സുരാജ് വെഞ്ഞാറമ്മൂട് എന്ന നടനെ മലയാളികൾ ഒന്നടങ്കം അംഗീരിച്ചു കഴിഞ്ഞു. ഇന്ന് മലയാളത്തിലെ ഏറ്റവും മികച്ച നടന്മാരിലൊരാളാണ് സൂരാജ് വെഞ്ഞാറമൂട് എന്നതിൽ ആർക്കും തന്നെ തർക്കം ഉണ്ടാവില്ല. കഥാപാത്രങ്ങളുടെ പ്രായമോ സ്വഭാവമോ നോക്കാതെ മികച്ച കഥാപാത്രങ്ങളെയാണ് താരം തെരഞ്ഞെടുക്കുന്നത്. സമീപകാലത്ത് പുറത്തെത്തിയ നിരവധി സിനിമകളില്‍ സുരാജിന്റെ ശ്രദ്ധേയ പ്രകടനങ്ങളുണ്ട്. അതില്‍ പല കഥാപാത്രങ്ങളും സുരാജിനേക്കാള്‍ പ്രായമുള്ളവരാണ്, പലതും അച്ഛന്‍ കഥാപാത്രങ്ങളും. ആന്‍ഡ്രോയ്ഡ് കുഞ്ഞപ്പന്‍ 5.25 എന്ന ചിത്രത്തില്‍ ഭാസ്‌കര പൊതുവാള്‍ എന്ന വൃദ്ധ കഥാപാത്രമായാണ് താരം എത്തിയത്. പ്രായമായ കഥാപാത്രങ്ങള്‍ സ്ഥിരമായി അവതരിപ്പിക്കുന്നതിന്റെ റിസ്‌കിനെക്കുറിച്ച് അടുത്തിടെ മമ്മൂട്ടി തന്നോട് സംസാരിച്ചെന്ന് സുരാജ് വെഞ്ഞാറമ്മൂട് വ്യക്തമാക്കി . ഐഇ മലയാളത്തിന് നല്‍കിയ അഭിമുഖത്തിലാണ് സുരാജ് ഇതേക്കുറിച്ച് പറയുന്നത്.

"മമ്മൂക്ക ഇന്നലെ പറഞ്ഞു, 'നീ കെളവനെയും ചെയ്ത് നടന്നോ. നെടുമുടിയുടെയും തിലകന്റെയുമൊക്കെ അവസ്ഥ അറിയാലോ. ചെറിയ പ്രായത്തില്‍ തന്നെ വലിയ സംഭവങ്ങള്‍ ചെയ്തു'. ഇല്ല ഇക്കാ, ഞാന്‍ ഇതോടെ പരിപാടി നിര്‍ത്തുകയാ. എന്നിട്ട് ഇക്കയുടെ ചുവടുപിടിക്കാം എന്ന് പറഞ്ഞു", അഭിമുഖത്തില്‍ സുരാജ് പറയുന്നു.'കുഞ്ഞപ്പന്' മുന്‍പെത്തിയ വികൃതി, ഫൈനല്‍സ് എന്നീ ചിത്രങ്ങളിലും സുരാജിന് വ്യത്യസ്തങ്ങളായ കഥാപാത്രങ്ങളായിരുന്നു. ഈ ചിത്രങ്ങളിലെ പ്രകടനങ്ങളുടെ പേരിലും അദ്ദേഹം ഏറെ ആസ്വാദകപ്രീതി നേടിയിരുന്നു.