താരങ്ങളുടെ രസകരമായ ഇടവേളകൾ അവർ തന്നെ പ്രേക്ഷകരുമായി പങ്കു വയ്ക്കാറുണ്ട്. ഇവിടെ ഇതാ ഷൂട്ടിങ്ങിന്റെ ഇടവേളയിൽ ബാറ്റുമായി ക്രിക്കറ്റ് കളിക്കാൻ ഒരു നടൻ ഇറങ്ങി. പാഞ്ഞു വന്ന പന്തിനെ അടിച്ചു തെറിപ്പിച്ച താരം ഒരിക്കൽ കൂടി തിളങ്ങി. പക്ഷെ പണിയായതു അത് പിടിക്കാൻ ശ്രമിച്ച വ്യക്തിക്കായിരുന്നു. മലയാളികളുടെ സ്വന്തം ചാക്കോച്ചൻറെ ക്രിക്കറ്റ് കളിയാണ് കൂടെയുണ്ടായിരുന്ന രണ്ടുപ്പേർക്ക് മുട്ടൻ പണി കൊടുത്തത്. ഈ വീഡിയോ ചാക്കോച്ചൻ തന്നെ ഫേസ്ബുക്കിലൂടെ പങ്കു വച്ചിരിക്കുകയാണ്.

നടൻ കുഞ്ചാക്കോ ബോബൻ തൻറെ പുതിയ ചിത്രമായ പടയുടെ ഇടവേളയിലാണ് ബാറ്റുമായി ക്രിക്കറ്റ് കളിക്കാൻ ഇറങ്ങിയത്. ആദ്യത്തെ പന്ത് കൈക്കലാക്കി ചാക്കോച്ചനെ ഔട്ടാക്കാൻ നോക്കിയ ആൾക്ക് നടുവിനാണ് പണി കിട്ടിയത്. താരത്തിന്റെ സിക്സർ കയ്യിലൊതുക്കാൻ ശ്രമിക്കുന്നതിനിടെയാണ് അയാൾ തെന്നിവീണത്. തീർന്നില്ല അടുത്ത പണി കിട്ടിയത് ചാക്കോച്ചൻറെ ക്രിക്കറ്റ് കളി ഷൂട്ട് ചെയ്തുകൊണ്ടിരുന്ന ആൾക്കാണ്. അടിച്ചു വിട്ട പന്ത് ഷൂട്ട് ചെയ്തു കൊണ്ടിരുന്ന ആളിന്റെ മൂക്കത്താണ് കൊണ്ടത്. കുഞ്ചാക്കോ ബോബനൊപ്പം നടൻ ജോജുവും ഉണ്ടായിരുന്നു. ജോജുവിന്റെ മേക്കപ്പ്മാനാണ് തന്റെ ബാറ്റിൽ നിന്ന് പറന്ന പന്തിൽ മൂക്കിന് പണി കിട്ടിയ കക്ഷിയെന്ന് ചാക്കോച്ചൻ പിന്നീട് ഫേസ്ബുക് പോസ്റ്റിലൂടെ പറഞ്ഞു.

പന്തടിച്ച് വീർത്ത മൂക്കുമായുള്ള പടവും താരം പോസ്റ്റ് ചെയ്തു . താരത്തിൻറെ ക്രിക്കറ്റ് കളി മാത്രമല്ല. ബാറ്റ് ചെയ്യുന്ന താരത്തിന്റെ പിന്നിലുള്ള മടൽ സ്റ്റംപും വൈറലായി കൊണ്ടിരിക്കുകയാണ്. നാട്ടിൻ പുറത്തെ പയ്യന്മാർ ക്രിക്കറ്റ് കളിക്കുമ്പോൾ മടലിനെ സ്റ്റംപ്പാക്കാറുണ്ട്. അത് പോലെ താരത്തിന്റെ ക്രിക്കറ്റും തനി നാടൻ പ്രതീതി ഉളവാക്കുന്നതായിരുന്നു. ടിക് ടോക് ഒരു റിയാലിറ്റി ആവുമ്പോൾ എന്നാണ് ഈ വീഡിയോയ്ക്ക് കുഞ്ചാക്കോ നൽകിയിരിക്കുന്ന അടിക്കുറിപ്പ്. കോതമംഗലം എംഎ കോളെജിലാണ് ചാക്കോച്ചനും, ജോജുവും ദിലീഷ് പോത്തനുമെല്ലാം ഒന്നിക്കുന്ന 'പട'യുടെ ചിത്രീകരണം നടന്നു കൊണ്ടിരിക്കുന്നത്.