താന്‍ പണം മാത്രം ഉണ്ടാക്കുന്ന യന്ത്രമായിരുന്നുവെന്ന് നടി ഷക്കീല. ആരും എന്നെ ഒരു മനുഷ്യജീവിയായി പരിഗണിച്ചിരുന്നില്ല. സ്വന്തം വീട്ടുകാര്‍ക്ക് ആവശ്യാനുസരണം കാശ് ഉല്‍പാദിപ്പിച്ചുനല്‍കുന്ന മണി മേക്കിംഗ് മെഷീനായിരുന്നു താനെന്ന് ഷക്കീല പറഞ്ഞു. സത്യസന്ധമായി പറഞ്ഞാല്‍ എനിക്ക് ആയിരം രൂപ പോലും സമ്പാദ്യമായിട്ടില്ല. തിരക്കുള്ള സമയത്തുപോലും അഭിനയിക്കുക എന്നതില്‍ക്കവിഞ്ഞ് പ്രതിഫലത്തെക്കുറിച്ചൊന്നും ചിന്തിച്ചിരുന്നില്ല. കിട്ടിയ ചെക്കുകളെല്ലാം അമ്മയെ ഏല്‍പിക്കും.
അതായിരുന്നു പതിവ്. അമ്മ പണം ചേച്ചിയെ ഏല്‍പിക്കും. അവര്‍ പണമെല്ലാം സ്വന്തം അക്കൗണ്ടില്‍ നിക്ഷേപിച്ചു. ചേച്ചി ഇപ്പോള്‍ കോടീശ്വരിയാണ്. ഞാന്‍ അന്നന്നത്തെ അപ്പത്തിനുവേണ്ടി അധ്വാനിക്കുന്ന നിത്യ ദരിദ്രയും. അധികം സമ്പത്തൊന്നും ഒരു കാലത്തും മോഹിച്ചിട്ടില്ല. ജീവിതച്ചെലവുകള്‍ തട്ടും തടവുമില്ലാതെ നടന്നുപോകണം എന്നേയുള്ളുവെന്നും ഷക്കീല പറഞ്ഞു. ഷക്കീല തന്റെ പ്രണയത്തെ കുറിച്ചും പറയാന്‍ മറന്നില്ല. പ്രണയിക്കാന്‍ ഇഷ്ടം തന്നെയാണ്.
ഞാന്‍ ഒരുപാട് പേരെ പ്രണയിച്ചു. പക്ഷേ എല്ലാവരും എന്നെ ചതിക്കുകയായിരുന്നുവെന്ന് ഷക്കീല പറഞ്ഞു. ഇരുപതു പേരെയെങ്കിലും പ്രണയിച്ചിട്ടുണ്ടാകും ഞാന്‍. വിവാഹം എന്ന ലക്ഷ്യത്തോടെയാണ് ഓരോ പുരുഷനെയും സ്‌നേഹിച്ചത്. പക്ഷേ, വിധിയുടെ വികൃതിക്കൈകള്‍ എല്ലാ പ്രണയങ്ങളും പരാജയത്തിന്റെ പടുകുഴിയിലേക്കെറിയുകയായിരുന്നു. ഇപ്പോള്‍ പുതിയൊരു പ്രണയത്തിനായി ഞാന്‍ കാത്തിരിക്കുകയാണെന്നും ഷക്കീല പറഞ്ഞു. ക്രൂരമായ അവഗണനയുടെ ഇരയാണ് ഞാന്‍ എന്നും. കുടുംബത്തിലുള്ളവര്‍ക്കെല്ലാം ഞാന്‍ അഭിനയിച്ചുണ്ടാക്കിയ കാശ് വേണം.
അതേ സമയം എന്റെ സാന്നിധ്യം അരോചകവും. ചേച്ചിയുടെ മകള്‍ എന്റെ ജീവനാണ്. പക്ഷേ, അവളുടെ കല്യാണംപോലും എന്നെ അറിയിച്ചില്ല. മംഗള കര്‍മങ്ങളില്‍ നിന്നെപ്പോലൊരു സെക്‌സ് നടി അപശകുനമാണെന്ന് ചേച്ചി മുഖത്തുനോക്കി പറഞ്ഞു. കുടുംബത്തിലെ ആര്‍ക്കെങ്കിലും കുഞ്ഞുങ്ങള്‍ പിറന്നാല്‍ ഞാനോടി ചെല്ലാറുണ്ട്. കൊച്ചുകുഞ്ഞുങ്ങളെ എനിക്കു വലിയ ഇഷ്ടമാണ്. പക്ഷേ, പലരും കുഞ്ഞുങ്ങളുടെ മുഖംപോലും എന്നെ കാണിക്കാറില്ല. കുറച്ച് ഗ്ലാമര്‍ സിനിമകളില്‍ അഭിനയിച്ചതിന്റെ പേരിലാണ് ഈ അയിത്തം. ഞാനിപ്പോള്‍ കരയാറില്ല. ഈ ജന്മം ഇങ്ങനെയങ്ങ് നരകിച്ചു തീര്‍ക്കുകയാണെന്നും ഷക്കീല പറയുന്നു.

നെഞ്ചില്‍ കൈവച്ചു പറയുന്നു. ഇന്നുവരെ തെറ്റായ മാര്‍ഗങ്ങളില്‍ പണം സമ്പാദിക്കാന്‍ തുനിഞ്ഞിട്ടില്ല. അങ്ങനെ ജീവിക്കേണ്ട ഗതികേട് ഇപ്പോഴും ഷക്കീലയ്ക്കില്ലെന്ന് അഭിമാനത്തോടെ പറയാന്‍ കഴിയും. അറിയുമോ ഇരുപതു വര്‍ഷമായി ഞാന്‍ സിനിമയിലുണ്ട്. പക്ഷേ, ഇപ്പോഴും വാടകക്കാരിയാണ്. ഈ വീടിന് പതിനായിരം രൂപയാണ് വാടക. ഇതുവരെ കൃത്യമായി വാടക കൊടുക്കാന്‍ കഴിഞ്ഞു, തെറ്റായ വഴികളിലൂടെ സഞ്ചരിക്കാതെതന്നെ. ഇപ്പോള്‍ മുപ്പത്തെട്ടു വയസായി. മറ്റു മാര്‍ഗങ്ങളില്‍ നാലു കാശ് സമ്പാദിച്ചിരുന്നുവെങ്കില്‍ അക്കൗണ്ടില്‍ കോടികള്‍ ഉണ്ടാവുമായിരുന്നു. ഒരു പുരുഷനും മോശമായി എന്നെ സമീപിക്കാന്‍ കഴിയില്ലെന്നു ഷക്കീല പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha