അടുത്ത് തന്നെ പുറത്തിറങ്ങുന്ന തന്റെ പുതിയ ചിത്രമായ കമലയെ കുറിച്ച് അജു വര്‍ഗീസ് സോഷ്യല്‍ മീഡിയയില്‍ പങ്കു വച്ച ഒരു ക്ലിപ്പില്‍ പറയുന്നത് , അത് ഒരു കടങ്കഥയ്ക്ക് ഉത്തരം തേടിയുള്ള യാത്രയാണ് എന്നാണ് .

കമല യഥാര്‍ത്ഥത്തില്‍ ഉണ്ടോ അതോ ഭാവനാ സൃഷ്ടി മാത്രമാണോ എന്ന് അന്വേഷിച്ചറിയാന്‍ മുഖ്യ കഥാപാത്രമായ സഫര്‍ എന്ന യുവാവ് നടത്തുന്ന യാത്രയിലൂടെയാണ് കഥ വികസിയ്ക്കുന്നത്. 36 മണിക്കൂറിനുള്ളില്‍ ഉത്തരം കണ്ടുപിടിയ്ക്കുകയും ചെയ്യുന്നുണ്ട് സഫര്‍ .

രഞ്ജിത് ശങ്കര്‍ സംവിധാനം നിര്‍വഹിച്ചിരിയ്ക്കുന്ന ചിത്രം ആതിരപ്പള്ളി വെള്ളച്ചാട്ടത്തിന്റെ പശ്ചാത്തലത്തിലാണ് ചിത്രീകരിച്ചിരിയ്ക്കുന്നത്. അതിനോട് ചേര്‍ന്നുള്ള കാടും റിസോര്‍ട്ടും ഒക്കെ ചിത്രത്തിന്റെ ദൃശ്യ ഭംഗിയ്ക്ക് നന്നായി ഉപയോഗപ്പെടുത്തിയിട്ടുമുണ്ട് .

കമല, വളരെ സൂക്ഷ്മതയോടെ എഴുതപ്പെട്ടതായിരുന്നതിനാല്‍ കഥാപാത്രാവിഷ്‌കാരം എളുപ്പമുള്ളതായിരുന്നില്ല എന്നും എങ്കിലും ക്രൂവിന്റെ പൂര്‍ണ പിന്തുണ ഉണ്ടായിരുന്നതിനാല്‍ എല്ലാം ഭംഗിയാക്കാനായി എന്ന് കരുതുന്നുവെന്നും ടൈറ്റില്‍ റോള്‍ ചെയ്യുന്ന റൂഹാനി ശര്‍മ്മ പറഞ്ഞു.