പ്രശസ്ത പഴയകാല നാടക-സിനിമ ഗായിക മച്ചാട്ട് വാസന്തി(81) അന്തരിച്ചു. ദീർഘനാളായി വാർദ്ധക്യ സഹജമായ അസുഖങ്ങളെ തുടർന്ന് ചികിത്സയിലായിരുന്നു. കോഴിക്കോട് മെഡിക്കൽ കോളേജിൽ ചികിത്സയിൽ കഴിയവെയാണ് അന്ത്യം സംഭവിച്ചത്. ഒൻപതാം വയസിൽ കമ്മ്യൂണിസ്റ്റ് പാർട്ടി വേദിയിൽ വിപ്ലവഗാനം പാടിയായിരുന്നു തുടക്കം.

നിരവധി സിനിമകളിൽ പിന്നണിഗാനം പാടിയിട്ടുള്ള വാസന്തി, മിന്നാമിനുങ്ങ് എന്ന സിനിമയിലാണ് ആദ്യമായി ആലപിച്ചത്. അനവധി നാടകളിൽ അഭിനയിക്കുകയും ചെയ്തിട്ടുണ്ട്. ‘പച്ചപ്പനം തത്തേ പുന്നാര പൂമുത്തേ ‘ എന്ന പാട്ടിന്റെ പഴയ ഈണം പാടിയത് മച്ചാട്ട് വാസന്തിയായിരുന്നു. സംഗീതസംവിധായകൻ ബാബുരാജിന്റെ ശിഷ്യയാണ്. അദ്ദേഹത്തിന്റെ സംഗീതസംഘത്തിലെ അംഗവുമായിരുന്നു.

'മണിമാരൻ തന്നത് പണമല്ല പൊന്നല്ലാ..മധുരക്കിനാവിൻറെ കിരിമ്പു തോട്ടം', എന്ന ബാബു രാജ് ഈണം നൽകി യേശുദാസിനൊപ്പം പാടിയ ​ഗാനം വാസന്തിയെ സിനിമാ ലോകത്ത് കൂടുതൽ ശ്രദ്ധേയയാക്കി. മീശമാധവൻ എന്ന ചിത്രത്തിൽ പത്തിരി ചുട്ടു വിളമ്പിവിളിച്ചത് എന്ന ഗാനവും മച്ചാട്ട് വാസന്തിയാണ് ആലപിച്ചത്.

സിനിമാ ​ഗാനങ്ങൾക്കു പുറമെ നാടക രം​ഗത്തും വാസന്തി തിളങ്ങിയിരുന്നു. ​ഗായികയായും നായികയായും നിരവധി നാടകങ്ങളുടെ ഭാ​ഗമായിട്ടുണ്ട് വാസന്തി. നെല്ലിക്കോട് ഭാസ്കരന്റെ തിളയ്ക്കുന്ന കടൽ, പി.ജെ ആൻറണിയുടെ ഉഴുവുചാൽ, ബഹദൂർ സംവിധാനം ചെയ്ത വല്ലാത്ത പഹയൻ, ദേശപോഷിണിയുടെ ഈഡിപ്പസ്, കെപിഎസിയുടെ നിങ്ങളെന്നെ കമ്യൂണിസ്റ്റാക്കികുതിര വട്ടം പപ്പുവിനൊപ്പം രാജാ തീയേറ്റേഴ്സിന്റെ കറുത്ത പെണ്ണ്, എന്നീ നാടകങ്ങളിലും തിക്കോടിയൻറെ നിരവധി നാടകങ്ങളിലും വാസന്തി അഭിനേതാവായും ഒപ്പം ഗായികയുമായും എത്തിയിരുന്നു.

സിനിമയിലും നാടകങ്ങളിലും ആകാശവാണിയിലുമായി ആയിരക്കണക്കിന് പാട്ടുകൾ പാടി. ഗായകനും റേഡിയോ ആർട്ടിസ്റ്റുമായിരുന്ന കണ്ണൂർ കക്കാട് മച്ചാട്ട് കൃഷ്ണന്റെയും കല്യാണിയുടെയും മകളാണ്.