സംസ്ഥാനത്ത് സ്വര്‍ണവിലയില്‍ മാറ്റമില്ല... ഇന്നലെ പവന് 160 രൂപ വര്‍ദ്ധിച്ചിരുന്നു. ഗ്രാമിന് 20 രൂപ കൂടി 4950 രൂപയായിരുന്നു. പവന് 39,600യിലാണ് വിപണനം നടക്കുന്നത്.

മള്‍ട്ടി കമ്മോഡിറ്റി എക്സ്ചേഞ്ചില്‍ സ്വര്‍ണത്തിന്റെ ഭാവില വില 121 രൂപ ഉയര്‍ന്നു. 0.23 ശതമാനം നേട്ടമാണുണ്ടായത്. ആഗോള സാമ്പത്തിക രംഗത്ത് തിരിച്ചടിയുണ്ടായതോടെയാണ് നിക്ഷേപകര്‍ സുരക്ഷിത നിക്ഷേപം പരിഗണിച്ചത്. ഇതോടെ സ്വര്‍ണത്തിലേക്ക് കൂടുതല്‍ നിക്ഷേപം എത്തുകയും വില വര്‍ധിപ്പിക്കുകയുമായിരുന്നു.

വില കൂടിയാലും കുറഞ്ഞാലും സ്വര്‍ണത്തെ സുരക്ഷിത നിക്ഷേപമായാണ് കേരള ജനത എന്നും കാണുന്നത്. നിക്ഷേപ മൂല്യം എന്നതിലുപരി സ്വര്‍ണത്തെ ആഭരണങ്ങളായും നാണയങ്ങളായും കൈവശം വെയ്ക്കാന്‍ ആളുകള്‍ താത്പര്യപ്പെടുന്നു.

സ്വര്‍ണത്തിന്റെ രാജ്യാന്തര വില, ഡോളര്‍ രൂപ വിനിമയ നിരക്ക്, ഇറക്കുമതി തീരുവ എന്നിവ അടിസ്ഥാനമാക്കിയാണ് സംസ്ഥാനത്ത് സ്വര്‍ണ വില നിര്‍ണയിക്കപ്പെടുന്നത്.

അതേസമയം, ആര്‍.ബി.ഐ വായ്പ പലിശനിരക്കുകള്‍ വീണ്ടും ഉയര്‍ത്തി. റിപ്പോ നിരക്കില്‍ 0.35 ബേസിക് പോയിന്റ് വര്‍ധനയാണ് വരുത്തിയത്. ഇതോടെ റിപ്പോ നിരക്ക് 6.25 ശതമാനമായി വര്‍ദ്ധിച്ചു. ഇതോടെ രാജ്യത്ത് വായ്പാ പലിശ നിരക്കുകള്‍ ഉയരും.