മുകേഷിന്റെ ഡൂപ്ലിക്കേറ്റ് ശക്തിമാനെതിരേ രഞ്ജി പണിക്കര്ക്ക് പരാതി
ടെലിവിഷന് സീരിയല് ശക്തിമാനിലെ നടനും നിര്മാതാവുമായ മുകേഷ് ഖന്ന ഒമര് ലുലു സംവിധാനം ചെയ്യുന്ന പുതിയ സിനിമ ധമാക്കയ്ക്കെതിരേ പരാതി നല്കി. സംവിധായകന് തനിക്കു കോപ്പിറൈറ്റുള്ള ശക്തിമാന് കഥാപാത്രത്തെ, ധമാക്ക സിനിമയില് ഉപയോഗിച്ചിരിക്കുന്നുവെന്നും ഇക്കാര്യം വിലക്കണമെന്നും ഫെഫ്ക ഡയറക്ടേഴ്സ് യൂണിയന് പ്രസിഡന്റ് രഞ്ജി പണിക്കര്ക്ക് അയച്ച പരാതിയിലാണ് മുകേഷ് ഖന്ന ആവശ്യപ്പെട്ടത്.
ശക്തിമാന് കഥാപാത്രവും അതിന്റെ വേഷവും തീം മ്യൂസിക്കും തനിക്ക് കോപ്പി റൈറ്റുള്ളതാണെന്നും അനുമതിയില്ലാതെയാണ് ഈ കഥാപാത്രത്തെ സിനിമയില് ഉള്പ്പെടുത്തിയതെന്നും മുകേഷ് ഖന്ന ആരോപിക്കുന്നു. 1997-കളില് ദൂരദര്ശനില് ഹിറ്റ് സീരിയലായിരുന്നു ശക്തിമാന്. ധമാക്ക സിനിമയിലെ ചില രംഗങ്ങളില് മലയാള നടന് മുകേഷ് ശക്തിമാന്റെ വേഷത്തില് എത്തുന്നതിന്റെ ചിത്രങ്ങള് നേരത്തേ സംവിധായകന് ഒമര് ലുലുതന്നെയാണ് പുറത്തുവിട്ടത്.
സിനിമയിലെ ചില രംഗങ്ങളില് മാത്രമുള്ള ഒരു കോമഡി കഥാപാത്രമാണ് ധമാക്കയിലെ ശക്തിമാനെന്ന വിവരം മുകേഷ് ഖന്നയെ ധരിപ്പിക്കുമെന്നും എന്നിട്ടും അനുമതി ലഭിച്ചില്ലെങ്കില് കോപ്പിറൈറ്റിനെ മാനിച്ച് രംഗങ്ങള് ഒഴിവാക്കുമെന്നും ഒമര് ലുലു പറഞ്ഞു. എന്തായാലും ഡൂപ്ലിക്കേറ്റ് ശക്തിമാന്റെ ശക്തി ഒറിജിനല് ശക്തിമാന് ചോര്ത്തിക്കളയുമോയെന്ന് കാത്തിരുന്നു കാണാം.
https://www.facebook.com/Malayalivartha
