നെഹ്റുട്രോഫി വള്ളംകളി മാറ്റിയതോടെ ക്ലബ്ബുകള്ക്ക് നഷ്ടമായത് ലക്ഷങ്ങള്
തുടര്ച്ചയായ രണ്ടാം വര്ഷവും പ്രളയം കാരണം നെഹ്റു ട്രോഫി ജലോത്സവം മാറ്റിയപ്പോള് വെള്ളത്തിലായത് ലക്ഷങ്ങള്. ഇതിനോടൊപ്പം നടക്കേണ്ടിയിരുന്ന പ്രഥമ ചാംപ്യന്സ് ബോട്ട് ലീഗ് (സി ബി എല്) മത്സരങ്ങളും മാറ്റിവച്ചതോടെ സംഘാടകര്ക്കും വള്ളംകളി ക്ലബ്ബുകള്ക്കും ടൂറിസം മേഖലയ്ക്കും വലിയ നഷ്ടമാണ് സംഭവിച്ചിരിക്കുന്നത്. കഴിഞ്ഞ വര്ഷവും ലക്ഷക്കണക്കിന് രൂപ മുടക്കി പരിശീലനം മിക്കവാറും പൂര്ത്തിയാക്കിക്കഴിഞ്ഞപ്പോഴാണ് മഹാപ്രളയം വന്ന് എല്ലാം അവതാളത്തിലാക്കിയത്. ഇതോടെ കഴിഞ്ഞ വര്ഷത്തേതിന്റെ തനിയാവര്ത്തനമായി ഇത്തവണത്തേയും ജലോത്സവം. കഴിഞ്ഞതവണത്തെപ്പലെ ഇത്തവണയും മുഖ്യാതിഥി സച്ചിന് ആയിരുന്നു. സി ബി എല് ആരംഭിക്കാനിരുന്ന കഴിഞ്ഞ വര്ഷം കുട്ടനാട്ടിലെ വലിയ വെള്ളപ്പൊക്കത്തെത്തുടര്ന്ന് മാറ്റിവച്ച നെഹ്റു ട്രോഫി ജലോത്സവം നവംബര് 10ന് ആണ് നടന്നത്.
അന്യനാടുകളില്നിന്നു പോലും തുഴച്ചില്കാരെ എത്തിച്ച പല ക്ലബ്ബുകളും ലക്ഷക്കണക്കിന് രൂപ മുടക്കി അവസാന വട്ട പരിശീലനവും പൂര്ത്തിയാക്കിക്കഴിഞ്ഞപ്പോഴാണ് മഹാപ്രളയം വന്ന് എല്ലാം അവതാളത്തിലാക്കിയത്. ഇതോടെ പല ക്ലബ്ബുകളും കടക്കെണിയിലാവുകയും ചെയ്തു.
സഞ്ചാരികളുടെ ഒഴുക്ക് പ്രതീക്ഷിച്ച് വന് ഒരുക്കങ്ങള് നടത്തിയ ഹോട്ടലുകള്ക്കും മത്സരം മാറ്റിവച്ചത് വന് തിരിച്ചടിയായി. വള്ളംകളി കാണാന് മുന്കൂട്ടി ബുക്ക് ചെയ്ത് എത്തിയ നൂറുകണക്കിന് സഞ്ചാരികളും നിരാശയിലായി. ഹൗസ് ബോട്ട് മേഖലയ്ക്കാണ് മറ്റൊരു തിരിച്ചടി ലഭിച്ചത്. വള്ളം കളിയുമായി ബന്ധപ്പെട്ട് മിക്ക ഹൗസ് ബോട്ടുകള്ക്കും ബുക്കിംഗ് ഉണ്ടായിരുന്നു. ഇതെല്ലാം റദ്ദാക്കപ്പെടുന്ന സാഹചര്യമാണ് നിലവിലുള്ളത്.
ഇക്കുറി സി ബി എല് കൂടി ആരംഭിക്കുന്നതിനാല് ഏറെ പ്രതീക്ഷയിലായിരുന്നു വള്ളംകളി പ്രേമികളും. സി ബി എലിന്റെ ആദ്യമത്സരം കൂടിയായിരുന്നു ഇവിടെ നടക്കേണ്ടിയിരുന്നത്. അന്തര്ദേശീയതലത്തിലടക്കം സംപ്രേഷണം ചെയ്യപ്പെടുന്ന രീതിയില് വന് സന്നാഹങ്ങളാണ് ഇത്തവണ ഒരുക്കിയിരുന്നത്. ഇക്കുറി ജലോത്സവത്തിന്റെ ഭാഗമായുള്ള മറ്റു പരിപാടികളെല്ലാം സജീവമായി നടന്നിരുന്നു. ജലോത്സവത്തിനുള്ള ഒരുക്കങ്ങള് ഏതാണ്ട് പൂര്ത്തിയാവുകയും ചെയ്തിരുന്നു.
1952ല് പ്രധാനമന്ത്രി ജവഹര്ലാല് നെഹ്റുവിന്റെ ആലപ്പുഴ സന്ദര്ശനവുമായി ബന്ധപ്പെട്ടു നടത്തിയ ജലഘോഷയാത്രയാണ് പിന്നീട് നെഹ്റുട്രോഫി ജലമേളയായി മാറിയത്. ഓഗസ്റ്റിലെ രണ്ടാം ശനിയാഴ്ച നടത്താന് തുടങ്ങിയ ശേഷം ഇതു നാലാം തവണയാണ് നെഹ്റു ട്രോഫി വ്യത്യസ്ത കാരണങ്ങളാല് മാറ്റിവയ്ക്കുന്നത്. 1971 ല് വെള്ളപ്പൊക്കത്തിന്റെ പശ്ചാത്തലത്തിലാണ് ആദ്യം ജലോത്സവം മാറ്റിവച്ചത്.
https://www.facebook.com/Malayalivartha