തിരക്കഥാകൃത്ത് ബെന്നി പി.നായരമ്പലത്തിന്റെ മകളും, കുമ്പളങ്ങി നൈറ്റ്സ് എന്ന ആദ്യ ചിത്രത്തിൽ ബേബി മോളായി തകർത്ത് അഭിനയിച്ച അന്ന ബെന്നിന്റെ രണ്ടാമത്തെ ചിത്രമാണ് ഹെലൻ. നവാഗതനായ മാത്തുക്കുട്ടി സേവ്യർ സംവിധാനം ചെയ്ത്, വിനീത് ശ്രീനിവാസൻ നിർമിക്കുന്ന ചിത്രത്തിൽ ഹെലൻ എന്ന ടൈറ്റിൽ കഥാപാത്രമാണ് അന്നയ്ക്ക്. ഇപ്പോഴിതാ ഹെലന്റെ വിശേഷങ്ങൾ പങ്കുവച്ച് ചിത്രത്തിന്റെ അണിയറ പ്രവര്‍ത്തകര്‍ ഫെയ്സ്ബുക്ക് ലൈവില്‍ എത്തിയപ്പോൾ ഒരു ആരാധകന്റെ രസികൻ കമന്റും അതിന് അന്ന നൽകിയ മറുപടിയുമാണ് വൈറൽ.

വിനീത് ശ്രീനിവാസന്‍, അന്ന ബെന്‍, നോബിള്‍ ബാബു തോമസ്, സംവിധായകന്‍ മാത്തുക്കുട്ടി സേവ്യര്‍ തുടങ്ങിയവരാണ് ലൈവില്‍ എത്തിയത്. ലൈവില്‍ സംസാരിക്കുന്നതിനിടെ ‘എന്തിനാ ബേബി മോളെ ഇങ്ങനെ പേടിക്കുന്നത്’ എന്നായിരുന്നു ആരാധകന്റെ ചോദ്യം. ആരാധകന്റെ ചോദ്യത്തിന് എനിക്ക് പേടിയൊന്നുമില്ല. എല്ലാവരും സിനിമ കണ്ടാല്‍ മതിയെന്നായിരുന്നു ചിരിച്ചുകൊണ്ടുളള അന്നയുടെ മറുപടി. കുമ്പളങ്ങി നൈറ്റ്സിലെ ഷമ്മി എന്ന കഥാപാത്രത്തിന്റെ ഡയലോഗാണ് ആരാധകന്‍ കടമെടുത്തത്.