ പെരുന്നാളിനോടനുബന്ധിച്ച് നടന്ന ലേലം കത്തിക്കയറിയപ്പോള്‍ ആരും കരുതിയില്ല, ഒരു പൂവന്‍കോഴിക്ക് വില ലക്ഷം കടക്കുമെന്ന്. എന്നാല്‍ കോട്ടയം നട്ടാശേരി പൊന്‍പള്ളി സെന്റ് ജോര്‍ജ് യാക്കോബായ സുറിയാനി പള്ളിയിലെ പെരുന്നാളിന്റെ ഭാഗമായി നടത്തിയ കോഴിലേലത്തിലാണ് ഇത് സംഭവിച്ചത്. ലേലത്തിലെ ആദ്യത്തെ കോഴിക്ക് ഒരു ലക്ഷത്തി പതിനായിരം രൂപ വരെയാണ് വില ഉയര്‍ന്നത്.

പെരുന്നാളിന് ആദ്യം ലേലം വിളിക്കുന്ന കോഴിയെ പൊന്നും കോഴിയെന്ന പേരിലാണ് ലേലം വിളിക്കുന്നത്. ഈ കോഴിക്കാണ് ഒരു ലക്ഷത്തി പതിനായിരം രൂപ വരെ വില ഉയര്‍ന്നത്. കോട്ടയം സ്വദേശിയും കോയമ്പത്തൂരില്‍ കെട്ടിടനിര്‍മ്മാണ മേഖലയില്‍ സ്ഥാപനം നടത്തുന്ന മനോജ് ജോസഫാണ് കോഴിയെ ലേലത്തില്‍ വാങ്ങിയത്. കഴിഞ്ഞ 18 വര്‍ഷങ്ങളായി മനോജാണ് പൊന്നുംകോഴിയെ വാങ്ങുന്നത്. മറ്റു കോഴികള്‍ക്ക് 10,000 രൂപയും, 5000 രൂപയ്ക്കും വരെ ലേലം നടന്നതായി അധികൃതര്‍ പറഞ്ഞു.

മുന്‍ വര്‍ഷങ്ങളിലും ശക്തമായ ലേലം വിളികള്‍ ഉണ്ടായിട്ടുണ്ടെങ്കിലും വില ഒരു ലക്ഷത്തിന് മുകളില്‍ ഉയരുന്നത് ആദ്യമായാണ്. 500 രൂപ വില വരുന്ന നാടന്‍ ഇനത്തില്‍പെട്ട പൂവന്‍കോഴിയെയാണ് ഒരു ലക്ഷം രൂപയ്ക്ക് വിറ്റത്.