വാശിയേറിയ ലേലത്തിനൊടുവില് മധുസൂദനന് നായര് വിജയിച്ചു
തലസ്ഥാനത്തെ പുതിയ വാഹന നമ്പര് ശ്രേണിയായ കെ.എല് 01 സി.ഡി 1 ലേലത്തില് പോയത് 5.25 ലക്ഷം രൂപയ്ക്ക്. തിരുവനന്തപുരം ആര്.ടി. ഓഫീസില് നടന്ന ലേലത്തില് കെ.എന് മധുസൂദനനാണ് തന്റെ പുതിയ ലാന്ഡ് ക്രൂയിസറിന് വേണ്ടി ഈ നമ്പര് സ്വന്തമാക്കിയത്. നാലുപേരാണ് ഒന്നാം നമ്പര് സ്വന്തമാക്കാന് മത്സരിച്ചത്. നാലുലക്ഷം രൂപവരെ മുടക്കാന് തയ്യാറായ തൊട്ടുപിന്നിലുള്ളയാളേക്കാള് 25,000 കൂടി നല്കി മധുസൂദനന് നമ്പര് സ്വന്തമാക്കുകയാണുണ്ടായത്.
ലേലത്തുകയ്ക്കു പുറമേ ഒരു ലക്ഷം രൂപകൂടി മുഖവിലയായി നല്കണം. നാലുപേരും ഒരു ലക്ഷം രൂപ വീതം അടച്ചിരുന്നു. മൂന്നുപേരുടെ തുക തിരികെ നല്കും. സി.ഡി. 3 എന്ന നമ്പരിനുവേണ്ടിയും വാശിയേറിയ ലേലം നടന്നു. 10,000 രൂപ മുഖവിലയുള്ള നമ്പരിന് 1,16,000 രൂപ കൂടി മുടക്കാന് തയ്യാറായ ജോണ്സണ് വുഡ് ഇന്ഡസ്ട്രീസാണ് നമ്പര് സ്വന്തമാക്കിയത്. സി.ഡി. 7ന് വേണ്ടി നാലുപേര് രംഗത്തുണ്ടായിരുന്നു. 96,000 രൂപയ്ക്ക് വി.അജയകുമാറാണ് നമ്പര് സ്വന്തമാക്കിയത്.
സി.ഡി. ശ്രേണിയിലെ 565 വരെയുള്ള നമ്പരുകള് ബുക്ക് ചെയ്യാനുള്ള അവസരമാണ് നല്കിയിരുന്നത്. ഇതില് 31 ഫാന്സി നമ്പരുകള്ക്കായി 12.01 ലക്ഷം രൂപ ലേലത്തുകയായി ലഭിച്ചു.
https://www.facebook.com/Malayalivartha